霧中e5刺蝟與刺人e5日頭

[王貞文]

小刺蝟入去樹林內

佇八十年代，有機會看著蘇俄e5動繪家諾斯坦(Yuri Norstein)e5〈霧中刺蝟〉。完全靠手工一張一張製作e5動繪，有一款現代精緻e5電腦動畫無法度模仿e5詩味與活氣。

帶莓仔醬beh去拜訪朋友e5小刺蝟，踏入去親像牛乳e5霧內底，一面互自己濟濟e5想像驚著，一面擔心它佇路裡所遇著e5白馬。小刺蝟e5面真古意，有一對圓-lian3-lian3e5目睛，他e5聲音低低，弱弱，親像風吹過草葉e5聲。一隻貓頭鷹仔隨佇他e5後壁，「呼-呼-」在叫。樹林e5風景層次分明，佇霧氣中景物慢慢浮出來，枯乾e5葉仔ui3霧中飛出來，打佇小刺蝟身上，互他驚惶。甚至朋友叫他e5名，攏只有互他koh-kah驚。直到朋友揣到他，兩人安全坐佇火爐邊，快快樂樂飲茶。總是，就是佇chit-e5平安溫暖e5時刻，好心e5刺蝟心內iau2-ku2為著彼隻佇霧中吃草e5白馬擔憂。

與小刺蝟佇樹林內安呢走一choa7，佇hit-e5 iau 戒嚴e5時代，互高壓統治e5暗影與爪耙仔所困擾，猶原決意beh相疼e5年代，感覺真會當體會小刺蝟e5心情。

前一cham7，有朋友佇「Bin7-chhiunn--a cheh」(Facebook)頂面貼出〈霧中刺蝟〉e5連結，互我有機會koh一擺通佇「你管仔」(Youtube)看此齣短片，心內e5感動比二十冬前koh-ka2深。年歲漸漸大，對此款單純e5詩情e5欣慕嘛愈大。

佇過去此二十冬，蘇聯敗去，鐵幕打開，新e5時代來臨。無法度適應自由生活e5百姓，竟然koh再一擺數念蘇聯e5共產獨裁時代，數念強人斯大林（Josef Stalin）。新e5迷霧，新e5折磨，新e5驚惶，不變e5軟弱人心。

厭倦e5日頭

小刺蝟e5創作者Juri Norstein佇斯大林e5時代出世。佇此個獨裁者強迫人民大遷徙e5時，諾斯坦 e5老母佇旅程中將他生落來。1979年，他創作一齣動繪片，叫做〈故事中e5故事—一個動繪家e5旅程〉，用詩情e5筆調，用圖與音樂來記錄戰爭時代，也就是是斯大林時代e5記憶。此齣動繪成做動繪作品e5經典。

十幾冬前看過〈故事中e5故事〉，彼時e5世界秩序當在改變，鐵幕與獨裁的政權受到搖動。彼時的台灣，拄拄衝出一縫仔自由，觀看蘇聯e5動繪作品，嘛是此款新鮮e5自由所致蔭e5。今佇一e5變老去e5自由時代，重新來看此齣〈故事中e5故事〉，所喚醒e5記憶，m7-na7是對風格特出e5烏白影像e5感觸，koh有濟濟對彼e5年代e5熱切、充滿盼望e5心e5記憶。

影像e5故事是第二次世界大戰期間e5經驗：吸奶e5嬰仔、khe3蘋果e5囝仔、有烏鴉e5樹、破敗e5鄉舍、饑餓e5狗、已經失落去e5安寧世界。其中有一幕，五六對男女相攬跳舞，跳leh跳leh，戰爭e5風聲攪過來，親像一陣風，將男性ui3女性e5懷抱中奪走，in攏成做兵仔，佇風雨中腳步整齊、沉重，受逼離開自己e5親人與故鄉。此幕e5音樂是一首互人印象深刻e5　Tango，叫做「厭倦e5日頭」（Utomlyennoye Solntse, weary sun），此首Tango是二次大戰前後與戰爭期間通流行e5舞曲。佇戰爭中出世e5　Juri Norstein開始有記智e5時，就不斷聽著e5一首樂曲。他講，彼時此首歌佇所有e5莊舍、街巷攏會通聽見，好親像是會當代表歸e5民族e5歌曲。一遍koh一遍重覆，互人印象深刻e5音樂，有一點仔悲傷e5滋味，聽講本來是波蘭文e5詞，講戀愛中e5人beh相分離e5故事。總是，此嘛是一個人與他本來e5理想分離e5故事。

　「厭倦e5日頭」mah有出現佇Nikita Mikhalkov　1994年所拍　e5經典電影「烈日灼身」內底。烈日灼身」mah是佇處理斯大林時代e5故事，用一個莊腳e5家庭看起來安寧自在e5生活，怎樣受到政治變局e5威脅，來描寫出佇獨裁者e5時代，親像赤燄燄e5日頭e5強大權勢，怎樣威逼到平和安靜e5生活。

真互人感覺著悲傷e5電影。「厭倦e5日頭」e5音樂，佇滑稽e5查某囝仔e5嘴內唱--leh唱--leh，遂　m7知，此粒厭倦e5日頭已經變成做刺人e5日頭、毀滅e5日頭，欲將舊e5世界內底e5親情、友情、愛情攏總燒燒去。朋友會變成出賣者，英雄會互人看做反背者，受暴力傷害，啊彼位真愛sai-nai 　e5 滑稽囝仔，會死佇流放e5艱苦日子。「厭倦e5日頭」成為深刻e5悲調。

斯大林e5時代，就是安呢e5時代，是真理倒反e5時代，是互相出賣e5時代，是單純與天真無法度揣著寄腳e5所在e5時代。

為圖像注靈魂

轉來看〈故事中e5故事〉，透過「厭倦e5日頭」與莫扎特e5音樂，一張一張手繪e5影像e5動力有特別e5韻律，Juri Norstein無用任何對話，就用親像詩，流動e5圖，講出一大篇行過戰亂日子e5人e5故事。看他e5作品，真正會當感受著：一個動繪家，真正是為圖像注靈魂e5人(Animator)。

為圖像注入靈魂，是一款精巧e5手藝，小刺蝟行入去霧中e5樹林，一片枯乾e5葉仔飛過來，層次分明e5霧中世界，精準e5音樂與畫面e5配合，這攏顯明此位大師e5手藝e5精確。總是，互圖像活起來，koh活了會感動人，就m7是甘乾是手藝若定。敏感e5詩情，經過時代e5磨練，永遠抱著盼望，無失落自己，堅持風格，才互彼隻小刺蝟，與〈故事中e5故事〉成做一再回甘e5作品。

佇二十一世紀充滿驚惶、憂愁e5時代，全球佇經濟與氣候e5變動中充滿不安，放棄自由求安定的聲真強，獨裁者重新掌權e5機會真大，數念獨裁者、崇拜獨裁者的流行趨勢真驚人。

真盼望彼隻有幼秀敏感e5靈魂e5小刺蝟，猶會當抵擋刺人e5日頭。

因為有靈魂e5圖像，一定會比失落靈魂e5獨裁者，活較久。

[胡長松]

貞文姊的人權散文有思想，有力量，予人反省！

[顏雪花Catherine Yen]

今日揣時間讀台文戰線精彩的文章，重新讀貞文即篇"霧中刺蝟"，重現獨裁時代驚惶的氛圍由animation表現，我kah YouTube's "Hedgehog in the Fog" 節錄佇下跤，伊的音樂佮美術攏真水，值得分享!
http://www.youtube.com/watch?v=dRsXU4Q6a0Q