劉菁芬的頁面

詩是啥？詩是阮頭殼疼，起烘爐火勻勻仔煉出來兮一味草藥汁，等阮共藥粕佮藥劑倒置碗底詳細看，才知影，浮置頂面兮是溫膽湯，沉置碗底是紅娘兮藥方。

恁一定毋相信，原本詩是阮欣賞家己徛佇相思仔林上媠兮勢面，即馬續來因為妙沂寄來兮一本冊，內底所寫兮幾句話，予阮自故鄉彼粒虎頭山彼片相思仔林，看向土城山崙閣過去彼座觀音山，佮阮跤底所踏兮這塊險險仔欲拋荒去兮菜瓜園。

最近佇幾位文友兮鼓勵下，阮毋爾漸漸看著徛佇日頭跤兮家己，嘛看著天光了後日頭兮光線，射向東北風定定來巡邏兮東北海岸，彼片一路共手深入海底兮半山壁，佮行位海湧滾絞，頂面罩著水霧兮飄搖船隻。…

阮安搭佇遮兮每一字，親像是會生湠的相思仔林，一叢牽挽一叢，一菢攬過一菢，徛佇這塊土地金金看，看南勢溪佮北勢溪按怎會合，看新店溪佮大漢溪按怎讚聲，搝長一條淡水河迵大海兮生命線。…

毋管是出日頭，抑是烏陰天，阮兮心情就親像一叢落雨樹，輕輕啊吸水，輕輕啊吐氣，阮係透早青草埔頂面活靈靈兮露水，阮係雨傘頂頭一蕊閤一蕊兮水玫瑰。

係按怎阮欲將心內兮景緻寫予伊？因為伊係阮永遠放袂落離兮一首水中詩。

汝離開彼下晡，阮一人徛佇遮聽天頂勻勻仔霆雷吟詩；也讀烏陰兮雨水，共遮塊土地補空嘴。

悲傷藏佇佗位？悲傷就藏佇夢中吞霄社彼條挑鹽古道，阮嘛誠想欲綴遐兮文友，揹筆一步一步去阿公怹三兄弟用扁擔擔怹老爸兮金斗甕行過兮跤跡走揣鄉愁，可惜這馬阮按怎看、按怎揣攏欠一味，親像八八水災兮大水，明明有跤，卻是行無路。…