台文戰線聯盟

行的藝術

人生在世,咱欲按怎行,才是上媠的姿勢?
無仝款的路,是毋是就有無仝款的行法?
最後,行落人生這个大舞台了後,是欲去天頂歇睏樂暢,抑是欲去塗州賣鴨卵,檢采這著愛看天公伯仔彼本大大本的天公數簿,是欲按怎安排,因為千算萬算毋值得天一畫啦。
  「行」這件代誌講起來雖罔真平凡,毋過欲行甲予人呵咾、欣羨、看會起就無簡單。古早時代,咱嘛有真濟和行有關的俗諺,闢論有人毋知家己幾斤幾兩重,咱就會講伊是「未曾學行先學飛,未曾掖種想挽瓜」;抑是靠勢家己經驗豐富、年歲較濟,就會使呵咾家己「過橋較濟你行路,食鹽較濟你食米」;勸人做代誌愛較定著的,無通青磅白磅、兇兇狂狂,就講「緊行無好步,緊嫁無好大家」;若有人好囝毋做,做歹囝,全全交歹朋友,做歹代,就通共罵「人牽毋行,鬼牽溜溜行」;閣有一句「行船走馬三分命」,是咧講做行船交通運輸遮爾仔危險的工課。
這一句一句攏是咱先人開花結果的智慧。另外,咱嘛會當欣賞詩人、作家,in對「行」這件代誌的看法,吸收in飄撇的行法,然後行出咱家己頂真的跤步。有當時仔真欣羨in哪有遮爾濟古通好講,閣會當講甲遐好聽,實在無簡單。若阮阿媽、阿公,老一輩庄跤人咧共人呵咾,in會講:「哎唷!遮厲害,猴毋才按呢。」細漢的時陣,阮戇味戇味,攏分袂清in到底是咧共人呵咾,抑是咧共人剾洗譬相。大漢了後,就真少有聽人按咧講。這馬,看著這寡作家遮厲害就雄雄想起來,煞感覺真親切、真趣味,嘛感覺in遮gâu寫,不時有神來一筆,真正是無親像人,毋過in嘛無親像猴,in應該是敢若像神仝款遐厲害才對。
冊若讀了有夠濟,慢慢仔就會有家己的想法,逐家就會當家己創作;抑是老師嘛會使共詩和童謠等等,美麗又閣適合的臺語文學作品,融入家己的教學之中。譬如講,教臺語聲調的時,有老師就會變竅,按呢教: 「一四無標號,二三倒正划,五調戴尖帽,七調路中趖,八調攑竹篙。」毋但老師教了感覺誠有成就感,學生嘛會愈學愈有興趣。
  本底我想講欲來洗交洗手,毋愛閣沐臺語文矣,毋過看著蔡文傑的詩了後,煞予伊感動著,才改變這个消極的想法,繼續拍拚。
  蔡文傑,伊是台中縣清水人,1975年出生,伊雖罔不幸出生就來帶身命,是一位腦性痲痺患者,行動真無方便,出出入入,攏愛坐輪椅。
  毋過,伊寫的詩,實在寫了真好。伊佇2007年10月出版的臺語詩集《風大,我愈欲行》,內容有歡喜嘛有悲傷,有溫柔嘛有激動,是伊用性命,一首一首,沓沓仔烰、勻勻仔煨出來的詩歌。
  伊寫講:「恁晟阮比別人較艱苦/我知影/我會認真拍拚/袂輸佇命運的後壁。」我愈看愈感動,尤其家己已經做人老母遐濟冬矣,非常了解晟養囝兒的艱苦,更加向望囝兒會當了解咱做人爸母的苦衷。實在是感動甲忍袂牢,將詩句唸予阮翁聽,伊聽煞隨呵咾:「寫了真好!」
  當然好囉,人伊這首詩是捌得過第四屆全國身心障礙者文藝獎,新詩組評審特別獎的喔!因為,伊有一對偉大的爸母,親像日頭佮露水按呢鼓勵、支持、陪伴伊。予伊勇氣佮氣力,毋驚北風佮冬雪的粗殘;予伊會大會湠,跋倒 起來閣再行的力量。因為序大人完全無條件付出的愛,予伊相信,春天一定佇頭前咧等伊,所以伊鼓勵伊家己,愛雙跤徛直直,雙手拄天,大聲喝出「風大,我愈欲行」,遮爾燒滾滾、熱phu̍t-phu̍t的心聲。
  這是第一斗,我唸詩予阮翁聽。無想著,我第一改唸詩予伊聽,就念台語詩,講起來,這可能嘛是和臺語有緣的緣故。後來,看伊聽了講袂䆀,閣有淡薄仔興趣興趣,我就定定唸我家己寫的臺語詩予伊聽,和伊討論,阮翁仔某這个「袂䆀」的結果嘛予我感覺真意外,這攏是這首詩的功勞。
  另外,伊寫的〈夜〉和〈鉛筆〉這兩首詩,其中有部分的詩句,我嘛是誠欣賞,像伊寫〈夜〉:「夜/親像咖啡/會使精醒/一句詩內面的聲音/夜/親像一本合起來的日記/月娘鎖匙/拍開/會當讀著/人生的風景」;伊寫〈鉛筆〉:「是鈍/是尖/是慢慢仔經過世事 經過霜雪/寫出去的每一个筆劃,攏是/參這个世界相處的姿勢/是長/是短/攏是接載每一个性命的經過/畫出去的這幅圖/有烏影/嘛一定會有光線」。
  這攏是伊對人生有真深的感動,用性命寫出來的作品,會發光發熱。所以,咱讀著的時陣,才會若親像予電電著仝款。
  人講:「有狀元學生,無狀元老師。」這句話都無一定,因為毋若蔡文傑是狀元學生,連in老師路寒袖嘛是狀元老師。
路寒袖本名王志誠,台中大甲人。伊寫的著作(tù-tsok),有歌詞、詩集、散文、繪本書、攝影詩文集,是一本又一本。閣定定連紲得獎,作詞獎、文學獎、章散文獎、年度詩獎、台灣詩人獎、大墩文學貢獻獎等等。詳細甲算算咧,伊的著作、獎狀和獎座可能早就囤甲規厝間矣。
  伊寫的〈四月望雨〉鼓勵人佇失志,暗淡無人問,沉重孤單心酸的時陣,嘛是愛拍拼骨力拍算家己的未來:「拍開風的門/予悲情去流浪/行佇暗瞑中/無月無影,冷冷四月風做伴/四月望雨水/雨水滴心寒/意志溢海岸/遙遠世路家己自由行」。
  就參黃勁連先生,1988年,佇台灣時報副刊發表〈行咱的路〉這首詩所寫內容意思,一模一樣,伊用有血有目屎的母語,勇敢寫出心內話︰「向前/行咱的路/勇敢來行/行咱的路/行咱的路/光明前途」
  所以,毋管是星光抑是月光,好天抑是落雨,為著咱明仔載的幸福,千萬一絲絲仔都毋通耽誤,愛行的家己的路。

海翁台語文學第164期2015.8

檢視次數: 365

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款