台文戰線聯盟

 看故事遊世界~虎姑婆

  虎姑婆這个故事是佇臺灣古早客人村裡發生的民間傳說,往過佇咱臺灣是一个大人囡仔通人知的故事,嘛是每一个做人老母暗時欲騙囡仔唔唔睏的時陣,攏會­講予囡仔聽的眠床故事。
  後來,臺灣製作人唐台齡先生佮英國bang51 ga11藝術大師Lorr­aine Mason,親身出馬來到新竹北埔客家村、輔大中華文物中心、客家文化會館、博物館,實地田野調查­考察人物造型、服裝設計、建築成格、物件陳設等等,然後使用矽膠、塑膠和海綿合成的原料,製作出遮爾仔特別傀儡尪仔的bang51 ga11,閣得著2000年第十七屆芝加哥國際兒童影展電視類上好bang51 ga11片的大獎。

  這馬,自從伊有閩南語配音了後,嘛若像變成咱國小一、二年仔閩南語課必看的影片。影片看完,咱就會當開始上一節共討論做功課變做足趣味、足心適的課矣,課程大約分做四个主要的活動:

  活動1. 劇情紹介:請學生囡仔自由發揮,做一寡簡單「劇情紹介」的分享。比如:古早有一隻虎,伊一定愛佇日頭落山進前吃三个囡仔,才會當永遠變成人形。所以,伊變做賣李仔攕的佮三姑婆,來庄仔頭掠囡仔。好佳哉,落尾聰明又閣勇敢的阿美,共逐家救出來。

  活動2. 人物分析:請學生囡仔揣出影片中的主角、配角等等的角色,並且研究分析in逐个人的個性,順紲學習人物個性的語詞愛按怎講,譬論講:聰明、孝呆、乖巧、三八、溫馴、恰北北、囂俳、拗蠻、蠻皮、無頭神,等等。

  活動3. 精彩情節:影片看煞一定有予人印象足深的精彩情節,咱會始予囡仔發表伊上佮意的情節,甚至會使予in演看覓,無定著in演咧比本來的影片猶閣較好較精采。

  活動4. 造句練習:對影片中選出一、兩句閩南語的句型,予逐家來練習閩南語的造句。譬論講:這句「逐家攏去鬥相共。」就會使練習「···攏···」抑是「···鬥相共···」的造句練習。

  見擺,高年級的學生囡仔若看著學弟、學妹咧看這齣戲,就會佇窗仔邊那看那講:「足數念的呢!咱往過嘛捌看過。」

  「著啊,著啊!一開始我閣會記得,看起來感覺佮戲說臺灣足相siāng的。」

  「妳也有看戲說臺灣喔!我嘛有看呢!」

  「彼个阿弟仔阿強足古錐的,in阿母叫伊乖乖仔睏,伊無一秒鐘就隨睏去,實在有夠譀。」

  「閣有伊聽著免錢的李仔攕,嘛足好笑的!」

  「猶閣有三姑婆嘛誠好笑!」

  「最後,一串炮仔就共山洞炸掉,實在是傷譀古矣。」

  「真是使人懷念!」

  看in一陣人那行那講,真趣味嘛感覺真歡喜,因為閩南語這馬是靠咱來掖子,將來著愛靠in來釘根生湠囉!毋過,怪奇的是主角虎姑婆佮阿妹仔阿美,in哪會攏無講著,煞共阿強和三姑婆這兩个笑詼笑詼的配角佮彼串炮仔,記甲一點仔都無重耽。

基隆市閱讀教育電子報 第73期

https://readpaper.kl.edu.tw/index.php?id=970

檢視次數: 221

意見

您必須是成員才能發表評論!

加入 台文戰線聯盟

© 2022   Created by 胡長松.   管理小組

成員徽章  |  報告問題  |  服務條款