台文戰線第18期 編輯室筆記

[胡長松]

堅持佮實踐　　　胡長松

　　

台文戰線第18期推出陳金順專輯。這十幾年來，陳金順一直堅持佇台語文學的創作佮運動，毋管是詩、散文、小說的創作抑是編輯的事工，攏有真值咱致重的階段成果，所以，咱有必要閣較深入來熟似伊佮伊的文學。除了成果，陳金順的「實踐」精神本身，就是現階段台語文學尚重要的條件，值得咱來互相勉勵。

戰後的台語現代文學運動，位1970年代到今，已經經過幾若波佇技術、題材、理論方面的開展，參加的創作者佮研究者愈來愈濟，技術愈來愈新，作品愈來愈豐富，嘛愈來愈受著外界的重視，到今，台語文學成做族群語言的文學主體，已經是台灣文學尚蓋重要的主體文學矣。

捷克作家米蘭昆德拉有寫過一句話講：「人類佮權力的鬥爭，就是記智佮遺忘的鬥爭。」我相信，成做一个寫作者，佇面對權力企圖造成人類的遺忘的這場戰鬥內面，袂使缺席；寫作，佇這方面來看，就是人類記智本身的戰鬥。各族群的記智保存佇各族群的母語內面，當然，透過各族群母語所寫落來的，嘛是尚蓋真實佮寶貴的族群記智，更加袂使缺席。佇全世界面對權力的文學戰鬥內面，台語文學該當然就是代表咱族群的聲音，是咱的良知，是咱的位置，是咱的武器，是咱對世界文學尚特殊的貢獻。

筆者相信足濟人攏已經認知台語文學的重要，特別台語族群的先進作家佮研究者，凡勢因為啥物款的原因，致使猶未開始接觸台語文學，猶未位認知進入創作抑是研究的實踐階段，這攏真拍損。請你夯筆行入來咱的隊伍，當你踏出實踐的第一步，你就會知影無啥物大難題，因為這是你自細漢就熟似的母語，伊是你的爸母、是你的兄弟姊妹，是你的朋友；你寫出第一字就會知影你尚好的時代已經到位，因為你所寫出來的文學，就是族群真實的記智佮聲嗽，伊，就是真實的你家己。

只要你開始實踐！

請你開始實踐！

2010/3/10 高雄內惟

**************************************************************************

台文戰線第18期 2010.04
每期200元　一年4期700元
請劃撥　42264462 戶名　蔡宛玲

【社長的話】
請尊重而且維護台灣的文學生態／方耀乾
【編輯室筆記】
堅持佮實踐／胡長松

【陳金順 專輯】
勇敢向前行──訪問陳金順／林麗嬌
陳金順文學年表
評陳金順的〈開置街頭的含笑花〉及林央敏的〈蓮花火穎〉／宋澤萊
從陳金順的詩看台灣人自我圖像的幾個典型／胡長松
無常中的有常 ／林麗嬌
走找《一欉文學樹》中的寫作手路／李婉慈
島南地誌／陳金順
來去紅頭嶼／陳金順
目降鬚氅／陳金順

【詩】
決定／去死／稻草人／方耀乾
我的衫仔是夜的赤裸／我攬抱規座電台／張德本
啄食家治的形影／莊柏林
樟仔／為離別的情人寫一首詩　／陳秋白
黃斑歲月／林沈默
選舉／小城綾子
眷村／藍淑貞
證書的滋味／謝金色
史前遺址／郭文玄
學問／蘇善
我選擇bô欲選擇人生／馮思蓉
紅印台／趙迺定
七美黃昏後／梨山／林文平
向前行／台灣人e無奈／高月員
監囚速描　／柯柏榮
年歲落葉‧土地發葉──寫葉石濤／楊焜顯
心內的七弦琴／陳潔民
批／李長青
阮的筆是翼／胡長松

【散文】
用舌用筆來革命／王貞文
外垵，我的母親／李秀
冬節圓／張春凰
台南縣Siraya語tī國小ê教學／鄭雅怡

【小說】
長篇小說連載《菩提相思經》（3）／林央敏
長篇小說連載《大港嘴》（7）／胡長松

【台文筆會「2010港都台語文學講座」消息】
【本社出版補助計畫】