【台語小說】天落紅雨
坐佇牛車頂，tann頭看天，夜暗天色濛霧，天頂的月娘m̄知走佗藏？1刻鐘前，佇溝仔尾庄楊家tú欲睏ka-tsūe，予砲仔聲、鑼鼓聲pin-pin-piàng-piàng吵睜神，頭殼iau se̍h神se̍h神，3、2下手就予清國兵仔tshi̍h落塗跤兜，雙手綁iap後，押上牛車頂。朱一貴規身軀破sàm破sàm，頭毛散giâ-giâ，目kàng鬚tshàng袂輸監囚，伊這tsūn是清國朝廷的頭號戰犯。
牛車khok-lok-khok-lok，透暝ùi諸羅縣溝仔尾庄起行，沿牛稠溪1路ǹg南，這暝風透，岸邊規phiàn的菅芒予風siàn kah咻咻叫。押朱一貴遮的殘兵敗將的清國兵仔，隨個啊隨個寒kah ka-lún-sún。M̄過，暗頭仔予楊家兄弟灌酒phah茫的朱一貴，這時頭殼tsám-jiân-á清醒，往事1幕1幕浮出伊的腦海。
Wagi 5歲彼冬，tùe老母Isip ùi Siraya大目降社盤山過嶺遷徙來羅漢門。伊iau會記，in的田園厝宅m̄-nā予漢人láu-á 用1領鹿仔皮pián去，閣khah淒慘的是單純、古意的老爸，mā予láu-á tsau-that kah血崩山來離開這個苦情的世間。伊永久永久攏會記得，彼暗in 2母仔囝佇透風落雨的暝裡，包袱仔tshìn-tshái款款咧，連暝走路離開故鄉。伊永遠會記得，遮的畫面一直tiâu佇伊的頭殼底，m̄ bat放袂記。
Wagi tùe老母行幾lo̍h暝日，身軀無半sián所費，tshiâng在iau飢失頓，腹肚便若大腸告小腸，in就挽人種佇路邊的果子佮菜蔬止飢。1步1跤印，1步1滴汗，m̄知行幾暝日，in母仔囝來到山路坎坎坷坷，不止仔iap僻、山內斗底的羅漢門。Tshím來羅漢門的時，Isip參人做山穡，伊雖罔有Siraya查某人天生刻苦耐勞的本等，不而過，儘管伊逐工ùi透早做到透暗，mā kan-na勉強維持1家2粒頭喙的3 tǹg niā-niā。
無偌久，蹛佇羅漢門鴨母寮1位死某tú對年，號做朱旺的中年人。有1日經過Isip咧做山穡的所在，去予Isip sah著頂八卦。Isip 2蕊tîng-sûn的大目睭，烏甜súi啊烏甜súi的皮肉佮面模仔，予死某的朱旺看kah喙nūa水tshap-tshap津，尤其是伊久年勞動包佇粗布衫仔內面彼2粒thîng-thîng-thîng的奶，使得朱旺的下身強強欲tsih-tsat袂tiâu。朱旺央託媒人婆仔講親tsiânn、看好日，簡單備辦幾桌仔酒菜宴請庄裡的厝邊頭尾，歡頭喜面kā Isip ùi破草厝仔娶轉去伊搭佇鴨寮邊的土埆厝，Isip嫁人做後siū，Wagi tùe轎後踏入朱家的戶碇。朱旺嫌Isip佮Wagi的名番仔番pì-pà，咬舌歹hiàm，就kā Isip號漢名花，Wagi號漢名一貴。
朱旺佇鴨母寮飼鴨通人知，頂庄有名聲，下庄真出名。朱旺做人海派、朋友廣交，不時你兄我弟招招來鴨母寮食鴨肉配燒酒，三教九流攏thìng好tsiânn做座上客。一貴自7歲起，就tùe老母佮後叔參1大陣鴨仔pûann-núa感情，會使講袂輸死忠兼換帖的。講mā怪奇，一貴ta̍k日gia̍h 1枝kûan伊2倍長的竹竿咧趕鴨仔，m̄ bat聽伊喝thiám，伊叫鴨仔往東in就往東，hiàm in落南絕對m̄敢上北。無偌久，一貴就展現出領袖的氣質，tsiânn做庄裡的囡仔頭王。
朱旺lim酒m̄知thang準tsat，閣再加上操勞過度，佇一貴10歲跤兜suah來斷腦筋離開世間。自安呢，母仔囝相依為命，佳哉朱花giám-ngē，hūann起飼鴨家業閣有淡薄仔樣相。不而過，本名Isip的Siraya堅強女性朱花，mā佮朱旺仝款因為操勞過度，佇一貴18歲的時，無講無tànn來魂歸離恨天。
18歲的朱一貴，生tsiânn高tshiâng大漢，身kûan 6尺以上堂堂的查甫囝。Tsíng著老母2蕊tîng-sûn的大目睭，烏金tīng骨的皮肉。這時的伊，佇鴨母寮飼鴨早就通人知，頂庄有名聲，下庄真出名，一點仔都無輸予su當年的後叔朱旺。一貴做人phīng朱旺閣khah海派、廣交，làng暝無làng日，你兄我弟招招來鴨母寮食鴨肉配燒酒，三教九流攏thìng好tsiânn做座上客。伊1枝竹篙壓倒規陣鴨的功夫，天跤下無人thang比，ta̍k家心服口服hiàm伊「鴨母王」。
高tshiâng大漢、身kûan 6尺以上的朱一貴，雙手雙跤hông綁咧牛車頂，喙焦喉khuah，欲講偌艱苦就有偌艱苦。M̄過，好漢敢做敢擔當，伊心頭掠定，無hinn-hainn kah一聲半句，橫直頭伸出來是一刀，頭kiu入去mā是一刀，20冬後iau是英雄好漢。牛車khok-lok-khok-lok，ùi溝仔尾庄沿牛稠溪1路ǹg南，岸邊規phiàn的菅芒予風siàn kah咻咻叫。欲到八掌溪墘進前，雄雄hûa-a 1下，雨tshia桶倒，眾人bih無路。這個時tsūn，無論是領月俸的清國兵仔，抑是放某放囝hông綁咧牛車頂的落難好漢，天公伯仔對in攏無私無偏，隨個啊隨個沃kah澹漉漉、漉漉澹。朱一貴tann頭ǹg天，粗枝強mé的雨箭無時停，一點仔都無咧同情伊落難，一直射落來、一直射落來……，射著伊的面底皮，射thàng伊的筋骨，伊全然無tsùn-būn著，伊目睭展大蕊，ùi伊目裡看出去，看著1枝sùa 1枝的紅色雨箭，一直向伊射落來。
朱一貴目裡紅色的雨箭，無一tah-a久就斷點斷點。天tú phah-phú光，押送朱一貴等人的牛車陣，來到八掌溪墘下茄苳福建水師提督施世驃暫時安營的地場。施世驃是助清國滅鄭氏王朝的大功臣施琅的第6後生，受老爸致蔭，施琅死了後，康熙皇帝賞賜伊傳承福建水師提督的官位。坐佇營帳裡的施世驃老神在在，當伊看著khiā咧面頭前這位6尺以上、規身軀破sàm破sàm，頭毛散giâ-giâ，目kàng鬚tshàng袂輸監囚的人，伊隨ioh出對方是清國朝廷的頭號戰犯朱一貴。Ùi朱一貴展大的2蕊目睭裡，施世驃讀出一款m̄ bat看過的堅決意志，伊知影朱一貴m̄是普通的kioh-siàu。若無，欲ná有法度佇khah無半月日，箍úa 30萬群眾，佔領台灣、諸羅、鳳山一府三縣大phiàn的土地。施世驃心內暗靜咧想，設使今仔日伊參朱一貴m̄是對敵，kiám-tshái舖排佇目睭前的是英雄惜英雄、好漢疼好漢的場面。
伊激一個威嚴的面腔，對朱一貴歹聲嗽：「朱一貴，見著本官iau m̄跪落？朝廷對待百姓仁德深厚，是安怎恁欲khiā旗造反？你kám知罪？」
朱一貴目睭展大蕊jîn施世驃，「哈！哈！哈！」大笑三聲，「查甫囝跪天跪地、跪老爸佮娘lé，無跪恁遮的貪官污吏。設使康熙知影仁民惜物、造福百姓，我朱某人kám有才調出來khiā旗造反？Tsit-má落入恁的手頭，欲刣欲剮隨在恁。」
施世驃見siàu轉受氣，命令下跤手人gia̍h鐵鎚仔摃朱一貴雙pîng跤頭u，欲迫壓伊雙跤跪落地。儘管朱一貴雙跤血sai-sai，疼kah強欲siàm屎，伊猶原牙齒根咬咧，賭強徛在，無hainn kah半聲。施世驃看朱一貴不止仔膽漢，無hiah簡單落軟，隨下令：「即時將朱一貴佮其他反賊，押送北京城受審處置。」
透早tsha̍k人目的日頭光，照佇大天后宮面頭前的高台，廟埕前1陣厝角鳥仔踮hia tsiù-tsiù叫，這座高台是為著中興王朱一貴登基透暝趕工搭好勢的。吉時1到，khau鐘擂鼓，鐘鼓齊鳴，響亮tshang脆的聲傳phiàn赤崁城。朱一貴頭戴通天冠、身穿黃龍袍，威風凜凜，一步一hu̍ah peh上高台，伊四正四正坐佇頂kûan的王座，身軀邊是國師王玉全。朱一貴看ùi高台下底，文武官員按照太師、國公、將軍、都督、尚書……的順序排kah好勢好勢。廟埕四khoo lián轉好玄圍觀的百姓kheh kah tsat-thóng-thóng，厝邊頭尾的囡仔看著這款生目睭m̄ bat看過的場面，mā踮邊仔嘻嘻嘩嘩、跤lāng手lāng。
登基大典起鼓，國師王玉全大bú聲宣告：「大明國即日起立國，年號永和，立朱一貴做中興王。第一道禁令如下：凡淫掠百姓者，無論身分，一律就地正法。」王玉全宣告suah，文武官員雙跤跪地，面ǹg朱一貴齊聲huah：「吾王萬歲萬萬歲！」
這時，國公排頭名的杜君英ná想ná不服，規lān-pha火無tè 消tháu。伊目睭皮nih咧nih咧，目kàng鬚tshàng，袂giàn正眼看朱一貴。伊暗靜咧想：「朱一貴這khoo猴死囡仔，憑佗一條理路做王坐大位？」3工前，抗清大軍攻入台灣府城，客籍的杜君英自認是第一功勞者，siàu想欲立家己的後生杜會三為王，本人bih咧後壁面tsiânn做太上皇。M̄過，伊tiak的如意算盤予眾人phah亂阻擋，ta̍k家公推朱一貴做王。自彼tsūn起，杜君英滿腹怨恨，tiām落報niáu鼠仔冤的種籽。
實在講，抗清大軍的勝利袂輸秋風掃落葉，來kah hiông-kài-kài。3工前，對敵兩軍佇春牛埔 交戰幾lo̍h回合，ùi天tú拆ha̍h 戰到透中白晝，朱一貴tshūa領數萬兵眾，親像海湧1湧sùa 1湧溢入台灣府城。雙方刀光劍影，人聲馬聲齊聲hán huah，戰kah難分難解。無疑誤，清軍把總楊泰陣前hiông-hiông sái倒頭槌，1刀tu̍h向總兵歐陽凱，歐陽凱袂赴閃身跋落馬跤，朱一貴部眾做1下圍úa過，kā歐陽凱的頭tsûi落來。到遮，清軍大失敗，統領兵眾的總兵大人陣前人頭落地，phah輸走贏的兵眾死的死、逃的逃，1路跤底抹火油──溜suan到鹿耳門，坐幾lo̍h 10隻戰船敗走澎湖。事實上，台灣知府王珍佇朱一貴部隊iau未phah入府城進前，就偷偷仔suan去澎湖。這場大戰鬥了後，朱一貴的部隊1睏頭就絞kah超過30萬大軍。
清國官兵phah輸走贏，袂輸iap尾仔狗相sùa脫逃，朱一貴大軍無tú著siánn-mi̍h抵抗，順序進入台灣府城。當朱一貴的大軍進入城內，沿路雙pîng邊褪赤跤、穿草鞋、粗布衫跪地迎接王師的民眾khiā kah滿滿是。朱一貴為著安tah被兩軍相殺驚破膽的民心，代先頒布安民令，嚴格禁止部屬做出刣人放火、強掠民女等天地不容的代誌，違反命令者斬無赦。Sùa落phah開府庫、粟倉，kā庫銀、米糧分phenn予有功的部將佮散赤的低層民眾。安呢做，m̄-nā安tah驚惶的民心，mā予府城免除jû亂的危機。
隔轉工，抗清北路軍攻破諸羅縣治佳里興，清軍參將羅萬倉戰死，頭殼hông剁落來、tshiám咧竹竿頂，部隊大pān大pān、沿路送轉來府城獻予統帥朱一貴。到遮，台灣、諸羅、鳳山一府三縣大phiàn的土地，tsiâu落入朱一貴的手頭。這時，街裡風聲謗影，1喙傳1舌hán講鹿耳門外海浮出玉帶佮七星令旗，朱一貴部將認定這是天降聖人的吉兆，in隨時phah鑼摃鼓前往鹿耳門拜請玉帶、七星令旗轉來服sāi。講mā怪奇，當朱一貴的結拜兄弟李勇、吳外來到鹿耳門外海欲拜請玉帶、七星令旗的坎站，天無照甲子，雄雄hûa-a 1下，雨tshia桶倒，紅色的雨箭向in 2人一直射落來，使 in目睭一時thí袂金，等待拜請suah，雨停日出，一切照原。李勇、吳外順利kā玉帶、七星令旗請轉來朱營，獻予朱一貴，同時向伊報告鹿耳門外海玄奇的天象。朱一貴聽suah心情tsám-jiân-á定著，kan-na哈哈大笑。
春天尾，鳳山地界塗牛大翻身、海湧滾蛟龍，海水倒頭灌，造tsiânn民不聊生、活不如死、淒慘落魄的現象。埤仔頭 的百姓為著祈求庄仔內大細平安，ta̍k家公khui出錢搬請戲班登台謝神。戲台頂khin-khin-khiang-khiang，鑼鼓聲響phiàn規庄頭。台灣知府王珍接著報馬仔傳來這個消息，硬賴講是結拜兄弟密謀抗租造反，大肆ki一睏頭逮捕40外人，ùi死的摃倒轉來，隨個啊隨個尻川摃kah腫uainn-uainn，袂輸廳頭咧敬拜神明、公媽的麵龜。
王珍手提方子 （hong tsí）出力tǹg桌仔，逼問墾戶黃阿土口供：「堂下跪者何人？Iau m̄速速招來？」
黃阿土透世人m̄ bat看過tsiah-ni̍h大粒的大官虎，suah驚kah siàm尿，塗跤一pû tsiânn大pû，伊ná tshuah ná講：「啟稟大…大人，草…民…草民號做黃阿土，是埤仔頭的小…小墾戶。阮無彼個膽抗…抗租造反。M̄過…m̄過…」
王珍閣出力tǹg桌仔：「大膽刁民！M̄過安怎？」
黃阿土m̄敢tann頭看王珍，伊這回深深suh一口khùi，做一睏kā話講hoo透：「阮kan-na偷偷仔走去山頂剉樹仔niā-niā。」
王珍聽著有人偷剉樹仔m̄納租，氣kah規腹肚火無tè thang消tháu。另外，連暝閣派人掠百外個埤仔頭庄民，tsiâu-tsiâu刣頭，一律斬無赦。
Sùa落來，洲仔尾 大雨tshia桶倒，3暝3日落無歇，好親像天公伯仔欲做1擺kā伊的目屎流hoo焦仝款。佇海裡掠魚袂赴bih雨的漁民，佮蹛佇海墘仔的1陣散良人，攏有看著1 tsūn 1 tsūn的紅雨，一直落無歇。民間風聲謗影，hán講鄭成功的亡魂欲倒轉來報寃仇。Mā有人佇úa海邊的瀨口 看著一隻怪獸，踮大雨裡走tsông，落海了後過三鯤鯓上岸，閣ùi大井頭 nǹg入台江內海，出安平港了後走kah無影無跡。牠究真是海翁、鱷魚抑是水牛？無kah 1個人講會通透。
仝時，鳳山縣赤山地界的火山大爆發，裂開的空喙有8丈深、4丈闊，烏色的路糊糜仔一直溢出來，暗暝紅色的火光tshìng kah丈外kûan，燒氣hannh kah幾lo̍h里內無人敢úa近。
諸羅山mā hông hán講山崩地裂，山頂噴落來的塗沙，袂輸血水tshap-tshap滴。
若按四時節氣，照理講這個季節刺桐花該當大開，滿城紅kì-kì才tio̍h，m̄過，今年suah是無開kah 1蕊半蕊。
種種變天、玄奇的異象傳phiàn府城內外，lā kah規個民心亂tshau-tshau。世間事無奇不有，閣khah怪奇的代誌出現ā。有1日，1位穿tshah koh樣、離經的hûe尚，青pōng白pōng佇安平的街頭巷尾se̍h過來行過去。便若tú著人，就自稱是玄天上帝派伊來報知台灣人民，4月裡恐驚會歹星入境。「請問大師，欲安怎tsiah會當閃災避厄？」若有人安呢問hûe尚，伊一概應講：「時到日到，恁ài佇門口埕排設香案，」伊喙鬚摸2下，sùa落講：「用黃紙做細枝旗仔，頂面寫『帝令』2字，插踮香案裡，安呢自然thang消災解厄。」講suah， ná行喙裡ná唸：「天機不可露洩，天機不可露洩啊。」
公元1721年（清國康熙60年）4月19透中白晝，赤iānn的日頭光照佇羅漢門。朱一貴出招52位平素時仔信任會得過的死忠道友，佇鴨母寮煮酒祭拜天地、義結金蘭，tsiânn做異姓兄弟，為ián倒清國暴政phah死無退。雖罔，朱一貴m̄是會中歲頭上濟的，不而過，眾兄弟早就kā伊當做頭兄看待，ta̍k家順風駛船推sak伊tsiânn做盟主。
「各位兄弟，多謝ta̍k家無相棄嫌，推sak我朱某人tsiânn做盟主。」朱一貴倒手tah踮正手面頂，gia̍h到胸前，面對眾兄弟流露真情：「佇清國貪官污吏的界管之下，苦情的百姓早就民不聊生、活不如死。春裡，滿狗王珍心肝歪坦khi pîng，私偏伊的後生做鳳山縣令，爸囝2人狼狽為奸、為非sám做，已經造tsiânn天怒人怨，到kah天地不容的地步，tsit-má是咱兄弟ián倒滿狗、khiā旗造反的好時機。」
「盟主講得tsiânn tio̍h，」3工2頭tsia̍p來鴨母寮行踏的黃殿，接sùa朱一貴的話尾：「這tsūn是3千年1擺海漲，ián倒滿仔狗上好的時機，天時、地利、人和攏úa咱這pîng。盟主thang順勢宣稱是大明皇室的後嗣，只要gia̍h出反清復明的旗號，陪tùe的百民定著親像滾絞的海湧，1湧sùa 1湧。」
「黃兄，」朱一貴kā黃殿tah 1下肩胛頭，「若kan-na gia̍h反清復明的旗號，hūan勢只會當牽挽極其少數的人，咱tsim-tsiok kā想看māi，清狗界管之下的百姓，絕對多數攏是做穡、手面趁tsia̍h的艱苦人，先顧腹肚tsiah有才調顧佛祖，這條千古真理你我攏通徹。若盡靠反清復明這帖藥方，不如順應時勢gia̍h起 phah倒貪官污吏的旗號，刺激濟濟散赤的民眾投入抗暴除奸的隊伍，安呢，革命m̄ tsiah有píng phiat仔的可能。」朱一貴lim 1甌酒，sùa落講：「緊事袂當寬辦，用咱現此時的步數，四界去出招人結拜陪tùe。2日後午時三刻踮這個地場會齊。」
2日後午時三刻，鴨母寮kà-kà滾，短時間內ùi每1角勢聚集千外名、互相之間無在穩相bat的結拜兄弟。經過朱一貴簡單的調教，操兵點將了後，眾人剉竹仔做尖槍、綁旗幡，頂面用毛筆字寫「官逼民反」、「激變良民」、「大明重興」，數百枝旗幡仔予風siàn kah phia̍t-phia̍t叫。隊伍上頭到，翁飛虎手裡gia̍h 1枝極其大枝的戰旗，頂面「中興大元帥」的紅字，可比ta̍uh-ta̍uh-á斜西的日頭映照千外粒熱phut-phut的心肝。朱一貴khiā踮戰旗下底，佇tong-tong-long-tong-tshiang的鑼鼓聲裡，征戰的號令好親像強欲衝破天kùa。欲暗，抗清民軍緊mé徙動跤步，彼暝in直透攻佔竿蓁林 汛塘 ，人掠厝拆，傢俬頭仔搶了了。
朱一貴4界出招跤手，khiā旗造反的消息傳到府城，台灣鎮總兵歐陽凱看in phú-phú，kan-na認定in是一陣放尿攪砂袂做堆的烏合之眾。隔轉工透早，差派鎮標右營游擊周應龍tshūa領400名兵眾，另外徵調新港、目加溜灣、蕭壠、麻豆四社平埔番鬥陣平亂。彼工，雨毛仔無時停，沿路tsiùnn-lo̍k-lo̍k，路糊糜仔tiâu鞋歹行路。周應龍部隊佇雨裡ná行ná歇，結局kan-na行5里路就佇半路店歇睏過暝。日頭閣一擺掛踮天頂，厝角鳥仔目睭peh金tsiú-tsiú叫的早時，周應龍部隊起跤行，這回kiám-tshái是前暝睏了有夠飽眠，in一睏頭ǹg東行15里路，行到二層行溪北pîng岸的角帶圍 tsiah安營歇睏。彼暝，朱一貴tshūa領幾lo̍h千名部眾，tng趁夜色攻入槺榔汛塘 ，把總張文學1看著烏影，走kah phùn 跤khing，朱一貴部隊ká-ná咧thui軟仔，輕車熟路取得濟濟傢俬頭仔佮ta糧。月娘吊佇半天kûan的時，周應龍部隊早就onn-onn睏，身魂走kah 13天地外去。
第二工，朱一貴部隊徙跤到小崗山，úa晝，清國軍佮in佇崁跤正面對敵。抗清民軍戰未曾2回合，就沿nā戰沿nā退入內山斗底。周應龍kiò是朱一貴部隊畏戰，隨時以飛鴿傳書向佇府城的總兵歐陽凱報告大勝。尚且傳令平埔番，便若刣抗清民軍１名賞銀3兩、刣頭目1名賞銀5兩，平埔番受煽動為錢貪功，沿路刣人放火，四界割人頭討賞銀。聽著風聲的在地民眾ta̍k家跤手尾phi̍h-phi̍h-tshuah，到遮來，辜不二三衷，若閣m̄拚絕對會孤mo tse̍h種。因為這個因端，抗清民軍1目nih仔滾絞到2萬外人。
4月27，清國軍沿路落南行到楠仔坑。Bat派人佮朱一貴參詳鬥出力ián倒清軍的杜君英手下兵眾，前1暝tú攻破清軍下淡水 營，搶盡兵器。周應龍聽著風聲驚膽lún命，號令部隊以退為進，走ká-ná飛。2工後，朱一貴佮杜君英2路部隊聯手佇赤山合攻周應龍部隊，清國軍可比對敵相tak輸勢的雞角仔，tshun無kah半絲仔元氣，千總陳元戰死，清軍tsiâu滅。周應龍看m̄是勢，起跤làng suan轉府城，朱一貴大軍沿路追殺，杜君英部隊se̍h huan頭攻佔鳳山縣治。這個坎站，二層行溪以南tsiâu落入抗清民軍手頭。
清國軍大敗的消息傳轉來府城，濟濟文武官員透暝làu-phâu過鹹水去澎湖。台灣鎮總兵歐陽凱緊mé調集水陸兵眾1500外人，屈守春牛埔，排好陣勢tng等朱一貴部隊入府城決一死戰。
中興王登基進前2日下晡，朱一貴佮王玉全佇暫設王府的道台衙門大廳參詳立國大業。朱一貴問王玉全：「賢弟，咱的勝利來kah tsiah-ni̍h趕狂，一切攏iau未備辦tsiâu-tsn̂g，kám必然ài佇2工後登基立國？」
王玉全微微仔笑：「回稟主公，5月初4是登基立國的良時吉日，早日安邦定國tsiah會當安tah浮動的民心。」
「既是安呢，咱的國號、年號、典章制度又閣如何是好？」朱一貴問。
「古早人講新例無設、舊例無滅。勝利來得過頭緊，典章制度袂得佇一夜之間建立，咱不如定國號大明，恢復明制、剪斷年尾仔 ；定年號永和，表示永世和平的意思。M̄過，主公佮文武官員的服裝就khah lóo khùi tio̍h力，搬請裁縫師傅趕製的確袂赴。現步極加thang向戲班借戲服thap額niā-niā。」王玉全直理直路回應。
朱一貴跋入記tî的深坳（o）大窟。伊m̄-nā m̄是正pān的大明皇室，反倒轉是純然的Siraya人。伊iau會記，3歲的時tùe老母Isip去大坑尾公廨，伊bat kí公廨內面的矸仔問：「Raren ，咱拜he矸仔是欲創siánn-mi̍h？」Isip總是會khû落來，用tîng-sûn的大蕊目睭掠伊看1下，順sùa用厚實的手蹄仔so伊的頭殼碗，笑笑仔講：「Wagi，he m̄是矸仔，he是咱的祖靈。後擺千萬m̄ thang亂sú kí，知否？」Mā bat佇秋裡的深更夜暝，踮庄頭的埕裡看一陣婦仁人身tha̍h素衣烏裙、手牽手雙跤跳輕快的舞步，喙裡唱好聽幼軟的歌聲。5歲綴老母ùi 大目降社搬徙到羅漢門，了後老母嫁人做後siū。Tsīng彼時起，伊tha̍h漢姓朱，Wagi mā改名一貴。潦落反清革命，自來m̄是為著孤家寡人彼款的皇室家業，伊全然kan-na想欲tháu放清國狗官界管之下百姓所受的不公不義。想到遮，朱一貴心肝tsiâu清，可比雲開見明月。
為著朱一貴登基佮文武官員的服裝，王玉全費盡苦心，差派人借phiàn府城內外所有戲班的戲服。M̄過，官員siunn過頭濟，就準講kā戲班的戲服借透透，衣冠猶原鬥袂ha̍h-su。所致造tsiânn朱一貴的登基大典，出現袂少頭戴明朝帽、身穿清朝衣的khue-hâi場面。
Su當時，朱一貴入府城為著安tah民心，頒布安民令，3吩咐4交代，嚴格禁止部屬做出刣人放火、強掠民女遮的袂見tsìng的歹代誌，違反命令者斬無赦。Siánn知，開天地以來所有惡質的人性，tsiah-ni̍h緊就現出原形。Kan-kan-a有人掠準伊是開國功臣，就會當靠勢為非sám做，無顧別人的死活。無偌久，國公戴穆強娶民女，雖罔伊是朱一貴手下的勇將，朱一貴講會到做會到，當眾人面前kā戴穆砍頭示眾；太師洪陣違反軍紀，朱一貴仝款無顧對方的面底皮，下令刣頭。眾人看著這款場面，知影朱一貴令出必行，m̄是tshín-tshái講講的，所致ta̍k家攏m̄敢閣假siáu，獨獨杜君英佮眾人無siâng。
本底，杜君英就認定抗清大軍會當順利進入府城，伊是掛頭名的功勞者，偏偏仔眾人hiah-ni̍h白目，袂曉看thàng伊的心腸，助伊sak in後生杜會三做王。開基大典彼工，朱一貴kan-na封伊國公的名號，伊規lān-pha火無tè thang消tháu，早就想欲tshūe機會報niáu鼠仔寃。這tsūn，杜君英靠勢伊手la̍k兵權，對戴穆、洪陣hông斬頭的下場，全然無tsùn-būn著。伊強掠7名婦女關踮府裡淫樂，內中1人tú好是國公吳外的親tsiânn，吳外tshūe伊討人，杜君英m̄-nā無應允，顛倒起phùi面，派兵追殺吳外。
吳外走kah頂khùi接袂著下khùi，緊mé拚來王府面報朱一貴。「可惡至極，」朱一貴氣kah頭殼頂tshìng煙，「杜君英刁意故欲挑戰本王的威信，親像這款有天無日頭、目睭生佇頭殼頂的匪類，一點仔都無資格thang統領部眾。」朱一貴當場差派平平客籍的楊來、林璉去苦勸杜君英，要求伊放回7名民女。無疑悟，杜君英見siàu轉受氣，去倒phah kā楊來、林璉2人關踮大牢。朱一貴hê-ku袂teh嗽，命令李勇、翁飛虎領兵逮捕杜君英。雙pîng人馬刣kah濛煙散霧，siah kah裂lông sàn甲，赤崁城跤紅色的血水san-san流。杜君英部隊佇朱一貴大軍圍攻之下，猛虎難敵猴群，杜君英tshūa領數萬客籍兵眾，ǹg北溜suan到虎尾溪，沿路tsiânn做刣人放火無所不至的土匪軍。
杜君英部隊1寡兵眾走轉來下淡水通風報信。5月初10，彼khoo圍仔13大庄、64小庄的客籍代表，聚集佇內埔媽祖宮連暝比接 ，眾人議定kā庄民組織做六堆部隊，參朱一貴大軍對siah，指揮總部設踮萬丹，tshāi「大清義民」旗號，計共12000外人。朱一貴輸人m̄輸陣，即刻派兵渡過下淡水溪，佇萬丹佮六堆部隊tú敵，sian想都想袂tshun，朱一貴部隊中計，受六堆部隊3面tsa̍h後尾路。進無步退無路的坎站，huan頭e-e-sak-sak tsông落下淡水溪，註死tú著水崩溪 ，朱軍死傷不計其數。六堆部隊sùa接追殺，朱軍tsiâu滅。
告 示
大兵登岸之日，家家戶戶書大清良民者，即為良民，一概不許妄殺。有能糾集鄉壯，殺賊來歸者，即為義民，將旌其功，以示鼓勵。凡擒朱一貴者受上賞，擒賊目者次之；獻都邑者上賞，獻營壘者次之。惟拒敵者殺無赦，倒戈退避，革面為農皆許之。
6月上旬，府城街頭巷尾hông偷偷仔貼滿告示。遮一簇、hia一簇的百姓圍踮告示頭前kí-kí-tu̍h-tu̍h，袂輸紙頭紙尾寫的字是金仔粉khōng的。論真，圍踮hia kí-kí-tu̍h-tu̍h的憨百姓，10個內底有9個9 m̄-bat字，看無究真是圓抑是扁。不而過，朱一貴的國師王玉全見著街頭巷尾的告示，目睭皮nih無停phi̍h-phi̍h-tshuah，隨時差派部屬便若看著告示，見1張liah 1張，見2張liah 1雙。
6月16天tú拆ha̍h，清國軍6百隻戰船直破進攻鹿耳門，福建水師提督施世驃佮廣東南澳鎮總兵藍廷珍，仝時攏佇船頂。彼日，鹿耳門鎮守蘇天威tshūa領兵眾ngē死守tiâu砲台。兩軍正面對敵強mé發射砲彈，海面這pîng射過來，海岸彼pîng隨反擊轉去，1 tah久仔濛煙散霧mua天khàm地，砲聲lìn-lòng哮，響phiàn附近幾lo̍h個庄頭。Ùi天tú拆ha̍h戰到欲úa晝，一直攻袂過手，藍廷珍gâu píng變kā施世驃建議相準砲台邊的火藥庫。Tsiânn實有影，清國軍ǹg火藥庫爆擊，規個天頂隨予熱赤的火焰染kah紅phà-phà，朱一貴的兵眾sîn著拳頭皮，彈kah骨肉離身血tshùann流，屍体tha̍h kah袂輸1座小山崙。蘇天威看m̄是勢，tshūa殘兵敗將棄守鹿耳門，ǹg安平城請求tánn-tsah 。註死，這時台江內海hiông-hiông tīnn流，清軍tng趁風勢kā戰船駛入安平港。雙方佇安平城跤戰kah血tshâm-tshâm流，朱營兵敗，安平城落入清軍手頭。
踮府城貼告示招安百姓，是藍廷珍向施世驃獻的計智。Khîng實，告示頂面的檄文是來自藍廷珍小弟藍鼎元的手筆。閣再講，原底施世驃主張ùi打狗進兵台灣，m̄過，藍廷珍想真打狗港無利便戰船起水。尚且，上陸了後欲ǹg北攻打府城，必然ài tsánn過百外里的無水田，沿路甘蔗林密tsiù-tsiù，萬不利朱一貴部隊暗伏sut後砲，恐驚會遭受大敗。施世驃目識巧用人精功，所致，今仔日tsiah有才調佔領安平城。
3工後，朱一貴加派幾lo̍h萬部眾反攻，ǹg望早日班師回轉安平城。兩軍佇二鯤鯓對敵，戰kah烏雲罩霧，朱一貴部隊手提盾牌，用牛車陣作頭lu，無顧火砲、炸藥，m̄驚死一直ǹg前衝，殺聲tsùn動天，使致清國軍死傷累累。藍廷珍見勢面危急，親身潦落phah派調度，指令火砲無làng縫連環齊發，舞規晡久tsiânn無簡單tsiah破解牛車陣。Sùa落，雙方真tú真刀劍近身，刣kah血sai-sai。落尾，朱一貴部眾退回岸邊ngē死屈守，2 pîng suah造tsiânn平tú thing 的勢面。
「啟稟主公，這當今安平城陷落清國軍的手頭，咱不如暫時退守諸羅山，等待風雲再起的時機。」國師王玉全kā朱一貴做暫退安居的建議。
「論真，tsit-má iau m̄是退守的時tsūn，」國公江國論自動請命，「我願意tshūa兵ùi西港仔siàn清軍的腹肚邊，西港仔khiā佇灣裡溪 出海口，離台灣府城無偌遠，沿路林投、竹刺ba̍t-tshah-tshah，利便咱暗伏sut後砲。若會得thang成功，我軍就m̄免暫退諸羅山。」
朱一貴接受江國論建議。Siánn知這個計策予清軍報馬仔攔tsa̍h，施世驃phah派藍廷珍兵分8路，kā朱一貴部隊4 khoo lián轉圍kah ba̍t-tsiù-tsiù。6月22天phah phú光，雙方大戰蘇厝甲 ，江國論看清軍士氣tng旺，1步1步逼úa嚨喉空，緊mé huan頭退守台灣府城。
Huan轉工，兩軍閣1擺正面對敵。這個流擺，朱一貴部隊的鬥志，袂輸離塗的花蕊雄雄lian-ta，予清軍phah kah倒籬顛táu，1路追殺到蔦松溪，逼近府城。朱一貴現看水強欲淹到鼻空口，親身mua戰甲tshūa領部將參清軍正面對tshiâng，拚盡帆猶原無法度kiāu清軍利劍劍的氣勢相tú手，激戰規半晡朱軍輸kah褪褲，辜不二衷棄守府城，ǹg北脫逃。
朱一貴部眾ǹg北脫逃，沿nā戰沿nā退，半途偷走兵佮投降對敵的，10個佔9個khah加。渡過灣裡溪的時，朱一貴看著黃昏的日頭映照溪水，暮色裡，早前tsàm跤會地動、絞動風雲的30萬大軍，如今只tshun千名殘兵敗將。堂堂6尺以上的英雄漢朱一貴，儘管穿tshah làu肩裂甲，猶原m̄願三聲無奈唱哭調仔。
閏6月初5，朱一貴部隊走到諸羅縣溝仔尾庄。舊底kiāu朱一貴熟sāi的庄民楊雄、楊旭刣豬屠羊好禮款待，尚且調集就近6庄頭漢草粗把的男丁，假仙假tak假影欲保護朱一貴，khîng實kha-tsiah後tsiânn做抓耙仔，暗靜密報清軍，想欲順趁半暝更深夜靜活掠朱一貴。彼暝，楊家兄弟ng-ng-iap-iap偷偷仔kā朱一貴部眾的大砲灌沙tsham水，suah尾砲仔聲、鑼鼓聲pin-pin-piàng-piàng，暗伏佇庄仔外的清軍做一下拚入來，朱一貴部眾面仔lek色，隨個啊隨個giān giān袂消kiān。暗頭仔予楊家兄弟灌酒phah茫的朱一貴，頭殼iau se̍h神se̍h神，3、2下手就予清國兵仔tshi̍h落塗跤兜，雙手綁iap後，押上牛車頂。
頭戴明朝冠，身穿清朝衣；五月稱永和，六月還康熙。
8月13 ji̍t時，規個台灣府城袂輸人間地獄。狡怪風、雄狂雨siàn kah厝瓦滿天飛。海湧倒頭灌，安平港裡的大小船隻碎骨分屍。透風khau倒路樹，牆崩厝倒，雷公sih-nà透暝tân無歇。施世驃的行營tsiâu毁，有人看見伊規暝khiā佇風雨裡，驚膽lún命，喙裡tsha̍uh-tsha̍uh唸。Suah尾，施世驃佇台灣府城僥倖死。民間風聲謗影，hán講施世驃的靈魂去予朱一貴掠交替。
8月初，北京城郊外的刑場4 khoo lián轉、重重tha̍h-tha̍h tsiâu官兵戒管。Mài講hìng看鬧熱的gōng百姓，就連半隻hô-sîn、báng-á tshah翅都飛袂過。午時三刻，風大透，秋裡的日頭走去藏。Khiā踮刑場中央，彼位6尺以上，雙手綁iap後，kha-tsiah-phiann插1枝待斬令牌，規身軀破sàm破sàm，頭毛散giâ-giâ，目kàng鬚tshàng袂輸監囚的人，就是清國朝廷的頭號戰犯朱一貴。3月日前，朱一貴差1 sut仔就kā台灣地舞kah變天，康熙恨袂得食伊的肉、khè伊的骨，特別指派上致意的四皇子胤禛 代表執行朱一貴死刑。行刑時間到，胤禛見朱一貴khiā-thîng-thîng m̄願雙跤跪地，即刻下令摃斷朱一貴的跤目，sùa接命令óo出伊的2蕊目睭。Tng當刀斧手欲óo朱一貴目睭的時，雄雄siàng大雨，雨水青狂siàng落來，直透phah佇朱一貴的面裡，伊的喙唇皮tam著鹹siam鹹siam的雨水，目裡看出去是1枝sùa 1枝的紅色雨箭，一直向伊射落來。Suah尾，胤禛下令1刀1刀ûn-ûn-á liô，kā朱一貴凌遲到死。計共，朱一貴受3357刀凌遲tsiah過khùi身亡。
Wagi憑伊茫茫渺渺的感覺，轉來大目降社九層嶺的故鄉。踮遮，伊ká-ná閣鼻著空氣裡玫瑰花的芳味，伊ká-ná閣看著用tsíng甲khàng會流紅色血珠的胭脂葉，iau有囡仔時老母Isip tshūa伊去祭拜祖靈的大坑尾公廨，庄頭埕斗1陣查某人手牽手雙跤跳輕快的舞步，喙裡唱好聽幼軟的歌聲。Wagi想欲tùe hia的查某人跤lāng手lāng，suah致覺家己雙跤踏袂tiâu地。目睭前1 phiàn烏影，一直tah úa來。
──2008.8.24寫佇赤崁米街
2008台灣文學獎創作類台語小說入圍
2009.7《台文戰線》第15號
牛車khok-lok-khok-lok，透暝ùi諸羅縣溝仔尾庄起行，沿牛稠溪1路ǹg南，這暝風透，岸邊規phiàn的菅芒予風siàn kah咻咻叫。押朱一貴遮的殘兵敗將的清國兵仔，隨個啊隨個寒kah ka-lún-sún。M̄過，暗頭仔予楊家兄弟灌酒phah茫的朱一貴，這時頭殼tsám-jiân-á清醒，往事1幕1幕浮出伊的腦海。
Wagi 5歲彼冬，tùe老母Isip ùi Siraya大目降社盤山過嶺遷徙來羅漢門。伊iau會記，in的田園厝宅m̄-nā予漢人láu-á 用1領鹿仔皮pián去，閣khah淒慘的是單純、古意的老爸，mā予láu-á tsau-that kah血崩山來離開這個苦情的世間。伊永久永久攏會記得，彼暗in 2母仔囝佇透風落雨的暝裡，包袱仔tshìn-tshái款款咧，連暝走路離開故鄉。伊永遠會記得，遮的畫面一直tiâu佇伊的頭殼底，m̄ bat放袂記。
Wagi tùe老母行幾lo̍h暝日，身軀無半sián所費，tshiâng在iau飢失頓，腹肚便若大腸告小腸，in就挽人種佇路邊的果子佮菜蔬止飢。1步1跤印，1步1滴汗，m̄知行幾暝日，in母仔囝來到山路坎坎坷坷，不止仔iap僻、山內斗底的羅漢門。Tshím來羅漢門的時，Isip參人做山穡，伊雖罔有Siraya查某人天生刻苦耐勞的本等，不而過，儘管伊逐工ùi透早做到透暗，mā kan-na勉強維持1家2粒頭喙的3 tǹg niā-niā。
無偌久，蹛佇羅漢門鴨母寮1位死某tú對年，號做朱旺的中年人。有1日經過Isip咧做山穡的所在，去予Isip sah著頂八卦。Isip 2蕊tîng-sûn的大目睭，烏甜súi啊烏甜súi的皮肉佮面模仔，予死某的朱旺看kah喙nūa水tshap-tshap津，尤其是伊久年勞動包佇粗布衫仔內面彼2粒thîng-thîng-thîng的奶，使得朱旺的下身強強欲tsih-tsat袂tiâu。朱旺央託媒人婆仔講親tsiânn、看好日，簡單備辦幾桌仔酒菜宴請庄裡的厝邊頭尾，歡頭喜面kā Isip ùi破草厝仔娶轉去伊搭佇鴨寮邊的土埆厝，Isip嫁人做後siū，Wagi tùe轎後踏入朱家的戶碇。朱旺嫌Isip佮Wagi的名番仔番pì-pà，咬舌歹hiàm，就kā Isip號漢名花，Wagi號漢名一貴。
朱旺佇鴨母寮飼鴨通人知，頂庄有名聲，下庄真出名。朱旺做人海派、朋友廣交，不時你兄我弟招招來鴨母寮食鴨肉配燒酒，三教九流攏thìng好tsiânn做座上客。一貴自7歲起，就tùe老母佮後叔參1大陣鴨仔pûann-núa感情，會使講袂輸死忠兼換帖的。講mā怪奇，一貴ta̍k日gia̍h 1枝kûan伊2倍長的竹竿咧趕鴨仔，m̄ bat聽伊喝thiám，伊叫鴨仔往東in就往東，hiàm in落南絕對m̄敢上北。無偌久，一貴就展現出領袖的氣質，tsiânn做庄裡的囡仔頭王。
朱旺lim酒m̄知thang準tsat，閣再加上操勞過度，佇一貴10歲跤兜suah來斷腦筋離開世間。自安呢，母仔囝相依為命，佳哉朱花giám-ngē，hūann起飼鴨家業閣有淡薄仔樣相。不而過，本名Isip的Siraya堅強女性朱花，mā佮朱旺仝款因為操勞過度，佇一貴18歲的時，無講無tànn來魂歸離恨天。
18歲的朱一貴，生tsiânn高tshiâng大漢，身kûan 6尺以上堂堂的查甫囝。Tsíng著老母2蕊tîng-sûn的大目睭，烏金tīng骨的皮肉。這時的伊，佇鴨母寮飼鴨早就通人知，頂庄有名聲，下庄真出名，一點仔都無輸予su當年的後叔朱旺。一貴做人phīng朱旺閣khah海派、廣交，làng暝無làng日，你兄我弟招招來鴨母寮食鴨肉配燒酒，三教九流攏thìng好tsiânn做座上客。伊1枝竹篙壓倒規陣鴨的功夫，天跤下無人thang比，ta̍k家心服口服hiàm伊「鴨母王」。
高tshiâng大漢、身kûan 6尺以上的朱一貴，雙手雙跤hông綁咧牛車頂，喙焦喉khuah，欲講偌艱苦就有偌艱苦。M̄過，好漢敢做敢擔當，伊心頭掠定，無hinn-hainn kah一聲半句，橫直頭伸出來是一刀，頭kiu入去mā是一刀，20冬後iau是英雄好漢。牛車khok-lok-khok-lok，ùi溝仔尾庄沿牛稠溪1路ǹg南，岸邊規phiàn的菅芒予風siàn kah咻咻叫。欲到八掌溪墘進前，雄雄hûa-a 1下，雨tshia桶倒，眾人bih無路。這個時tsūn，無論是領月俸的清國兵仔，抑是放某放囝hông綁咧牛車頂的落難好漢，天公伯仔對in攏無私無偏，隨個啊隨個沃kah澹漉漉、漉漉澹。朱一貴tann頭ǹg天，粗枝強mé的雨箭無時停，一點仔都無咧同情伊落難，一直射落來、一直射落來……，射著伊的面底皮，射thàng伊的筋骨，伊全然無tsùn-būn著，伊目睭展大蕊，ùi伊目裡看出去，看著1枝sùa 1枝的紅色雨箭，一直向伊射落來。
朱一貴目裡紅色的雨箭，無一tah-a久就斷點斷點。天tú phah-phú光，押送朱一貴等人的牛車陣，來到八掌溪墘下茄苳福建水師提督施世驃暫時安營的地場。施世驃是助清國滅鄭氏王朝的大功臣施琅的第6後生，受老爸致蔭，施琅死了後，康熙皇帝賞賜伊傳承福建水師提督的官位。坐佇營帳裡的施世驃老神在在，當伊看著khiā咧面頭前這位6尺以上、規身軀破sàm破sàm，頭毛散giâ-giâ，目kàng鬚tshàng袂輸監囚的人，伊隨ioh出對方是清國朝廷的頭號戰犯朱一貴。Ùi朱一貴展大的2蕊目睭裡，施世驃讀出一款m̄ bat看過的堅決意志，伊知影朱一貴m̄是普通的kioh-siàu。若無，欲ná有法度佇khah無半月日，箍úa 30萬群眾，佔領台灣、諸羅、鳳山一府三縣大phiàn的土地。施世驃心內暗靜咧想，設使今仔日伊參朱一貴m̄是對敵，kiám-tshái舖排佇目睭前的是英雄惜英雄、好漢疼好漢的場面。
伊激一個威嚴的面腔，對朱一貴歹聲嗽：「朱一貴，見著本官iau m̄跪落？朝廷對待百姓仁德深厚，是安怎恁欲khiā旗造反？你kám知罪？」
朱一貴目睭展大蕊jîn施世驃，「哈！哈！哈！」大笑三聲，「查甫囝跪天跪地、跪老爸佮娘lé，無跪恁遮的貪官污吏。設使康熙知影仁民惜物、造福百姓，我朱某人kám有才調出來khiā旗造反？Tsit-má落入恁的手頭，欲刣欲剮隨在恁。」
施世驃見siàu轉受氣，命令下跤手人gia̍h鐵鎚仔摃朱一貴雙pîng跤頭u，欲迫壓伊雙跤跪落地。儘管朱一貴雙跤血sai-sai，疼kah強欲siàm屎，伊猶原牙齒根咬咧，賭強徛在，無hainn kah半聲。施世驃看朱一貴不止仔膽漢，無hiah簡單落軟，隨下令：「即時將朱一貴佮其他反賊，押送北京城受審處置。」
透早tsha̍k人目的日頭光，照佇大天后宮面頭前的高台，廟埕前1陣厝角鳥仔踮hia tsiù-tsiù叫，這座高台是為著中興王朱一貴登基透暝趕工搭好勢的。吉時1到，khau鐘擂鼓，鐘鼓齊鳴，響亮tshang脆的聲傳phiàn赤崁城。朱一貴頭戴通天冠、身穿黃龍袍，威風凜凜，一步一hu̍ah peh上高台，伊四正四正坐佇頂kûan的王座，身軀邊是國師王玉全。朱一貴看ùi高台下底，文武官員按照太師、國公、將軍、都督、尚書……的順序排kah好勢好勢。廟埕四khoo lián轉好玄圍觀的百姓kheh kah tsat-thóng-thóng，厝邊頭尾的囡仔看著這款生目睭m̄ bat看過的場面，mā踮邊仔嘻嘻嘩嘩、跤lāng手lāng。
登基大典起鼓，國師王玉全大bú聲宣告：「大明國即日起立國，年號永和，立朱一貴做中興王。第一道禁令如下：凡淫掠百姓者，無論身分，一律就地正法。」王玉全宣告suah，文武官員雙跤跪地，面ǹg朱一貴齊聲huah：「吾王萬歲萬萬歲！」
這時，國公排頭名的杜君英ná想ná不服，規lān-pha火無tè 消tháu。伊目睭皮nih咧nih咧，目kàng鬚tshàng，袂giàn正眼看朱一貴。伊暗靜咧想：「朱一貴這khoo猴死囡仔，憑佗一條理路做王坐大位？」3工前，抗清大軍攻入台灣府城，客籍的杜君英自認是第一功勞者，siàu想欲立家己的後生杜會三為王，本人bih咧後壁面tsiânn做太上皇。M̄過，伊tiak的如意算盤予眾人phah亂阻擋，ta̍k家公推朱一貴做王。自彼tsūn起，杜君英滿腹怨恨，tiām落報niáu鼠仔冤的種籽。
實在講，抗清大軍的勝利袂輸秋風掃落葉，來kah hiông-kài-kài。3工前，對敵兩軍佇春牛埔 交戰幾lo̍h回合，ùi天tú拆ha̍h 戰到透中白晝，朱一貴tshūa領數萬兵眾，親像海湧1湧sùa 1湧溢入台灣府城。雙方刀光劍影，人聲馬聲齊聲hán huah，戰kah難分難解。無疑誤，清軍把總楊泰陣前hiông-hiông sái倒頭槌，1刀tu̍h向總兵歐陽凱，歐陽凱袂赴閃身跋落馬跤，朱一貴部眾做1下圍úa過，kā歐陽凱的頭tsûi落來。到遮，清軍大失敗，統領兵眾的總兵大人陣前人頭落地，phah輸走贏的兵眾死的死、逃的逃，1路跤底抹火油──溜suan到鹿耳門，坐幾lo̍h 10隻戰船敗走澎湖。事實上，台灣知府王珍佇朱一貴部隊iau未phah入府城進前，就偷偷仔suan去澎湖。這場大戰鬥了後，朱一貴的部隊1睏頭就絞kah超過30萬大軍。
清國官兵phah輸走贏，袂輸iap尾仔狗相sùa脫逃，朱一貴大軍無tú著siánn-mi̍h抵抗，順序進入台灣府城。當朱一貴的大軍進入城內，沿路雙pîng邊褪赤跤、穿草鞋、粗布衫跪地迎接王師的民眾khiā kah滿滿是。朱一貴為著安tah被兩軍相殺驚破膽的民心，代先頒布安民令，嚴格禁止部屬做出刣人放火、強掠民女等天地不容的代誌，違反命令者斬無赦。Sùa落phah開府庫、粟倉，kā庫銀、米糧分phenn予有功的部將佮散赤的低層民眾。安呢做，m̄-nā安tah驚惶的民心，mā予府城免除jû亂的危機。
隔轉工，抗清北路軍攻破諸羅縣治佳里興，清軍參將羅萬倉戰死，頭殼hông剁落來、tshiám咧竹竿頂，部隊大pān大pān、沿路送轉來府城獻予統帥朱一貴。到遮，台灣、諸羅、鳳山一府三縣大phiàn的土地，tsiâu落入朱一貴的手頭。這時，街裡風聲謗影，1喙傳1舌hán講鹿耳門外海浮出玉帶佮七星令旗，朱一貴部將認定這是天降聖人的吉兆，in隨時phah鑼摃鼓前往鹿耳門拜請玉帶、七星令旗轉來服sāi。講mā怪奇，當朱一貴的結拜兄弟李勇、吳外來到鹿耳門外海欲拜請玉帶、七星令旗的坎站，天無照甲子，雄雄hûa-a 1下，雨tshia桶倒，紅色的雨箭向in 2人一直射落來，使 in目睭一時thí袂金，等待拜請suah，雨停日出，一切照原。李勇、吳外順利kā玉帶、七星令旗請轉來朱營，獻予朱一貴，同時向伊報告鹿耳門外海玄奇的天象。朱一貴聽suah心情tsám-jiân-á定著，kan-na哈哈大笑。
春天尾，鳳山地界塗牛大翻身、海湧滾蛟龍，海水倒頭灌，造tsiânn民不聊生、活不如死、淒慘落魄的現象。埤仔頭 的百姓為著祈求庄仔內大細平安，ta̍k家公khui出錢搬請戲班登台謝神。戲台頂khin-khin-khiang-khiang，鑼鼓聲響phiàn規庄頭。台灣知府王珍接著報馬仔傳來這個消息，硬賴講是結拜兄弟密謀抗租造反，大肆ki一睏頭逮捕40外人，ùi死的摃倒轉來，隨個啊隨個尻川摃kah腫uainn-uainn，袂輸廳頭咧敬拜神明、公媽的麵龜。
王珍手提方子 （hong tsí）出力tǹg桌仔，逼問墾戶黃阿土口供：「堂下跪者何人？Iau m̄速速招來？」
黃阿土透世人m̄ bat看過tsiah-ni̍h大粒的大官虎，suah驚kah siàm尿，塗跤一pû tsiânn大pû，伊ná tshuah ná講：「啟稟大…大人，草…民…草民號做黃阿土，是埤仔頭的小…小墾戶。阮無彼個膽抗…抗租造反。M̄過…m̄過…」
王珍閣出力tǹg桌仔：「大膽刁民！M̄過安怎？」
黃阿土m̄敢tann頭看王珍，伊這回深深suh一口khùi，做一睏kā話講hoo透：「阮kan-na偷偷仔走去山頂剉樹仔niā-niā。」
王珍聽著有人偷剉樹仔m̄納租，氣kah規腹肚火無tè thang消tháu。另外，連暝閣派人掠百外個埤仔頭庄民，tsiâu-tsiâu刣頭，一律斬無赦。
Sùa落來，洲仔尾 大雨tshia桶倒，3暝3日落無歇，好親像天公伯仔欲做1擺kā伊的目屎流hoo焦仝款。佇海裡掠魚袂赴bih雨的漁民，佮蹛佇海墘仔的1陣散良人，攏有看著1 tsūn 1 tsūn的紅雨，一直落無歇。民間風聲謗影，hán講鄭成功的亡魂欲倒轉來報寃仇。Mā有人佇úa海邊的瀨口 看著一隻怪獸，踮大雨裡走tsông，落海了後過三鯤鯓上岸，閣ùi大井頭 nǹg入台江內海，出安平港了後走kah無影無跡。牠究真是海翁、鱷魚抑是水牛？無kah 1個人講會通透。
仝時，鳳山縣赤山地界的火山大爆發，裂開的空喙有8丈深、4丈闊，烏色的路糊糜仔一直溢出來，暗暝紅色的火光tshìng kah丈外kûan，燒氣hannh kah幾lo̍h里內無人敢úa近。
諸羅山mā hông hán講山崩地裂，山頂噴落來的塗沙，袂輸血水tshap-tshap滴。
若按四時節氣，照理講這個季節刺桐花該當大開，滿城紅kì-kì才tio̍h，m̄過，今年suah是無開kah 1蕊半蕊。
種種變天、玄奇的異象傳phiàn府城內外，lā kah規個民心亂tshau-tshau。世間事無奇不有，閣khah怪奇的代誌出現ā。有1日，1位穿tshah koh樣、離經的hûe尚，青pōng白pōng佇安平的街頭巷尾se̍h過來行過去。便若tú著人，就自稱是玄天上帝派伊來報知台灣人民，4月裡恐驚會歹星入境。「請問大師，欲安怎tsiah會當閃災避厄？」若有人安呢問hûe尚，伊一概應講：「時到日到，恁ài佇門口埕排設香案，」伊喙鬚摸2下，sùa落講：「用黃紙做細枝旗仔，頂面寫『帝令』2字，插踮香案裡，安呢自然thang消災解厄。」講suah， ná行喙裡ná唸：「天機不可露洩，天機不可露洩啊。」
公元1721年（清國康熙60年）4月19透中白晝，赤iānn的日頭光照佇羅漢門。朱一貴出招52位平素時仔信任會得過的死忠道友，佇鴨母寮煮酒祭拜天地、義結金蘭，tsiânn做異姓兄弟，為ián倒清國暴政phah死無退。雖罔，朱一貴m̄是會中歲頭上濟的，不而過，眾兄弟早就kā伊當做頭兄看待，ta̍k家順風駛船推sak伊tsiânn做盟主。
「各位兄弟，多謝ta̍k家無相棄嫌，推sak我朱某人tsiânn做盟主。」朱一貴倒手tah踮正手面頂，gia̍h到胸前，面對眾兄弟流露真情：「佇清國貪官污吏的界管之下，苦情的百姓早就民不聊生、活不如死。春裡，滿狗王珍心肝歪坦khi pîng，私偏伊的後生做鳳山縣令，爸囝2人狼狽為奸、為非sám做，已經造tsiânn天怒人怨，到kah天地不容的地步，tsit-má是咱兄弟ián倒滿狗、khiā旗造反的好時機。」
「盟主講得tsiânn tio̍h，」3工2頭tsia̍p來鴨母寮行踏的黃殿，接sùa朱一貴的話尾：「這tsūn是3千年1擺海漲，ián倒滿仔狗上好的時機，天時、地利、人和攏úa咱這pîng。盟主thang順勢宣稱是大明皇室的後嗣，只要gia̍h出反清復明的旗號，陪tùe的百民定著親像滾絞的海湧，1湧sùa 1湧。」
「黃兄，」朱一貴kā黃殿tah 1下肩胛頭，「若kan-na gia̍h反清復明的旗號，hūan勢只會當牽挽極其少數的人，咱tsim-tsiok kā想看māi，清狗界管之下的百姓，絕對多數攏是做穡、手面趁tsia̍h的艱苦人，先顧腹肚tsiah有才調顧佛祖，這條千古真理你我攏通徹。若盡靠反清復明這帖藥方，不如順應時勢gia̍h起 phah倒貪官污吏的旗號，刺激濟濟散赤的民眾投入抗暴除奸的隊伍，安呢，革命m̄ tsiah有píng phiat仔的可能。」朱一貴lim 1甌酒，sùa落講：「緊事袂當寬辦，用咱現此時的步數，四界去出招人結拜陪tùe。2日後午時三刻踮這個地場會齊。」
2日後午時三刻，鴨母寮kà-kà滾，短時間內ùi每1角勢聚集千外名、互相之間無在穩相bat的結拜兄弟。經過朱一貴簡單的調教，操兵點將了後，眾人剉竹仔做尖槍、綁旗幡，頂面用毛筆字寫「官逼民反」、「激變良民」、「大明重興」，數百枝旗幡仔予風siàn kah phia̍t-phia̍t叫。隊伍上頭到，翁飛虎手裡gia̍h 1枝極其大枝的戰旗，頂面「中興大元帥」的紅字，可比ta̍uh-ta̍uh-á斜西的日頭映照千外粒熱phut-phut的心肝。朱一貴khiā踮戰旗下底，佇tong-tong-long-tong-tshiang的鑼鼓聲裡，征戰的號令好親像強欲衝破天kùa。欲暗，抗清民軍緊mé徙動跤步，彼暝in直透攻佔竿蓁林 汛塘 ，人掠厝拆，傢俬頭仔搶了了。
朱一貴4界出招跤手，khiā旗造反的消息傳到府城，台灣鎮總兵歐陽凱看in phú-phú，kan-na認定in是一陣放尿攪砂袂做堆的烏合之眾。隔轉工透早，差派鎮標右營游擊周應龍tshūa領400名兵眾，另外徵調新港、目加溜灣、蕭壠、麻豆四社平埔番鬥陣平亂。彼工，雨毛仔無時停，沿路tsiùnn-lo̍k-lo̍k，路糊糜仔tiâu鞋歹行路。周應龍部隊佇雨裡ná行ná歇，結局kan-na行5里路就佇半路店歇睏過暝。日頭閣一擺掛踮天頂，厝角鳥仔目睭peh金tsiú-tsiú叫的早時，周應龍部隊起跤行，這回kiám-tshái是前暝睏了有夠飽眠，in一睏頭ǹg東行15里路，行到二層行溪北pîng岸的角帶圍 tsiah安營歇睏。彼暝，朱一貴tshūa領幾lo̍h千名部眾，tng趁夜色攻入槺榔汛塘 ，把總張文學1看著烏影，走kah phùn 跤khing，朱一貴部隊ká-ná咧thui軟仔，輕車熟路取得濟濟傢俬頭仔佮ta糧。月娘吊佇半天kûan的時，周應龍部隊早就onn-onn睏，身魂走kah 13天地外去。
第二工，朱一貴部隊徙跤到小崗山，úa晝，清國軍佮in佇崁跤正面對敵。抗清民軍戰未曾2回合，就沿nā戰沿nā退入內山斗底。周應龍kiò是朱一貴部隊畏戰，隨時以飛鴿傳書向佇府城的總兵歐陽凱報告大勝。尚且傳令平埔番，便若刣抗清民軍１名賞銀3兩、刣頭目1名賞銀5兩，平埔番受煽動為錢貪功，沿路刣人放火，四界割人頭討賞銀。聽著風聲的在地民眾ta̍k家跤手尾phi̍h-phi̍h-tshuah，到遮來，辜不二三衷，若閣m̄拚絕對會孤mo tse̍h種。因為這個因端，抗清民軍1目nih仔滾絞到2萬外人。
4月27，清國軍沿路落南行到楠仔坑。Bat派人佮朱一貴參詳鬥出力ián倒清軍的杜君英手下兵眾，前1暝tú攻破清軍下淡水 營，搶盡兵器。周應龍聽著風聲驚膽lún命，號令部隊以退為進，走ká-ná飛。2工後，朱一貴佮杜君英2路部隊聯手佇赤山合攻周應龍部隊，清國軍可比對敵相tak輸勢的雞角仔，tshun無kah半絲仔元氣，千總陳元戰死，清軍tsiâu滅。周應龍看m̄是勢，起跤làng suan轉府城，朱一貴大軍沿路追殺，杜君英部隊se̍h huan頭攻佔鳳山縣治。這個坎站，二層行溪以南tsiâu落入抗清民軍手頭。
清國軍大敗的消息傳轉來府城，濟濟文武官員透暝làu-phâu過鹹水去澎湖。台灣鎮總兵歐陽凱緊mé調集水陸兵眾1500外人，屈守春牛埔，排好陣勢tng等朱一貴部隊入府城決一死戰。
中興王登基進前2日下晡，朱一貴佮王玉全佇暫設王府的道台衙門大廳參詳立國大業。朱一貴問王玉全：「賢弟，咱的勝利來kah tsiah-ni̍h趕狂，一切攏iau未備辦tsiâu-tsn̂g，kám必然ài佇2工後登基立國？」
王玉全微微仔笑：「回稟主公，5月初4是登基立國的良時吉日，早日安邦定國tsiah會當安tah浮動的民心。」
「既是安呢，咱的國號、年號、典章制度又閣如何是好？」朱一貴問。
「古早人講新例無設、舊例無滅。勝利來得過頭緊，典章制度袂得佇一夜之間建立，咱不如定國號大明，恢復明制、剪斷年尾仔 ；定年號永和，表示永世和平的意思。M̄過，主公佮文武官員的服裝就khah lóo khùi tio̍h力，搬請裁縫師傅趕製的確袂赴。現步極加thang向戲班借戲服thap額niā-niā。」王玉全直理直路回應。
朱一貴跋入記tî的深坳（o）大窟。伊m̄-nā m̄是正pān的大明皇室，反倒轉是純然的Siraya人。伊iau會記，3歲的時tùe老母Isip去大坑尾公廨，伊bat kí公廨內面的矸仔問：「Raren ，咱拜he矸仔是欲創siánn-mi̍h？」Isip總是會khû落來，用tîng-sûn的大蕊目睭掠伊看1下，順sùa用厚實的手蹄仔so伊的頭殼碗，笑笑仔講：「Wagi，he m̄是矸仔，he是咱的祖靈。後擺千萬m̄ thang亂sú kí，知否？」Mā bat佇秋裡的深更夜暝，踮庄頭的埕裡看一陣婦仁人身tha̍h素衣烏裙、手牽手雙跤跳輕快的舞步，喙裡唱好聽幼軟的歌聲。5歲綴老母ùi 大目降社搬徙到羅漢門，了後老母嫁人做後siū。Tsīng彼時起，伊tha̍h漢姓朱，Wagi mā改名一貴。潦落反清革命，自來m̄是為著孤家寡人彼款的皇室家業，伊全然kan-na想欲tháu放清國狗官界管之下百姓所受的不公不義。想到遮，朱一貴心肝tsiâu清，可比雲開見明月。
為著朱一貴登基佮文武官員的服裝，王玉全費盡苦心，差派人借phiàn府城內外所有戲班的戲服。M̄過，官員siunn過頭濟，就準講kā戲班的戲服借透透，衣冠猶原鬥袂ha̍h-su。所致造tsiânn朱一貴的登基大典，出現袂少頭戴明朝帽、身穿清朝衣的khue-hâi場面。
Su當時，朱一貴入府城為著安tah民心，頒布安民令，3吩咐4交代，嚴格禁止部屬做出刣人放火、強掠民女遮的袂見tsìng的歹代誌，違反命令者斬無赦。Siánn知，開天地以來所有惡質的人性，tsiah-ni̍h緊就現出原形。Kan-kan-a有人掠準伊是開國功臣，就會當靠勢為非sám做，無顧別人的死活。無偌久，國公戴穆強娶民女，雖罔伊是朱一貴手下的勇將，朱一貴講會到做會到，當眾人面前kā戴穆砍頭示眾；太師洪陣違反軍紀，朱一貴仝款無顧對方的面底皮，下令刣頭。眾人看著這款場面，知影朱一貴令出必行，m̄是tshín-tshái講講的，所致ta̍k家攏m̄敢閣假siáu，獨獨杜君英佮眾人無siâng。
本底，杜君英就認定抗清大軍會當順利進入府城，伊是掛頭名的功勞者，偏偏仔眾人hiah-ni̍h白目，袂曉看thàng伊的心腸，助伊sak in後生杜會三做王。開基大典彼工，朱一貴kan-na封伊國公的名號，伊規lān-pha火無tè thang消tháu，早就想欲tshūe機會報niáu鼠仔寃。這tsūn，杜君英靠勢伊手la̍k兵權，對戴穆、洪陣hông斬頭的下場，全然無tsùn-būn著。伊強掠7名婦女關踮府裡淫樂，內中1人tú好是國公吳外的親tsiânn，吳外tshūe伊討人，杜君英m̄-nā無應允，顛倒起phùi面，派兵追殺吳外。
吳外走kah頂khùi接袂著下khùi，緊mé拚來王府面報朱一貴。「可惡至極，」朱一貴氣kah頭殼頂tshìng煙，「杜君英刁意故欲挑戰本王的威信，親像這款有天無日頭、目睭生佇頭殼頂的匪類，一點仔都無資格thang統領部眾。」朱一貴當場差派平平客籍的楊來、林璉去苦勸杜君英，要求伊放回7名民女。無疑悟，杜君英見siàu轉受氣，去倒phah kā楊來、林璉2人關踮大牢。朱一貴hê-ku袂teh嗽，命令李勇、翁飛虎領兵逮捕杜君英。雙pîng人馬刣kah濛煙散霧，siah kah裂lông sàn甲，赤崁城跤紅色的血水san-san流。杜君英部隊佇朱一貴大軍圍攻之下，猛虎難敵猴群，杜君英tshūa領數萬客籍兵眾，ǹg北溜suan到虎尾溪，沿路tsiânn做刣人放火無所不至的土匪軍。
杜君英部隊1寡兵眾走轉來下淡水通風報信。5月初10，彼khoo圍仔13大庄、64小庄的客籍代表，聚集佇內埔媽祖宮連暝比接 ，眾人議定kā庄民組織做六堆部隊，參朱一貴大軍對siah，指揮總部設踮萬丹，tshāi「大清義民」旗號，計共12000外人。朱一貴輸人m̄輸陣，即刻派兵渡過下淡水溪，佇萬丹佮六堆部隊tú敵，sian想都想袂tshun，朱一貴部隊中計，受六堆部隊3面tsa̍h後尾路。進無步退無路的坎站，huan頭e-e-sak-sak tsông落下淡水溪，註死tú著水崩溪 ，朱軍死傷不計其數。六堆部隊sùa接追殺，朱軍tsiâu滅。
告 示
大兵登岸之日，家家戶戶書大清良民者，即為良民，一概不許妄殺。有能糾集鄉壯，殺賊來歸者，即為義民，將旌其功，以示鼓勵。凡擒朱一貴者受上賞，擒賊目者次之；獻都邑者上賞，獻營壘者次之。惟拒敵者殺無赦，倒戈退避，革面為農皆許之。
6月上旬，府城街頭巷尾hông偷偷仔貼滿告示。遮一簇、hia一簇的百姓圍踮告示頭前kí-kí-tu̍h-tu̍h，袂輸紙頭紙尾寫的字是金仔粉khōng的。論真，圍踮hia kí-kí-tu̍h-tu̍h的憨百姓，10個內底有9個9 m̄-bat字，看無究真是圓抑是扁。不而過，朱一貴的國師王玉全見著街頭巷尾的告示，目睭皮nih無停phi̍h-phi̍h-tshuah，隨時差派部屬便若看著告示，見1張liah 1張，見2張liah 1雙。
6月16天tú拆ha̍h，清國軍6百隻戰船直破進攻鹿耳門，福建水師提督施世驃佮廣東南澳鎮總兵藍廷珍，仝時攏佇船頂。彼日，鹿耳門鎮守蘇天威tshūa領兵眾ngē死守tiâu砲台。兩軍正面對敵強mé發射砲彈，海面這pîng射過來，海岸彼pîng隨反擊轉去，1 tah久仔濛煙散霧mua天khàm地，砲聲lìn-lòng哮，響phiàn附近幾lo̍h個庄頭。Ùi天tú拆ha̍h戰到欲úa晝，一直攻袂過手，藍廷珍gâu píng變kā施世驃建議相準砲台邊的火藥庫。Tsiânn實有影，清國軍ǹg火藥庫爆擊，規個天頂隨予熱赤的火焰染kah紅phà-phà，朱一貴的兵眾sîn著拳頭皮，彈kah骨肉離身血tshùann流，屍体tha̍h kah袂輸1座小山崙。蘇天威看m̄是勢，tshūa殘兵敗將棄守鹿耳門，ǹg安平城請求tánn-tsah 。註死，這時台江內海hiông-hiông tīnn流，清軍tng趁風勢kā戰船駛入安平港。雙方佇安平城跤戰kah血tshâm-tshâm流，朱營兵敗，安平城落入清軍手頭。
踮府城貼告示招安百姓，是藍廷珍向施世驃獻的計智。Khîng實，告示頂面的檄文是來自藍廷珍小弟藍鼎元的手筆。閣再講，原底施世驃主張ùi打狗進兵台灣，m̄過，藍廷珍想真打狗港無利便戰船起水。尚且，上陸了後欲ǹg北攻打府城，必然ài tsánn過百外里的無水田，沿路甘蔗林密tsiù-tsiù，萬不利朱一貴部隊暗伏sut後砲，恐驚會遭受大敗。施世驃目識巧用人精功，所致，今仔日tsiah有才調佔領安平城。
3工後，朱一貴加派幾lo̍h萬部眾反攻，ǹg望早日班師回轉安平城。兩軍佇二鯤鯓對敵，戰kah烏雲罩霧，朱一貴部隊手提盾牌，用牛車陣作頭lu，無顧火砲、炸藥，m̄驚死一直ǹg前衝，殺聲tsùn動天，使致清國軍死傷累累。藍廷珍見勢面危急，親身潦落phah派調度，指令火砲無làng縫連環齊發，舞規晡久tsiânn無簡單tsiah破解牛車陣。Sùa落，雙方真tú真刀劍近身，刣kah血sai-sai。落尾，朱一貴部眾退回岸邊ngē死屈守，2 pîng suah造tsiânn平tú thing 的勢面。
「啟稟主公，這當今安平城陷落清國軍的手頭，咱不如暫時退守諸羅山，等待風雲再起的時機。」國師王玉全kā朱一貴做暫退安居的建議。
「論真，tsit-má iau m̄是退守的時tsūn，」國公江國論自動請命，「我願意tshūa兵ùi西港仔siàn清軍的腹肚邊，西港仔khiā佇灣裡溪 出海口，離台灣府城無偌遠，沿路林投、竹刺ba̍t-tshah-tshah，利便咱暗伏sut後砲。若會得thang成功，我軍就m̄免暫退諸羅山。」
朱一貴接受江國論建議。Siánn知這個計策予清軍報馬仔攔tsa̍h，施世驃phah派藍廷珍兵分8路，kā朱一貴部隊4 khoo lián轉圍kah ba̍t-tsiù-tsiù。6月22天phah phú光，雙方大戰蘇厝甲 ，江國論看清軍士氣tng旺，1步1步逼úa嚨喉空，緊mé huan頭退守台灣府城。
Huan轉工，兩軍閣1擺正面對敵。這個流擺，朱一貴部隊的鬥志，袂輸離塗的花蕊雄雄lian-ta，予清軍phah kah倒籬顛táu，1路追殺到蔦松溪，逼近府城。朱一貴現看水強欲淹到鼻空口，親身mua戰甲tshūa領部將參清軍正面對tshiâng，拚盡帆猶原無法度kiāu清軍利劍劍的氣勢相tú手，激戰規半晡朱軍輸kah褪褲，辜不二衷棄守府城，ǹg北脫逃。
朱一貴部眾ǹg北脫逃，沿nā戰沿nā退，半途偷走兵佮投降對敵的，10個佔9個khah加。渡過灣裡溪的時，朱一貴看著黃昏的日頭映照溪水，暮色裡，早前tsàm跤會地動、絞動風雲的30萬大軍，如今只tshun千名殘兵敗將。堂堂6尺以上的英雄漢朱一貴，儘管穿tshah làu肩裂甲，猶原m̄願三聲無奈唱哭調仔。
閏6月初5，朱一貴部隊走到諸羅縣溝仔尾庄。舊底kiāu朱一貴熟sāi的庄民楊雄、楊旭刣豬屠羊好禮款待，尚且調集就近6庄頭漢草粗把的男丁，假仙假tak假影欲保護朱一貴，khîng實kha-tsiah後tsiânn做抓耙仔，暗靜密報清軍，想欲順趁半暝更深夜靜活掠朱一貴。彼暝，楊家兄弟ng-ng-iap-iap偷偷仔kā朱一貴部眾的大砲灌沙tsham水，suah尾砲仔聲、鑼鼓聲pin-pin-piàng-piàng，暗伏佇庄仔外的清軍做一下拚入來，朱一貴部眾面仔lek色，隨個啊隨個giān giān袂消kiān。暗頭仔予楊家兄弟灌酒phah茫的朱一貴，頭殼iau se̍h神se̍h神，3、2下手就予清國兵仔tshi̍h落塗跤兜，雙手綁iap後，押上牛車頂。
頭戴明朝冠，身穿清朝衣；五月稱永和，六月還康熙。
8月13 ji̍t時，規個台灣府城袂輸人間地獄。狡怪風、雄狂雨siàn kah厝瓦滿天飛。海湧倒頭灌，安平港裡的大小船隻碎骨分屍。透風khau倒路樹，牆崩厝倒，雷公sih-nà透暝tân無歇。施世驃的行營tsiâu毁，有人看見伊規暝khiā佇風雨裡，驚膽lún命，喙裡tsha̍uh-tsha̍uh唸。Suah尾，施世驃佇台灣府城僥倖死。民間風聲謗影，hán講施世驃的靈魂去予朱一貴掠交替。
8月初，北京城郊外的刑場4 khoo lián轉、重重tha̍h-tha̍h tsiâu官兵戒管。Mài講hìng看鬧熱的gōng百姓，就連半隻hô-sîn、báng-á tshah翅都飛袂過。午時三刻，風大透，秋裡的日頭走去藏。Khiā踮刑場中央，彼位6尺以上，雙手綁iap後，kha-tsiah-phiann插1枝待斬令牌，規身軀破sàm破sàm，頭毛散giâ-giâ，目kàng鬚tshàng袂輸監囚的人，就是清國朝廷的頭號戰犯朱一貴。3月日前，朱一貴差1 sut仔就kā台灣地舞kah變天，康熙恨袂得食伊的肉、khè伊的骨，特別指派上致意的四皇子胤禛 代表執行朱一貴死刑。行刑時間到，胤禛見朱一貴khiā-thîng-thîng m̄願雙跤跪地，即刻下令摃斷朱一貴的跤目，sùa接命令óo出伊的2蕊目睭。Tng當刀斧手欲óo朱一貴目睭的時，雄雄siàng大雨，雨水青狂siàng落來，直透phah佇朱一貴的面裡，伊的喙唇皮tam著鹹siam鹹siam的雨水，目裡看出去是1枝sùa 1枝的紅色雨箭，一直向伊射落來。Suah尾，胤禛下令1刀1刀ûn-ûn-á liô，kā朱一貴凌遲到死。計共，朱一貴受3357刀凌遲tsiah過khùi身亡。
Wagi憑伊茫茫渺渺的感覺，轉來大目降社九層嶺的故鄉。踮遮，伊ká-ná閣鼻著空氣裡玫瑰花的芳味，伊ká-ná閣看著用tsíng甲khàng會流紅色血珠的胭脂葉，iau有囡仔時老母Isip tshūa伊去祭拜祖靈的大坑尾公廨，庄頭埕斗1陣查某人手牽手雙跤跳輕快的舞步，喙裡唱好聽幼軟的歌聲。Wagi想欲tùe hia的查某人跤lāng手lāng，suah致覺家己雙跤踏袂tiâu地。目睭前1 phiàn烏影，一直tah úa來。
──2008.8.24寫佇赤崁米街
2008台灣文學獎創作類台語小說入圍
2009.7《台文戰線》第15號
-
胡長松在2:17pm對2009 九月 3的評論
-
針對這篇小說我有幾條筆記記佇下底:
1. 朱一貴敢是平埔? 重點毋是「是／毋是」，重點是作者是按怎欲按呢安排？
2. 大清kap日本的歷史冊按怎寫朱一貴？（我手頭有揣過資料, 另日再來貼）
3. 杜君英的反背影響究竟有偌大？意義是啥？
4. 敘事觀點有跳接, 比如第1-4段是位朱一貴的觀點, 5-8是位全知的觀點, 若毋是有意的, 可能要細膩, 若是有意的, 可能顛倒要閣強調這个變換的安排.......
意見
您必須是成員才能發表評論！
加入 台文戰線聯盟