行踏佇西拉雅小路的春天

[胡長松]

春天時，拄好胡民祥兄位米國轉來佇台灣，彼日，一群文友就相約佇虎頭埤見面行春。環虎頭埤外圍有一條小路，佇草埔、日光佮樹蔭之間起起落落彎彎曲曲，一行人有民祥兄、耀乾兄、金順兄、文平兄、秋白兄翁仔某佮囡仔、德本兄、雪花姊佮阮兜的四个人，大人囡仔大大細細各人踏一台鐵馬，若開講若騎進前，事實嘛真有田園詩的心情。中途阮佇一間佛寺的大埕小歇的時，講起日本有一條「奧之細道」，怹出名的文學家松尾芭蕉時常佇奧州小山路散步，文章傳世，才予小路成做日本有名的文學大路。「日月乃百代之過客，去閣再來的舊歲新年也是旅人。」雖然佇這島國熱情的春天，oh得揣有松尾芭蕉氏北國特有的漂泊空靈之思，不過，阮講，咱嘛通予環虎頭埤的這條有芳味的路，成做台灣的「奧之細道」。詩人德本兄提議，這个所在，抵好是咱西拉雅祖先的居地，規氣共西拉雅借名，兼有歷史的意義，衆人攏讚聲應好。春天百花開，日光下的鳥聲處處，有眾台語詩人的呵咾，這條路，就是咱台灣上有味的「西拉雅小路」矣。

講無漂泊之思，事實嘛毋是完全著的。虎頭埤附近有舊地號名號做「知母義」，是過去Siraya平埔名Tivalukang的借音，意思是「佇竹林地」，照講愛譯做「竹林社」才是尚正確。我的故鄉佇高雄打狗，Takao嘛是馬卡道族的竹林。按呢算起來，我是位馬卡道的竹林社來到這个西拉雅的竹林社作客的，二个竹林社經過百代日月過客的跤跡，今tshun啥物？行過想像的四百年，我的漂泊之思，想著，煞是平埔歷史的目屎矣。其實我真想欲假若大旅行家仝款，佇這條春天的小路揣著一種屬佇個人的詩意的體驗，漂游去到彼个時空，想像過去的人生活食穿的一切佮怹講話的鄉音，毋過這个想像猶是欠缺資料的肥底，難免是冇的，你看，被殖民族群的悲哀就是按呢敢毋是？近來，平埔族群的自我覺醒有真大的進步，族群運動是誠活潑的（佇我寫稿的時，拄好看著聯合國受理台灣平埔原住民控告中華民國政府的記者會），其中台南縣的西拉雅文化協會就是代表，怹就佇虎頭埤東爿的九層嶺。阮落尾特別去拜訪怹，見著協會的理事長Uma Talavan (萬淑娟)女士佮伊的老爸萬長老。位怹的言談，我感覺著一款族群生湠的信心，嘛綴咧歡喜起來──只是，翻頭一想，阿阮打狗社的馬卡道咧？

我的故鄉內惟社就佇打狗山東爿的山跤，根據史冊《台灣府志》引〈陳少崖外記〉：「明都督俞大猷討海寇林道乾，道乾戰敗，艤舟打鼓山下，恐復來攻，掠山下土番殺之，取其血和灰以固舟，餘番走阿猴林社。」打狗山的打狗社就是按呢失去影跡的，今只偆小溪貝塚閣留佇打狗山的東爿山埔，這，就假若幾百年的生活佮感情的實體，攏佇侵略者的喝喊裡啞口去矣！抑是怹的形影，經過歷史的淘洗，已經完全透濫佇過去的侵略者的血脈內底矣？漂游之中，我失落矣，假若聽見著馬卡道祖先咧共我呼喊，這个漂游，講到底，已經完全揣無松尾芭蕉的嫻雅、淡遠、空靈矣，遂只tshun族群自我走揣的重量矣！

走揣是為著轉去家己的厝，走揣是為著回鄉。佇這條西拉雅小路，騎鐵馬一步一步踏過，小山崙、草埔、土溝、竹抱、雜樹林、一抱過一抱的草花、茄苳佮樟仔樹，是福摩沙島南四常的景緻，平埔的祖先仔，怹是按怎看這故鄉的一切？我感覺家己親像《奧德賽》內面彼个迷路的奧德修斯。離鄉佇特洛伊的戰爭結束，漂游10年的希臘將軍奧德修斯佇回鄉的半途迷失去，只好到土底地府去問先知Tiresias，才閣重新揣著方向。

以色列人嘛有類似的故事。以色列人因為飢荒，離開故鄉去夠埃及，400幾年了後，怹完全變做埃及人的奴隸，有一日以色列子孫摩西佇何烈山看著荊棘焚而不燬的異象，上帝用異象向伊顯明，漂流佇埃及草賤親像荊棘的以色列人，雖然經過400年異邦人奴役的火燒考驗，猶是袂燒hu去；上帝共摩西講，祂會領以色列人出埃及，倒轉去怹祖先亞伯拉罕的所在迦南。

族群遷徙的故事、經過流亡回鄉，這是各族群神話的母題，牽涉侵略佮被侵略、殖民佮被殖民，發生佇台灣的，是其中較複雜的例。對消失的台灣平埔族群來講，血脈透濫佇侵略者的血脈裡，在地流亡、記置融失，台灣，同時是平埔的特洛伊嘛是希臘，同時是平埔的埃及嘛是迦南。這是台灣智識份子佮詩人尚大的挑戰。

假使是一个失去語言、失去生活實體的族群，故鄉會佇佗位？日頭下，西拉雅小路的景致，看起來是孰似的，卻又閣是生份的，風刮過，落佇土跤的黃色野花佇光顯的路裡真無得定，閣加重這个生份感。佇西拉雅內面走揣西拉雅，佇春天內面走揣春天，這是一代平埔作家的寫照。我猶原欲相信，阮行踏佇西拉雅小路的春天，春天嘛當行踏佇西拉雅的小路。因為，若毋是按呢相信，一切的文字，就攏無意義去。

早起踅虎頭埤一輦，拜訪過Uma的綠谷，民祥兄招待眾人吃土雞，續落佇虎頭埤畔耀乾兄新置的別莊泡茶開講，文友之間互相勉勵，溫情位西拉雅小路湠到規厝間，沓沓仔轉做暫時歇睏的清爽，親像樹跤過晝的涼風。

在 台文戰線聯盟 上面找更多類似的相片

[顏雪花Catherine Yen]

長松，我 kah這篇文章送ho IBM老同事Gary Lin, 伊是ITTS顧問公司的創辦人，我介紹伊真濟 Siraya的故事、網站、萬淑娟和這碼佇聯合國奮鬥平浦身份的代誌等等，伊準備成大校友佇台南舉行時，參訪西拉雅有關的所在，伊感覺台灣人毋知這e代誌是一種遺憾。

[胡長松]

多謝顏姊無棄嫌轉寄，確實，熟似西拉雅對台灣人的自我認同來講是真有意義的一步，至少是一个真好的刺激。

[凃妙沂]

麻煩長松把上篇不妥當的留言刪除,多謝你!好書是不會寂寞的,拍拼的創作者是不會寂寞的,好的小說會被拍成電影,讓更多人認識自己的歷史文化,好小說是多麼重要!相信收到你的書的文友會很高興!

[胡長松]

添一寡相片....