台文戰線聯盟

佇我的母校「新興國小」的「晨光約會」(2011.4.27)

各位小朋友逐家好、逐家早安!

我是李秀,60冬前我就是佇咱的學校「新興國小」畢業的,哇!60冬!對逐家來講親像天文數字,我的後生蘇恩聖30冬前嘛佇遮畢業的。目前阮蹛佇加拿大,每冬攏會轉來故鄉高雄,阮所蹛的厝抵好佇咱學校的隔壁,甘單一個牆仔隔開爾爾。透早透暗我攏愛來咱學校的運動埕褪赤腳佇草埔頂行路散步、想代誌,我袂少的作品就是按呢產生的。每一工我攏會予咱學校的摃鐘叫醒,親像小漢的時我予阿爸阿母叫醒仝款,啊!新興真正是咱兜!

今仔日拜三是咱學校講台語的日子,咱是台灣人會曉講國語以外,當然嘛愛會曉講家己的母語---台語才對。誠歡喜來我的母校,讀我的台語兒童詩分享予逐家。母親節即馬到矣,生活的精彩佮快樂就是有機會用任何形式來表達咱的愛。其實欲表達愛,毋是甘單佇母親節的日子爾爾,應該是無時無刻,攏會當表示對父母的愛才對。

5月初5咱學校欲舉辦母親節的活動,彼个時陣除了演唱黃友棣教授為我譜的中文童詩「愛之歌」以外,閣欲唸兩首台文、英文的童詩。阿媽學長即馬來教遂家唸,予同學們感受阿母的愛不時攏佇咱的身軀邊,到時遂家就會當表演予父母看矣。

1. 第一首是「一欉小花蕊」(030頁)---這首詩強調母親的恩情,無論咱按怎予人欺侮蹧踢,阿母永遠是咱的靠山。詩內底有講著阿母導日頭來看伊,日頭佇這個地球有賴長,阿母的愛就有賴長。

2. 第二首是「佮阿母買物」(054頁)---這是母親對囝兒無形的愛,伊袂隨便買家己所愛的物,但是伊會買囝兒所佮意的物件。

檢視次數: 65

顏雪花Catherine Yen在11:39am對2011 四月 27的評論
台語文學界愛學你的積極佮推廣的精神,高雄市政府既然已經佇美濃四間學校用客語全然教學,為什麼台語無按呢做?今日(4/27)自由時報A8版報導,閩南語課程be納入師資的培育,無論如何有開始即是好代誌。

意見

您必須是成員才能發表評論!

加入 台文戰線聯盟

© 2019   Created by 胡長松.   管理小組

成員徽章  |  報告問題  |  服務條款