日子的色水

[李秀]

佇日子告一段落的時

算看覓過去日子的色水

上合意的物件，攏被服侍佇上懸的所在

上討厭的垃圾，隨時纒綴佇身軀頂面

過去的日子，親像太空梭咧飛徙

未來的日子，親像老人咧騎跤踏車

車牌仔跤等公車，攏是對面的車先來

這世人上驚狗仔，攏有兇蓋蓋的狗向我衝來

別人破重病倒咧，攏無家己倒佇病床赫沉重

別人拼命咧生囝，攏無家己生產的拆腹裂骨

愛我的人，損我傷深

無愛的人，愛我傷濟

日子的色水，千算都算袂了

但是汝會當看著我的傷痕

知影我受傷過，嘛捌醫好過

[王立信]

阮思想，阮猶活咧，安呢阮感謝主。
阮受傷，阮嘛醫好，阮嗎是感謝主。
予人惜，阮足幸福，阮福氣夠毋知。
車牌仔跤等公車，攏是對面的車先來。
無定著有人落車，是汝日冥思念，聽候誠久兮人。
佳哉！上好兮茶心；猶佇見本櫥匟佮好勢好勢。

[李秀]

這首是臨時起意好耍的小詩, 彼時當咧佮柏榮佇網路講話, 完成一項代誌了後，想講欲輕鬆一下 嘛有可能予胡長松彼首對比好耍的詩「數」的影響, 所寫出來的物件.
是呀, 我欲感謝的代誌愈算袂了, 我這个愛海的澎湖女子, 嘛柱好位naked beach游泳轉來, 我是袂當像我的朋友赫開放, 但是我這个有穿游泳衫佇海中小數的人, 誠欣羡in的裸体無拘無束参大海攬抱, 畢竟東方佮西方的人是無仝的.
汝的澎湖腔, 最近我有forward予澎湖文化局, in當咧幫我揣電台, 以後就無咱的代誌了, 我只是提供一項文學的推動而已爾爾.
佇另外一个網路, 我欣賞恁(宋.胡…)的對話, 佇這个五花十色的世間, 赫是一个會富歇喘、清涼…的所在. 感謝主!