【詩】嫷面

[胡長松]

嫷面


毋是因為面無嫷才拆破
根底就毋是相黏的面
你的目睭tsīng出世就生佇遐
無生佇伊的目眉下

毋是因為知影袂死才敢倒落去睏
是因為相信
上帝猶未欲接你去

你猶未予伊拆破的嫷面嘛是按呢

毋是因為面嫷才無拆破
是因為猶有相信
才會當做永遠
袂破

你的面若無整做佮伊一模一樣無宛二體
你早慢嘛是愛死

[李秀]

"那裏"的臺文原來可以這樣寫"hia".

[浪人陳建成]

若單獨講寫作選詞的範圍，這嘛凸顯出台語書寫進入文學階段的過程中，一個真心適的問題。

「無宛二體」這個例，我猜測包括我家己在內，應該是台文創作者時常會拄著的情形。真濟類似的狀況無浮出來檯面討論，是因為作者佇創作的過程中，已經先佇家己的頭殼內有所協調矣。

以我的成長環境來講，民間的互動當中並無用著台語文字，個人學習台語的管道一般來自周邊的環境。生活口語的傳播比較上較無特殊的「隔閡」問題，其中個人「額外」吸收著的一寡仔特殊影響，比如，有的人生活環境中和漢學仔先生、布袋戲團、歌仔戲團、走江湖的王祿仔…等等，時常接觸互動，或者特別有興趣，毋是生活口語的詞句嘛已經不知不覺透濫內化，嘛可能連帶影響著周邊的人。平常時在家己生活的圈子內無一定會感覺著，但是一旦書寫文學作品的時，尤其牽涉著文意內容的協調性，「差異性」就凸顯出來。

「無宛二體」這個詞，我猜測對長松兄來講，應該是連結熟悉的生活經驗，內化成頭殼中深層的記錄符號，並無白話佮文言一般認知上的差距，就算伊家己先經過內部複雜的機制演練、協調了後，猶原嘛是感覺是尚符合家己意思的詞。

伊選擇欲使用，若以另外一個角度來思考，其實佮咱選擇使用母語表達的信念是相同的，因為這對長松兄毋止是族群的母語，是來自血親查某祖傳落來的，正港的母語中的母語。所以伊雖然願意妥協遵從大家的看法，嘛是毋甘放棄，試欲替查某祖留予伊的「物件」講情。

我只是對現階段台語文學，包括我家己嘛有拄著的問題，提出個人的看法予大家做參考而已，取捨之間，見仁見智。

[胡長松]

考慮過就其實無遮歹[取捨], 因為閣有其他的場合(比如小說)會用tsit. 不過建成兄講的, 的確就是每一个母語作家愛想的代誌, 也就是阿本兄建議的時我所智覺著的現象.

[施俊州]

長松 in 祖--a lóng sái（使）話母「無宛二體」。Ah gún 阿媽，大正第二年出世--ê，古早時代（1970s）leh 看《五燈獎》（我是阿公、阿媽捏大--ê，lóng tuè tī 邊 á leh 看），若 tú-tio̍h 參賽者無 ha̍h 伊 ê 意，lóng mā kā 人 phì-siùⁿ（譬 ∕ 鄙相）講：「Ah tsit-ê『消毒』！」問過足 tsē 人，lóng 無 án-ne īng。

消毒：唱了有夠 bái ê bái，bē 孝孤--tsit ê 意思。

[胡長松]

哈哈，俊州的分享趣味。消毒就是無毒，聽了袂giàn(癮)袂中毒，bái聽就著啦！

[Voyu Taokara Lâu]

按呢我跳出來投「....一模一樣無宛二體」一票，因為 tse 內底 koh 有數字 teh 排比：「一」「一」「二」，真有詩 ê 氣味。

ps. 若有人 teh 簽牌，sian 毋通誤會攏走去簽 112 XD