被出賣的台灣

[陳金順]

　　今暗（2010.7.20），熱人無界漚歙的暗暝。參耀乾兄去台南華納威秀電影院看電影「被出賣的台灣」試映會。這齣電影是由美國籍台灣人刁毓能所製作的，是一齣融合美麗島事件、陳文成事件佮江南事件改編的白色恐怖電影。規齣電影自頭到尾攏無冷場，會使講是具備標準好萊塢技術面的電影，無論規個情節的鋪排、電影鏡頭的運用抑是剪接攏有水準以上的表現。其中，較可惜的欠點，除了濟濟電影場景是佇泰國所拍的以外，就是內中演員所講的台語佮華語較袂輪轉。內面的主角是一位美國FBI的探員，為著欲調查佇美國的台灣人教授被殺害的證據，飛來台灣實際調查拄著一寡伊原底料想袂到的代誌，到遮伊才知影彼陣的台灣根本毋是一個自由、民主的所在。當該然，這齣電影上界大的意義，是伊將台灣白色恐怖時期的現實面表現出來，儘管伊有淡薄仔無鬥搭的所在；總是，並無損害規齣電影的價值。向望8月初6起，全台灣的鄉親阿母招阿爸、阿姊招阿兄、厝邊招隔壁，手牽手作陣去各地的戲園觀看這齣對台灣人有特殊意義的好電影「被出賣的台灣」。

[顏雪花Catherine Yen]

The Betrayed Taiwan, 阮等這齣電影規半冬啊，感謝金順的介紹kap提醒。

[顏雪花Catherine Yen]

佇自由時報論壇看到金順寫有關「被出賣的台灣」的報導，已經用e-mail傳hoo足濟好朋友。

[陳金順]

多謝雪花姊推薦，昨暗報社敲電話予我，問伊啥物時陣刊？講時到會通知，想袂到今仔早起就刊出來。

[顏雪花Catherine Yen]

我送e-mail ho 百規位朋友，尤其台北IBM的同事講伊等足久啊！多謝！
學位已經提著，有時間來高雄坐！