台文戰線聯盟

接著開會通知,地點是澎湖,心湖開始澎湃滾絞。我將通知單真細膩收入去皮包內底,親像一件寶貝仝款每日陪伴我快樂上、下班。快樂的後壁,有一份感謝,感謝頂司予我有這个參加開會的機會,續落來,我會當踏入彼个思思念念的所在---外垵---父母生長的故鄉。

有人講:「攏予李秀騙甲東倒西歪,講啥物澎湖有偌媠,其實澎湖一點都無好耍,予東北季風搧甲悽慘落魄。」一所在有好蹉跎無,每一个人的感受攏無仝。我嘛去過幾若遍,毋過,每一遍的感受,親像棧梯,一層一層愈懸愈媠,甚至閣變做藏鏡人,不時攀纏著我。

若臺灣起西北風,我攏想講家己是佇澎湖離島;抑若看著人家厝的裝台一支一支竹篙頂隨風飄搖的衫褲,我就會共伊想做是澎湖古厝埕斗曝衫的景緻;有時大日頭腳衝出來的臭臊味,我隨想著澎湖遐一尾一尾躺佇低厝仔咾咕石頂的魷魚干;閣有一群一群貼佇海面飛來飛去的海鳥算攏算袂清的記持,時常像五月花佇心肝窟仔吐清芳。

為啥物我有這款感覺,因為澎湖有我父母的腳跡,好親像若想著伊,就會當掠著離我真遠的母親一寡仔丰采,就算聽著彼種特別的澎湖腔口,嘛會當予in查某囝數念袂停。頭遍去澎湖,是我高中畢業彼年,母親導(tshua7)我轉去。因為坐船坐傷久,眩船眩甲車輾斗,掠兔仔掠甲半小死,雖然倒佇伊的手抱內,據在伊按怎安貼,我猶原無法度減輕眩船的痛苦。我枵飽吵講以後絕對無愛閣來這款垃圾所在,去一澎湖就愛按呢受苦受難,規畷路伊有嘴講甲無瀾,親像家鄉佇澎湖攏是伊的毋著。

厝內我是尾仔囝,有四个兄哥,李家三代傳落來,攏是查甫囝,干單阿母上有才調,生出一个查某囝來,伊嘛時常以我為榮耀,講來我是嬌生慣養。

佇我的記持內,第一擺去澎湖蹉跎一點仔都無好耍。你想看覓,一个所在無自來水、無電火,胡蠅、虼蠽ka-tsuah8)滿四界。去一便所,我的細胞就死誠濟,因為跍偌久,我的喘氣就愛停偌久。續落來,閣有彼款褪赤腳踏佇澹漉漉的路糊仔麋的一陣人煞愛我叫in啥物「阿嬸仔」、「實在有夠厭氣。不止按呢,自細漢見若看著有皮的豬肉就想欲吐,偏偏每一頓in的飯桌仔,攏有這款菜色

總講一句,一切我拄著的代誌,無一項是我合意的。隨在一群熱情的親情朋友按怎弄我歡喜,我猶原歡喜袂起來,誠實是一个爽勢的大小姐。村民不但無棄嫌我,閣替我揣藉口,講我是水土袂合,莫怪會無爽快,定定轉來澎湖就慣勢矣。阿母本底按算欲蹛一禮拜,予我吵一下煞三工就翻頭轉去高雄矣。

我講這是我上無快樂的一遍旅行,阿母嘛講以後無愛閣揣我轉去故鄉。誠實的,伊真正無閣陪伴我去澎湖外垵。因為兩年後,伊家已一人去一叫人斷腸心酸的所在。

不而過,伊敢知影,即馬,這幾十冬以來,予我上思念、上透心刻骨的旅行,就是彼遍我感覺誠無爽快隔山過水的澎湖行。

阿母!汝即馬佇天頂彼爿,一定會當來去自如,抑若我,這一世人上界欣羨的向望,就是汝會當閣導我轉去外垵行一畷

位阿爸退休了後,阮每冬攏會轉去一遍。每遍隨著經濟繁榮,就有無仝的風貌,可能有變較進步,但是我親像失落啥物真實寶貴的物件,淡志失望。因為我總是向望揣著第一遍佮母親去的時陣的人佮事物。當時一點仔都毋知珍惜,如今閣拼生命去網掠,我就是這款無站節閣無路用的人!

論真講來,澎湖對我有足濟的感情,所以接著開會的通知,親像接著聖旨仝款,莊嚴閣歡喜。頂遍去澎湖,是三年前的代誌。三年矣,伊毋知變做啥款?飛龍機降落佇曠闊的馬宮機場,行佇停機坪頂,強力的西北風吹來,好親像母親熱情的攬抱,我深深呼吸這款透心腹的氣氛。

位機場到市區,有寬闊平坦的公路,兩爿的木麻黃樹叢,牽出一望無際的大海,荒涼閣淒美,親像阿母隨時攏會出現佇我的眼前。招待人員共阮導入華麗的飯店,我將行李囥佇土腳,趕緊倚窗仔遠遠看向街仔路,向望即時會當揣著我熟似的形影。眞的,汝看! 阿母當欲位西爿行出來,捋對後爿的包仔頭,寬鬆旗袍式的衫仔褲,行路的形兩手自然的擺動,這正是我日夜所數念的老母…-阿母小等一下我佇遮

李秀!怎麼了,要跳樓自殺?仝房間的同事,耍笑對我講,伊想講我是咧運動做體操,我才回魂趕緊將腳囥落來。我這款的情形已經發生二、三遍矣。會記得第一遍是阿母拄過身的頭幾工,予老父驚甲無時無刻就愛斟酌靠窗仔門的查某囝,甚至禁止我佇懸樓頂靠窗仔看街路。

現此時,雖然經過幾若十年,阿母的形影不時顯明佇我的記持。法國有一位女詩人,因為伊傷愛海,終其尾伊投落大海的內面共大海作伙攬抱。我嘛有這款心情,我傷愛阿母,我嘛足想欲綴伊去。

開會的地點是馬宮,但是外垵才是我想欲去的所在。位行程表看來,開會了後有半工自由的時間,探聽的結果,外垵並無列入遊覽的行程,我只好家己發落。時間有限,我必須透早坐頭班的公車,十一點晉前愛拼勢倒轉來馬宮,按呢才會赴坐十二點的飛機到高雄。同事苦勸我莫去矣,一畷路遮爾遠,干單停腳幾分鐘爾,算袂合,閣再講萬一公車若無準時欲按怎。

雖罔是按呢講,若無去外垵---我父母血跡的所在,我會感覺家已是一個不孝查某囝。位母親過身了後,袂當看著伊的形影,我定定按呢想,是毋是伊走去伊的故鄉外按藏起來無論如何,這个時刻,我用爬的嘛欲爬去。

我依照計劃坐透早彼班公車,通去外垵揣老母淡薄仔形影。天猶袂光著愛起床,對我來講袂生份,奚是我讀女高中的習慣。位高雄到屏東通學需要坐透早頭班的火車去讀冊。彼當時阿母每工天袂光就起床替我準備早頓、裝便當,為我整理一切,予我安安穩穩,趕著車去學校。阿母起床未曾梳頭的形,現此時隨著公車的飛徙,煞佇我的面前走來走去。軟軟的早風,位車窗外飄入內,親像阿母輕柔的撫挲(so)。啊!阿母!每一个所在攏有汝,但是,真實的汝到底是佇佗位

腳總算踏著日夜思念的土地----外垵,義嬸仔已經佇車牌仔腳咧等侯我。

「昨昏汝拍電話來,我就連鞭拜託昌仔幫我掠幾尾魚仔,通予汝帶轉去高雄。汝應該較早共我通知,我就會當準備較濟的魚干,魷魚干

「義嬸仔!我來毋是欲提啥物物件,我是欲看遮的景緻,鼻遮的空氣按呢我就心滿意足矣。」

行佇防波堤頂面,彎腰想欲撈一寡海水,毋過傷懸無法度摸著。

「遮是舊年尾就開始的工程,政府講欲共海水填一寡落去,按呢就有較闊的所在,予逐家有較濟的空間通活動,另外彼角勢閣欲起一个碼頭,若按呢以後就足利便矣。」義嬸仔一睏頭共我做紹介。

「以後我就袂當佇遮耍水矣。」家鄉進步的建設,毋過我心肝頭親像失落一項重要的物件。義嬸仔導我行到廟邊一間甘仔店,我袂輸欲搬厝仝款,買一大堆物件予義嬸仔,因為伊無愛提我予伊的魚仔錢。

「汝是欲創啥物?」伊摻著疼惜的責備按呢講。

「阿嬸,遮猶原無法度表達我的心意,汝知無?」義嬸仔是阿母少女時陣上好的姊妹仔伴。看著伊親像見著我親愛的老母。

「伊就是秋蘭的查某囝,袂忘祖的囡仔。秋蘭若有在生,有遮爾友孝的查囝,伊毋知欲偌歡喜矣!

我誠歹勢一直扭義嬸仔,請伊毋通按呢紹介我予別人,其實我較愛恬恬仔家己數念母。踏佇這塊土地,目屎流袂停。坐佇回程的公車頂,我一路位頭到尾,吼母的聲音、吼母行路的款樣、吼母疼惜我的形影…吼甲諴爽快,嘛諴心酸。

檢視次數: 385

李秀在12:32am對2010 六月 29的評論
今年4月23日佇澎湖縣文化局演講並鼓吹台文的重要, 了後應聽眾要求, 我當場唸這篇散文, 結果予我的澎湖鄉親大開眼界, in大部份的人毋知台語竟然會當用台文表現. 但是我咧想, 如果我若用澎湖腔口來讀, 効果一定會愈好, 可惜我這个澎湖子弟竟然無澎湖口音, 唉!
王立信在11:11am對2010 七月 1的評論
王立信在11:18am對2010 七月 1的評論
外垵兮鄉情串連思念兮血管路
筩到高雄.美國.到世界角落
汝寫 消解阮夢境思鄉兮苦楚
想講 加減阮佗讀予汝聽 嗎算
挖掘填滿真深人親土親兮飫餓
腔口敢是數念兮鴉片膏
抑是仝款兮牽纏佇情字此條路
我莫安呢佮作 等心坐沉了後
來報答定著相拄佇心靈兮國度
李秀在2:26pm對2010 七月 1的評論
是啊! 腔口是數念兮鴉片膏!
勞力汝閣再一遍予人行佇思念的血管路!
劉菁芬在8:02pm對2010 七月 1的評論
這篇文章我前後讀過好幾遍
有幾個地方
會反覆觸動到心底那根最細緻最脆弱的弦
尤其是以下這段文字
踏佇這塊土地,目屎流袂停。坐佇回程的公車頂,我一路位頭吼到尾,吼阿母的聲音、吼阿母行路的款樣、吼阿母疼惜我的形影…吼甲諴爽快,嘛諴心酸。
有一天清晨看這篇文章
竟落淚不止

問好李秀姐
李秀在7:32am對2010 七月 2的評論
Sentimental 的人都會比較痛苦. 別人認為稀鬆平常之事,或許他會感覺大事臨頭,你想這種人會快樂嗎? 家門前有一棵楓樹, 秋天尚未來臨, 它就提早變紅, 兒子常取笑我就是那棵神經過敏的楓樹.
王立信在9:50am對2010 七月 2的評論
誠實矣,當阮讀到「踏佇這塊土地,目屎流袂停。坐佇回程的公車頂,我一路位頭吼到尾,吼阿母的聲音、吼阿母行路的款樣、吼阿母疼惜我的形影…吼甲諴爽快,嘛諴心酸。」兮時站,真正有想欲吼出來兮彼款激動兮破音和讀煞了後兮釋放呢。

意見

您必須是成員才能發表評論!

加入 台文戰線聯盟

© 2021   Created by 胡長松.   管理小組

成員徽章  |  報告問題  |  服務條款