【小說】白耳仔佮我
白耳仔佮我 (2009.3.24 修改第四版) ／胡長松
1
我毋知影妻是按怎會去買彼隻鳥á轉來，伊講：「Tī夜市á看著，感覺伊可憐，tō共買轉來矣。」我共斟酌看，是白耳畫眉。鳥á予妻囥tī房間頭前的陽台，一透早，唉tō干那有心理病仝款，啾啾叫，叫袂煞，tī籠á內khok-khok跳懸跳低，害我倒tī眠床頂嘛聽ka̍h無張持緊張神經質--起來。我共妻講：「妳敢會使叫彼隻有病的白耳á莫閣khok-khok跳矣？若無，規氣共放放--出去。」妻應講：「A tō是按呢毋才看伊可憐的--嘛！閣再講，按呢的鳥á共放--出去，嘛乾焦是揣無吃、飫死一條路爾敢毋是？」妻真堅持，我只好繼續接受伊佮鳥á精神上的苦毒。
閣較害的是我自來無bat想過，我一日透早會因為醫學的特殊理由佮妻鬥陣。伊量體溫，判斷彼日是「排卵期」，tō要我請假佮伊去婦產科做檢查，尚重要的是，tī檢查晉前，夭壽骨阮閣必須要先合房[1]。彼个檢查有一个奇怪的名叫做「性交後試驗」。Tī按呢的早起無閒彼項予我感覺真無神，見若毋是位感情的角度出發的，哼我認為它tō屬tī獸類的層次。好笑的是規个過程平波波無起無落，袂輸一个唐突恬靜的儀式，一直到結束，我遂完全無臭無汗（毋tō干那一隻狗？）事後妻恬tsuh-tsuh倒值床頂袂振袂動，伊講，是醫生交待的。「這是tiâu胎的姿勢，要維持半點鐘。」伊的聲調內面有一款莊嚴的母性的氣氛，予我笑出來。伊看我嘻嘻哈哈，tō受氣矣，頭斡過來講：「敢講這件代誌你無責任？閣有，尚急欲抱孫的人敢毋是恁老爸？」
這站，親像按呢的情形已經無特別。拄結婚的時，因為猶未生子，我佮妻確實享受過一段清閒自在的日子，上山落海，嘛做伙去過幾咯个國家蹉跎；毋拘，當阮想起要有囡á的時，這个清閒遂tō成做壓力矣。阮一直無法度有囡á。沓沓á[2]，阮鬥陣的時所想的全是這个任務，這予人真厭sian無神。妻認為一定是tī伊或者是我成長的過程中，有啥物無發現的罪，所以伊的腹肚才會到旦無動靜。所以，伊堅持要揣出彼个罪。這馬，「罪」的想法kâⁿ tī阮中央，已經成做一粒我心肝頭的臭膿。我毋知影按呢的看法位佗來的，毋過，我按算拒絕它。哼哼，自古來，宰人放火的惡人定定是子孫á滿堂敢毋是？
病院診間的壁頂頭掛一幅白鸛[3]展翅的圖。晉前tī我佮妻的房間壁的頂頭，嘛bat掛過仝款的一幅，是妻特別揣真久才買著的。北歐的人講囡á攏是白鸛用喙咬咧送來的，所以，共白鸛叫做送子鳥。妻認為掛彼幅圖會予伊好運（若論罪，這个迷信的想法咁會使脫罪？）彼幅圖內面的鸛翅鼓展開，白色羽毛的外圍是一緣烏色的毛，tī日頭下，確實干那有一个白布巾包起來的紅嬰á予牠抱tī胸坎，我愈看愈綿精[4]。「你敢會留tī遮？」妻欲做內診的時，護士小姐問我。我搖頭。目睭金金看另外一个查甫人共傢俬囥入妻的身體，閣按怎講我嘛無法度慣習。「按呢，請先卡面[5]等。等一下會閣請你入來。」護士小姐kah-ná知影我的ngài-ngio̍h，用一个同情的聲調講。我tō tī候診室等。安徒生bat寫過一篇白鸛的故事，內面講有一群狗怪囡á唱歪歌恥笑當底學飛的白鸛的鳥á子，路尾手，彼群白鸛學會曉飛了後，真袂爽，tō共一群死去的囡á送予遐狗怪囝á做小弟小妹──我共妻講這个故事，奇怪，伊聽了真無歡喜，認為我故意講歹聽話予聽。尾手過無二日，伊tō共彼幅圖位壁頂提落來--矣。這馬想來，妻所講的罪，嘛毋是完全無道理。我敢是彼群恥笑白鸛的囡á的其中一个？
這个想法沓沓á tī我的心內pù-íⁿ：我知影，tī表面的「我」下面，恐驚有另外一个「我」，阿彼个「我」的想法閣是hiah呢汰膏垃圾，完全是表面的「我」無法度承認的！
「先生，請入來。」護士小姐叫我。
妻已經peh起來坐tī椅á頂，掛金框目鏡的醫生一直看電腦螢幕：「tī拄才的檢查，太太的子宮頸發現有12隻精蟲，這表示精蟲的數量、活動力閣有對子宮頸黏液的穿透力正常無問題。一般來講，子宮頸黏液是精蟲向前泅最大的阻礙，有通過12隻已經是袂bái。」這表示啥物，我想無，醫生嘛講袂清楚，總講一句，伊共阮恭喜，因為阮猶閣真有機會有囡á，毋過要繼續phah拚。毋知是安怎，我真討厭看彼个醫生的面。行出診間我挑故意假笑魁：「我甘願共神求嘛無相信這个醫生的話。」妻tō共我凝：「哼！你的信心敢袂傷大？」伊焦笑二聲。我雄雄發現這已經毋是我所熟悉的彼个妻（老實講，位阮想欲生子，我tō毋bat聽過伊笑），聲調內面，有我無法度瞭解的不滿。
2
暗暝，阮社頭á迎鬧熱，阮pâ自幾日前一直堅持我要去吃辦桌，因為是地方難得的神農大帝刈香，幾年一擺。印象中這款代誌是阮阿公的sit頭，阮pâ一向是kik外外毋bat底睬的，毋過，阮阿公二年前過身去矣，這遍阮pâ遂變做阮林家的大家長，雄雄熱心ka̍h。阮pâ的意思干那講這是伊的面子，所以，我一表示我尚好莫吃拜拜的時，伊tō kik面腔予我看，真有欲斷絕爸子關係的範勢[6]，這予我真不安。我認為我的老爸並無顧慮我的想法，因為我的丈人規家信耶穌，閣再講我為著娶妻，表面上嘛勉強洗禮矣，這馬閣是tī阮丈人的建設公司吃頭路，我相信阮pâ的堅持乾焦會造成我的不幸爾爾。
「好啦，恁尪á某tshūa來孝孤tō著啦。恁契爸火樹叔公嘛八十外á外矣啦，這回的香刈了，敢猶閣有後一回tō毋知矣--啦！」阮母á按呢嚅[7]：「無，嘛看tī恁契爸á的面子，伊外疼你咧！」
我的契爸火樹叔公，是六七十冬前神農大帝揀選的老乩童，我細漢歹io飼，阮母á共我契予伊做子，逐冬過年初二的查某子日攏要轉去in兜吃飯吃到16歲，he是阮hia的例。Hín時我的頭殼熠過一个畫面，是幾年前火樹叔公去到阮兜園á做客的情景，阮欲種一欉桂花，伊提圓鍬鬥相工翻土，是幾十年專業的老農夫的正範[8]的khut勢。日頭照tī伊規面的汗頂頭，予人一款特別深的年歲的印象。
拄才阮母á講話的口氣有淡薄á稀微。我問阮母á：「誰知影神農大帝是誰？恁拜的是誰恁敢知？」我tō聽見伊「唉！」吐一个大氣。
伊講：「唉，Hàm-hàm矣啦！」
哼哼，這款鬼神的代誌，這馬我是真無想欲信斗的。
In一隊人馬天未光tō出門，去到屏東的海墘á刈香，閣倒轉來到社頭已經是下晡三四點，lòng鼓lòng鑼，鬧熱彩彩，干那欲共規个社頭囂[9]過來的款。我無偎過，是到暗頭á怹共桌擺出來，我才佮妻勉強到位坐桌吃飯。
妻siān-siān講：「若是阮爸知影，定著無歡喜的。」
「毋是逐項攏要予知嘛。」我按呢應。
彼桌菜是袂歹吃，嘸過阮坐傷頭前，卡拉OK康樂隊的歌聲予阮真歹消化。我略á算，全部擺三四十塊桌坐滿滿，規个社頭的人攏來到位。姓吳的、姓林的、姓簡的、姓李的，我自從退伍回鄉到旦，毋bat看著這呢濟鄉親坐做伙，阿恐怖的是，干那每一个面我攏熟悉熟悉，毋過遂喝袂出名。其中我感覺有幾个少年家á特別面熟，問阮母á，伊講：「遮少年輩的，我嘛bat無二个矣！」按呢二三擺，我tō無閣問矣。桌擺tī阮社頭的下路，是我做囡á走闖的所在，桌邊拄好是彼欉阮時常tī樹下蹉跎的sūaiⁿá樹，阿tī彼條下路，阮嘛時常踢銅管á，銅管á飛出去的乒乒乓乓的聲那像閣真明，毋過，我共頭斡來斡去，按怎tō認無一个囡á伴。我雄雄發覺家己是故鄉的外地客。
「你看he康樂隊，敢講恁地方的人攏是遮呢無聊的？」妻講。
我無應伊。
阮pâ佮我的阿叔一直叫我上台唱歌，真心適，怹攏講愛聽我唱歌，我一直應好，毋過一直無唱。台頂的彼个查某主持人自稱阿美，妝畫真厚，穿紗á衫，低俗裸露，對每一个上台唱歌的人攏會sai奶二句，閣共伊的胸á貼tīin的身軀khok-khok-kô；無三二下手，我的雞母皮已經交落[10]規土腳。我閣詳細看，he是最近真時行的貨車所改裝的流動舞台，是共貨車後斗的車廂四面展開所成做的金光熠熠、鬧熱tshah-tshah的舞台。舞台頂較偎後面的部位徛一塊看板寫「音美歌舞團」，看板的頂頭貼一張紅紙，寫：「恭賀神農大帝刈香繞境大典闔家平安」，看板的後面坐一个彈電子琴的琴師。阿美á差不多三十外歲欲偎四十，穿一軀粉色有真濟水晶珠的比基尼式的服裝，懸踏鞋真懸，見若人唱歌，伊tō伴舞，二个奶á tī懸懸的台頂tōng-tōng-hàiⁿ；特別若是歐里桑，伊tō將胸á貼tī怹的身驅lù懸lù低，閣手牽手跳舞。「夭壽喔，去佗揣來這个妖精？」台á腳的歐巴桑嘛笑加咬咬叫，tō算台頂佮妖精跳舞的是怹的老伴，嘛干那無要無緊的款。哼哼，誠實是嬈記記無正經的歌舞暗暝矣……我想欲將目睭徙開，毋過真無法度，我的目神不時貼tī彼个主持人阿美á的胸坎……
Tō tī這个時陣，我的手機á giang--起來，偃頭一看，是我無熟悉的電話號碼，我共切斷，結果它過一下á閣giang，我切斷，閣giang，按呢二三擺，我tō共接起來。想袂到，電話的彼頭是一个查某囡á的聲，我感覺毋著，緊離開座位，行去較無人的所在。
是一个查某聲：「請問敢是少董的？」
「按怎？」
「有一件代誌…我想欲當面共你…唉呀…咱敢會使見一个面？」伊的聲音聽著真秘四，干那底哭，小可稀微悲傷。
「小姐，等一下。妳是誰，我敢bat妳？」
「敢講，你袂記矣？我是Kelly矣。」
「Kelly……Kelly……啊，我想起來矣，是妳！」是較早tī tshit-thô場所熟悉的一个查某囡á。
伊講：「我這馬tī會場呢！我拄才有看著你。」
「哦？」我驚一tiô，四界相一下，看無伊的影跡。
伊繼續講：「我是來鬥相工辦桌的啦。」
我沓沓á想起伊的面，佮伊這馬秘四的聲合[kap]做伙，雄雄抱心起來……He是一个無真醒目，某一方面來講，是小可膨皮大箍的面……閣再講，伊的哭聲真歹吉兆，若會使選擇，我無要啥物代誌佮伊有致代！
伊本底隨欲佮我見面，毋過我講無方便，所以共拒絕。事實上，我無想欲閣睬伊，只是伊tī電話中苦苦哀求，我驚伊亂，所以勉強佮伊約一个時間地點，了後，隨tō共電話掛掉。
行轉去位，妻問我電話誰敲的，我烏白講一个同事的名，毋過，位妻僥疑的眼神裡，我隨tō真後悔我所講的白賊。
暗暝tī眠床頂，我夢見彼个叫做阿美的主持人。我實在毋知影伊按怎看上我的，tī夢中，主持人行落舞台，來到我的身邊，完全毋管我的妻抗議，共我揪上台。我只好唱一條洪一鋒的〈放浪人生〉交差，he是阮社頭的人攏甲意的歌。我聽見台下的phok-á聲，毋過看袂著阮厝裡的人，包括妻。Tī我唱歌的時，主持人阿美á為我伴舞，然後，伊牽我的手跳舞，閣將身軀貼tī我的身軀。最後伊的二粒親像雞規的大奶á ân-ân貼tī我的胸坎，柔閣軟、燒loh燒loh，我一下手感覺強欲袂喘氣，唱袂出聲。我的頭殼雄雄親像入魔公，一偃頭，發現阿美á的面遂變做Kelly的膨皮面，續落，閣變做妻的面。
四箍輪轉一下手攏暗落來，親像烏暗的一片樹林。我緊闖落台，遂看見一隻灼火的虎位樹林內面行出來，恬恬徛tī我的面頭前，牠的目神是燒燙燙的火箭tshiōh過來……
我喝一聲tō醒來，半暝矣，彼隻白耳á竟然閣tī陽台跳懸跳低……
3
Dante tī《神曲》的第一句話寫：「當人生半途，我迷失tī一座烏暗樹林。欲講出彼个樹林有外呢拋荒、肅靜佮曠闊，是外呢á困難矣！」
這tō是我的心情。
講著Kelly，實在講，攏要怪彼暝tī KTV酒店，飲傷濟酒矣啦。因為建案的圖一直無法度通過，公司建築課的老李的有建議，所以阮才會按捺都發局的承辦王科員去飲酒唱歌。彼暝阮是三个人，一个人揀一个小姐來坐檯。王科員是三十出頭歲的緣投ásàng，穿白seh-tsuh，一開始秘四秘四，菜鳥á款，毋過坐檯的小姐一坐定，佮伊乾二杯燒酒落肚，伊膽頭在矣，手tō攬tī伊的腰，腫頭á ngiauh咧ngiauh咧底烏白so。哼哼，有影這款phāⁿ查某的豬哥步數免人教，通世間哪會有菜鳥á？自然á自然tō成做老鳥一隻。媽媽桑Dora干那無檯通轉，留tī阮的包廂直直添酒勸酒，續落，閣參阮喝酒拳，阮tō是按呢才飲一下傷濟去的。
哼，我知影老李的平常時á tō看我無目地，我看，彼日伊是酒後吐真話，事實上為著佮我爭副總的位，我早tō已經聽著袂少風聲。
In三个小姐tī舞池共王科員攬咧唱歌跳舞的時，老李的提酒甌敬我，彼時陣伊已經飲ka̍h一个面紅貢貢。
「唉，來啦處長，我老李的敬你啦！屎in娘你要知neh，我敬酒，並毋因為我愛飲酒neh！」
「哦？」
「你愛知呢，吃人的頭路，我李某人，按呢飲酒嘛是姑不而將呢！望你小牽成啦！」
「老李的，講這敢是話？我先焦啦！三八兄弟，咱攏是吃人頭路啦，我敬你啦！」我飲焦，伊嘛飲ka̍h焦。伊閣開喙講：「無nooh處長，董的是恁丈人呢，你外清靠sáng勢咧，阿阮這，吃頭路人，佮你哪會比的？」
老李的大我的歲，子已經讀國中矣，伊本身閣是國立大學建築系畢業的，當年是建築師牌考無過，才暫時來滯阮丈人的公司的，想袂到一滯二十幾冬，牌猶是一直考袂過。伊畫出來的圖是袂bái，毋過到旦猶閣要寄別人的名。我的丈人對這點真無諒解，認為老李的企圖心無夠，「莫怪一張圖到旦審袂過！」為著這个案，老李的已經予阮丈人爸罵kah臭頭去。當然老李的有話講，伊認為tō是伊自少年為公司拚命，才會錯過讀冊考牌的好時機。
「哼！董的講這哪會著？無扈斗啦！」伊時常按呢nauh。
相對，建築毋是我的本途，我是讀藝術的，圖加減會曉畫，毋過起厝是外行；我佮妻tī大學tō熟悉，是因為妻，我才通有這个處長的頭銜的，所以tī公司，一寡生理的mê角，應酬外務的場面，確實嘛攏要老李的tshūa路。當然老李的話裡有khau洗，我聽會出來。伊飲酒了的目睭圓車車，我位伊的目神裡發見對我的恥笑，底笑我是吃軟飯的，精差無講出喙爾。所以我真袂爽。
「講話敢tō遮鹹？飲酒tō飲酒，幹！講阮丈人是何必？」
「這間公司是伊講準算，無講伊欲講誰？」
「你敢定著要按呢糟蹋我？」
「處長，我無這个意思喔！閣再講，我講的佗位毋著？若有好某，我嘛想欲娶一个著否。毋過，我有我的原則啦，比如講，若是因為按呢欲叫我背祖入教，哼哼這，我是做袂到的。」
「駛in娘，老李的，你講啥siô？恁爸入教佮in啥池代？阿若照你的意思，我毋tō是吃飯khaⁿ中央的，攏袂做主tsit？我共你講哦，尊嚴是一个查甫人的內褲哦，你攏免穿內褲行路呢？你家己袂泅，怪位我遮來是啥物意思？」
老李的聽我按呢講，嘛袂爽起pháiⁿ，酒甌á囥咧徛起來。
「你講啥siâu話？是誰袂泅？」
「我講你啦！」我嘛徛起來。
邊á本底底唱歌跳舞的王科員佮三个小姐，聽阮底大細聲嚷，驚一tiô，一下手恬落來，tshun電視的音樂聲家己底tân。
老李的二蕾目睭gîn-òoⁿ-òoⁿ看我，用輕視的口氣講：「著啦，我是袂泅啦！毋過處長，你拄才講尊嚴是一个查甫人的內褲，借我共你改一句，若我看，內褲才是一个查甫人的尊嚴啦！In爸李某人，尚起碼閣敢佮人嗆tù，in爸毋是某奴，in爸的內褲是家己管的，阿若欲揣啥人thǹg tō揣啥人thǹg，猶毋免共某報備的啦！哼這點查甫人的氣魄，你做會到？我看，你連開查某的kioh數[11]都無啦！」
「哼！」我共我的酒杯大力宕tī桌頂，內面的whisky溢溢出來，潑規桌。In hia小姐驚阮二个成實冤家起來，tō位舞池行轉來膨椅這頭欲做公親。王科員緊tu薰予阮，媽媽桑Dora聽著聲，嘛闖入來。
媽媽桑Dora佮hia小姐嘛揪我的手，按捺我坐落。王科員隨共lái-tah拄過來，先為我點薰，喙一面講：「唉呀，少董，攏家己人，家己人嘛！」
媽媽桑Dora偎tī我的身軀，用手貼我的胸坎。Dora是三十外歲人，我才發見伊的芳水有一種野芳味，佮伊鈕掠的氣勢真四配。伊嘛講：「無啦，規氣算我毋著，共恁thîn傷濟酒矣啦！我賠罪我賠罪，失禮hooⁿh！攏家己人，家己人嘛！」
Hia小姐的其中一个，本底是老李揀來陪坐的，可能乾焦二十出頭歲，穿一條短短的牛á裙，身軀lông一領粉紅á色圓領的薄紗T-shirt，伊小可膨皮的面á因為現場的氣氛緊張ka̍h。老李的講「你連開查某的kioh數都無」的大嚨喉聲，干那閣tī我的頭殼底轉踅，底激我。
（哼！啥物腳數[12]？）
「喂！妳來！」
彼个小姐驚一tiô看我，閣斡過看Dora。
Dora講：「董的底問，妳是無聽著喔？」
伊才細聲á講：「是。」坐倚來。
「妳幾點下班，我請妳吃消夜按怎？」
伊頭偃落。
「董ê，我是無出場ê。」伊sè-gī-á講。
「喔，按呢好，我嘛無按算欲付錢thsūa妳出場！」我挑故意按呢講。伊的目神真無自信。我叫伊lim酒。
我講：「妳免煩惱啦！我趕時間，等一下愛走矣，消夜嘛吃袂落去。我叫你坐落來，只是beh問妳kám有看著拄才路裡的車禍。」
伊搖頭。
我講：「He是我的一个朋友，妳無看著tō傷無睬矣，伊彼台車全台灣才五台，紅色的進口跑車，閣敞篷的。伊佮一台載phun的貨車相lòng，一桶phun車車倒，車tī伊的車的引擎蓋頂懸。阮朋友ló車欲理論，結果，車門一phah開，tō鼻著phun的味臭ka̍h伊 tsàn袂tiâu，吐出來，吐kah規个車內底攏是，車外臭，車內閣愈臭，無人敢倚過……」
彼个小姐笑--起來。伊的面因為酒氣漲紅--起來，發面紅。我閣叫伊lim。若講tī彼款所在上班的查某是外呢高尚，這我毋信，哼tō算表面講無欲出場的嘛仝款啦。哼哼這是一向我對這款查某囡á的判斷。我的心肝頭有一个想欲冒險的感覺ngiau起來，濁濁的喟that tī胸á。我無法度阻止家己鑽入彼个深坑。
我看伊的鞋á，是色水退時行的sông款，lî-lî-lap-lap閣傷大雙。我挑工講：「這鞋á看起來足好穿的hooⁿh？」伊tàm一个頭，面規个紅貢貢--起來，紅到頷頸去。
伊講：「董的，你足心適neh！我愛按怎稱呼你才好？」
我用目尾看老李的，伊揀的小姐予我tsáⁿ--來，我看伊的面一陣青綠。
我無應，我對彼个小姐講：「妳kám想欲共我tsim？」
伊應：「無愛！」
我隨講：「哼！我嘛無講妳會使。」
按呢，我tō共伊放leh，當做伊無在場，佮媽媽桑閣有另外幾个小姐lim酒喝拳，一直到伊kah-ná不安坐袂tiâu的時，才斡頭轉去看伊的目睭。
「失禮，我kah-ná冷落著這个súi姑娘á矣！實在講，若毋是我tshūa某矣，好定今á日著會共伊求婚leh。」眾人hi-hi-ha-ha笑起來。我規个身軀斡過，tī伊的耳孔邊細聲á講：「來，súi姑娘á，妳心內想一个1到10的數字。我臆看māi──Kám想好矣？」
4
彼日因為酒飲濟，我的頭殼直直tiuh。計程車載阮入去這个城市上光嘛上暗的角落，落車了後，我按算散步一段。Kelly干那一隻狗á子仝款綴tī我後面行。
阮經過旅社區的巷á口，有一个青瞑的阿婆á底賣刮刮樂[13]彩券，伊孤單一个，直直招呼人買，生理真bái的款。Kelly要我停跤，伊位伊的皮包á gîm二百箍出來買，因為動作笨閣青狂，零角á lak規土腳。伊踞落去khioh，直直共我講歹勢。阿婆á共彩券提予伊的時共說多謝：「小姐，妳好心會有好報喔！」
「哦，想袂到妳hiah有愛心呢……妳毋是講欲儉錢，煞閣按呢開錢買彩券？敢講妳成實相信he錢是in得的？」
「錢是誰得的我毋知矣，毋過，若是行過無買，我tō會直直想這件代誌……按呢足討厭的，所以規氣tō買矣！」
五彩燈tshiōtī伊的面，伊的目尾有青春的色水，予原底膨皮的面無hiah歹看。我嘛注意著，伊乾焦是面較膨皮爾，論其實，伊的身軀sán中帶柔，有嬈玲瓏[14]的身材骨格；阿伊勻勻á牽絲、小可夯懸閣sai-nai的酒醉的聲調，嘛共五彩的燈影加添一款放散[15]的野味佮風情。
我問伊：「妳敢bat陪人出來？」
伊搖頭。
「除了這妳閣做過啥？」
「足濟矣，啥物攏做呢。」
伊相東相西、na講話na揪頭毛。毋知為啥物，妻的形影雄雄嘛店我的頭殼內浮花，予我真siān。我雄雄感覺老李的話裡有真實的一面：位我娶妻的彼日開始，「某奴」二字恐驚tō注定要綴我一世人矣。阿若按呢相比評，親像Kelly為著錢甘願行入嘻嘩的蹉跎間á做空缺，看來嘛毋是啥物特別稀奇的代誌。
我想起晉前我共阮老爸講我欲洗禮的時，伊應我的話：「若按呢，恁爸死，你這个不孝子欲捧斗否？」
「阿爸，毋是按呢啦。」
阮老爸的面khiû做一丸講：「毋是按呢無是按怎？猶袂娶tō急欲做某奴矣敢毋是？」
我問Kelly:「妳講妳啥物攏做？比如講咧？」
「比如講，洗大樓啦、tī菜市á口賣囡á衫啦、加油站加油的啦、總機小姐啦……」
「總機小姐？」
「嗯，tō是半暝專門接無聊查甫電話的彼種……」
「喔？」
「妳是講彼種0204的電話？」
「是矣是矣，tō是彼種電話矣。敢講你攏無敲過？嗯，我毋信！」
我毋知影家己哪會搖頭。
我共伊的腰攬leh講：「哪會欲做he？接彼款電話，足無聊的敢毋是？」He是假仙假tak的聲調，我予家己講的話驚一tiô。實際的狀況是，酒精定著已經tī我的頭殼內起酵[16]，Sò-piak-piak的豬哥蟲tī我的規身軀ngia̍uh-tshī-tshāsô。我想起我嘛bat敲過彼款電話，伊喙裡所講的彼種無聊的查甫人……
He是洗禮了後我所敢做的尚大的冒險，尚奇怪的是，竟然tō發生tī洗禮了彼工的暗暝……
「只是一个空缺嘛！」Kelly共喙翹起來講。
……「林柏年，我奉聖父、聖子佮聖神的名問你，你敢接受耶穌成做你生命的救主，一世人行十字架的道路，跟綴祂無離？」
「是，我接受。」
我想起我受洗的時，牧師滴水tī我偃低的頭殼頂，我的目墘澹澹，干那有目屎流落來；毋過我的目屎絕對無妻的濟。妻講he是伊所看過尚感動人的洗禮，伊講：「因為，這是你的洗禮矣！你敢知影我等這日等外久矣？」
這是我娶伊晉前的代誌，hín我感覺伊時常有一種溫純的表情，有一種值得一世人追求的嫷──he，恐驚是我接受彼个儀式尚大的原因。毋過in講這毋是洗禮的本質，逐擺想到遮，我攏感覺真不安，有一款欺騙上帝十字架的感覺……事實上，我是為著佮妻結婚，才決定洗禮的，這个事實永遠無法度改變。阿洗禮彼日暗暝，會刁故意敲0204的電話，敢毋是為著欲共家己提醒這項？或者，是表示一種無聊的反抗？
因為sih過十字架的畫面，我感覺一陣抱心刺tsha̍k。我雄雄感覺這齣荒hām的戲愛suah場矣。我講：「暗矣，你是毋是應該敲電話叫恁phàn-á[17]來載妳矣？」
「你滾笑。我無男朋友啦。」
「哦？」我看伊。伊毋敢看我。我講：「妳有！」
「我無啦！」伊受氣矣。
「若無phàn-á，hiah呢拍拚趁錢beh創啥矣？」
「Gún m̄愛共你講！」伊按呢應的時，二tsūa目屎tō gô落來，掛tī伊膨膨無真嫷的喙phúe。我小可予伊雄狂的目屎驚著，恬恬無講話。
「你kám忝矣？欲歇睏矣袂？」伊共我的手骨揪咧，夯頭看我。
5
出門晉前，我專工去陽台看彼隻白耳á，因為伊已經一暝無叫嘛無跳。雄雄恬落來，對這款病鳥來講，並毋是好代。論其實伊會使算是一隻袂bái看的鳥á，毋過耳á邊白色的毛一直生到目睭四箍圍，看著袂輸是白色的目睭遮，予人無真坦白的印象（敢講鳥á嘛有親像咱人的人格？）伊一身軀的毛，已經予伊家己lè ka̍h大孔細lih，掠我金金相的目神干那有真深的怨恨。Tō因為這个予人袂爽的目神，我想欲共放出去；毋過，嘛因為這个予人袂爽的目神，我無想欲予伊遮呢好吃睏。我乾焦共綁鳥籠á門的幼鉛線解開，哼阿伊若有頭殼有才調，tō應當家己共籠á門thuh開飛出去毋才著。
我佮Kelly約tī中晝。
約tī中晝，當然是無向望妻問，更加無向望任何人知影這件代誌。彼擺的大建案順利進行了後，我升做副總經理，tī三面偎窗的辦公室，我看著透早的日頭共街á路tshiōka̍h金siak-siak。
我拄坐好勢，秘書tō入門來講，我的丈人爸董的欲約我吃中晝。我只好請伊回覆，講我已經佮一个營造商先約好矣，所以要改一个時間。續落過無外久，秘書閣入來，問我講是欲佮佗一个營造商吃飯，因為建築課老李的已經tshūa大東營造的人到位，嘛是想欲確定中晝吃飯的代誌。我共伊講：「毋是大東營造，我中晝是欲佮三石營建的人吃飯。妳去共in講。」
秘書行出去了後，我恬恬看大樓下面的街á路，車輛來來去去，我對in的人生好hiân起來。確實人佮人之間，生活tō是差hiah濟袂比評tsit的。阿in hiah無才調的人常在講我是吃飯khaⁿ中央的，he又閣是按怎？敢毋是怨妒niâ？相對來看，哼哼我真清楚，妻所予我的一切，無別人會使予我，這tō是一切原則的原則，雖然，我無通選擇……
講著Kelly，若毋是驚長暝厚夢，我實在真毋甘願睬伊，哼閣再講，彼款戲棚頂的戲，戲棚腳何必閣搬……
我感覺真荒hàm，彼一暝我tshūa伊入去飯店的情形kah-ná是糊去的一幅圖，我先是去洗身軀，伊tueh我入去浴間，續落，遂連我家己嘛無啥印象矣……閣較hàm的是，經過一段時間，伊的面到底是生做按怎，規个遂嘛愈生份矣。
（若閣一擺，我嘛無想欲佮伊鬥陣！）
中晝烏雲位海彼爿來，一目睨tō開始落西北雨。我佮伊約tī阮K市捷運R12站的一號出口路邊，我駛車過載--伊；毋過我到位的時，伊猶未出現。雨ná落ná大。我共車停tī路邊等，伊過10分猶未來。我敲電話予伊，伊電話中的聲真雄狂款，直直會失禮：「唉呀，你到位矣喔，歹勢，因為發生一寡代誌，請你小等一下，我連鞭到hooⁿh！」
我繼續等，一直到伊叩我的車窗──若無是伊叩，我根本tō認袂出來，伊已經有身差不多五六個月矣，一圈肚，歸身軀是強欲走樁去的形，原本tō小可膨皮的面這聲變ka̍h膨閣兼腫。（誠實的，我毋bat看過遮bái的查某！）伊夯一枝雨傘，毋過傷細枝，肩胛頭一下手tō予雨潑澹去。
我開車門喝：「緊入來！」
喔這个查某，哪會變這个款？
我的心肝窟á tiuh一下，感覺真歹吉兆。
伊拄坐好tō那喘那講：「遲到失禮啦。拄才我欲坐捷運的時，有一个囡á的雨傘tī亭á腳予風吹歹去，伊哮ka̍h，講伊會予in老母槓死……所以，我只好共我的雨傘先予伊，我閣斡轉去厝提。想袂到，一差差hiah久。失禮hooⁿh！」
「阿妳的腹肚……妳結婚矣呢？」
「歹勢，雨傘共你滴ka̍h規車。著啦，我tō是為著這來揣你的。其實我無確定啦這个囡á，我猶毋知伊…是阮男朋友的，抑是…你的…」
「啥！妳莫烏白講！」
「其實我本底無想欲共你講的，我按算家己欲共囡á生落來飼的…我誰嘛無想欲講…閣再講，我若揣你，我知影你會誤會……」
「等一下等一下，妳先共我講，妳彼時陣毋是共我講，妳無男朋友？哪會這馬閣講無仝話？到底是按怎？」
伊講伊的男朋友彼時陣博輸儌，欠人錢底走路，無要人知。閣再講，tī蹉跎間á，無人會承認he的。
「所以妳彼時陣hiah呢拚性命趁錢，嘛是為著予恁男朋友還數？」我對這一切半信半疑。
「嗯！其實毋是全攏予阮男朋友啦，閣有一寡予阮朋友，in講欲做生理……」
「阿伊這馬人咧？我是講妳的男朋友。」
「走矣！」
「走去佗？」
「我毋知矣！我足呆的著否？」
「阿伊是按怎欲走？」
「攏是我毋好啦，因為伊叫我共囡á提掉，我毋。我共講，我一定欲共腹肚內的這个囡á生落來。我閣共伊承認講，囡á無確定是伊的。伊一受氣，罵我菜店貨，共我sai一下喙phúe，tō走矣！」
（世間哪有遮憨的查某囡á？）
「阿恁厝裡的人咧，in 滯佗？」
「In滯庄腳，厝裡無錢，囡á閣濟，我國中讀無了，tō綴阮男朋友走出來矣，阮老爸講我尚好永遠莫轉去！」
雨雄雄痟落，落ka̍h我共雨su-tá開上大磅猶看無路。我只好共車先偎店路邊停，句在雨淋[18]。
「失禮啦！董的，我是想講這件代誌，你可能會想欲知影，嘛拄好看著你，所以毋才會……是按呢啦，彼日我做產檢，醫生講我有啥物妊娠毒血症，伊勧我要共囡á提起來……毋過我毋敢作主……」
「妊娠毒血症！會按怎？」
「醫生講，我的血壓傷懸，囡á可能會危險……」伊哭起來。
「阿妳咧？」我看伊面色真bái，bái ka̍h毋成人。
「只要囡á好勢，我……我是無要緊啦！」
我想想leh感覺毋著，緊共車發起磅，位病院的方向駛去。
6
我直直感覺勼脊骿有二蕾目睭底gió我，予我的勼脊骿那來那燒loh。
應當有人暗暗底跟蹤，好定是我尚提防的老李的。
──我後壁的彼台轎車親像tō是伊的。
一路聽Kelly講我才知，伊落跑的男朋友根本tō是sut á，伊共伊位故鄉tshūa出來了後，tō一直開伊的錢，閣瘋儌愛博[19]。伊是太子爺公的乩身，落跑晉前的sit頭，tō是逐日tī in滯的hia的王武宮練八家將。毋過in跳八家將的攏是愛博無藥醫。伊bat想過欲離開伊，毋過伊逐擺攏提太子爺公的名出來做háⁿ頭，伊會驚，suah-tō毋敢走，才會綴伊四界滾絞bok-bok泅。伊走了後，伊認定腹肚內的囡á原來是來解救伊脫離苦海的，所以伊按怎嘛欲共生落來。
伊講這馬無法度做「he」矣，大部份的時間攏揣散工á烏白做，最近，伊綴辦桌的too-tsí四界走，tō是按呢，才會一个面烏綠綠。
阮去到郊區的彼間教學病院，醫生檢查了，講確實是真嚴重的妊娠毒血症，伊的血壓佮尿蛋白攏傷懸，腎功能的指數嘛bái。醫生講：「恁要好好á做一个決定。囡á活命的機會乾焦三十pha，而且tō算活落來，嘛袂健康；我建議共提掉，若無，太太的部份嚴重的時可能會有腦出血、腎衰竭佮肝衰竭等等現象，性命危險。你敢是囡á的老爸？」
「呃……」我真勉強tàm頭。
「恁要做一个決定，我認為無必要冒險，要囡á，tō等較健康的時，隨時會使閣有嘛。這擺囡á先提掉，對孕婦是較好。」
實際上，假使囡á成實是我的，我想著我的地位佮前途，敢有可能會想欲留這个囡á？（無可能嘛！）
醫生閣一擺講：「若是阮某，我想我會按呢做。閣再講，太太……猶hiah呢少年！」我想，醫生定著有看出啥物。
我斡頭看Kelly，伊的面因為嚴重的水腫，目ham歪tshuah去，實在bái ka̍h袂認tsit。我順醫生的話nauh講：「嗯，若醫生按呢講……我看……也是共提掉好啦！」
伊聽我按呢講，乾焦bih喙，頭偃偃，過一下á才細聲á應：「這，我想是免考慮矣，我會家己共囡á生落來，按怎攏無要緊。你毋免睬我。」
Tī病院的大廳，我感覺彼二蕾目睭閣出現矣，我斡頭，是老李的無毋著，伊徛遠遠看我，真無好心款；毋過真龜怪，目一睨，伊的影跡tō隨閣無去。我四界相攏相無，乾焦勼脊骿彼二葩燒lo的目神感覺猶tī咧……
舞規晡落來，我送Kelly到厝已經是盈暗矣。妻直直敲電話予我，毋過我無心情接。我感覺真忝頭，先倒轉去辦公室休睏。
窗á下的街路，粒積的雨水反tshiō搖顯的燈á火，tī玻璃窗的水霧中tòo開，成做一幅水彩的夜景……我感覺家己是徛tī一隻風雨的船頂，頭殼起gông。
Tō當做無你的持代啦！
我的心按呢共家己講：攏莫睬伊。莫承認。莫閣接伊的電話、莫見伊、莫想伊，tō當做完全無這項。閣再講，囡á無一定是你的。伊只是一个軟稚的查某，伊無法度影響你所有的這一切。予消失去！
按呢想，我的心暫時較定著落來，妻敲來的電話聲閣giang矣，我共接起來。
「你是走佗位去矣？電話攏毋接！吃飯矣袂？」妻責備我。
「佮廠商講生理矣，這馬才轉來到辦公室。吃過矣。」
「按呢你緊轉來，我有代誌欲講。爸爸嘛來tī厝裡喔！」
「啥物代誌？」
「唉呀你哪會hiah囉唆矣，緊轉來tō著啦！」
「喔！」
我偎tī窗á，雄雄感覺家己tō袂輸是厝裡彼隻白耳á，阿辦公室tō袂輸是一个吊tī半空中的大籠á，我tī hin lè過來lòng過去，佮彼隻鳥á無啥物精差……這款的想法予我家己驚一tiô。
「柏年，加油！」
我猶會記洗禮彼工，妻的老爸是按呢貼我的肩胛頭的。（加油？）彼時我完全無法度理解這二字內面的意思。特別是，這个信仰一開始，tō不過是我想欲得著啥物的手段爾。妻。空缺。錢。閣有目下的一切……毋過這馬我嘛知影，因為濫著無真實的部份，我失去一寡物件。我已經小可了解矣，gió tī我勼脊骿的彼二蕾目睭，有可能是老李的的，有可能是我的丈人爸的，有可能是妻的，有可能是Kelly的，嘛有可能是我無熟悉的任何一个人的。
──敢講這是我的丈人爸共我講的「加油」的意思？
無睬，傷慢矣，我閣想起Kelly的面，規个人tō畏寒。而且老李的嘛可能知影矣，我的一切真緊會烏有去。（明á載伊會tī公司按怎講？哼！敢講tō為著彼一个可憐的憨查某？）目睭瞌瞌，我無張持去想起Caravaggio的彼福「聖母之死」的圖。Hin有一个歹看膨皮的聖母瑪利亞，雖罔平凡毋過透露尊嚴高貴的表情，我想，乾焦Caravaggio這種死刑犯才畫會出彼款畫面──敢講是罪中的人特別表現出對神的向望？
（我欲按怎？）
「你敢毋知影，要對上帝坦白！對你的某坦白！雖罔你可能會失去一切，毋過尚起碼，你會得著上帝！」Tō干那是Caravaggio彼幅圖內面的人底開喙講話。（敢真的？）事實上，tī這个信仰的內面，我干那毋bat家己決定過啥物……毋乾焦是信仰，應當講，自從我為著佮家財萬貫的妻結婚，我的心tō拍賣去矣，tō失去我家己的主意矣敢毋是……
Kelly水腫的面直直tī我的頭殼kô-kô纏。到旦我才知影，外表生ka̍h普通的Kelly，遂是傷過古意的查某囡á，甚至伊彼暝會答應綴我去飯店，可能嘛是為著欲顧一个無路用的查甫人niâ-niâ……我想著伊的腹肚，內面的囡á可能是我的，心肝穎á tō閣tiuh一下……閣再講，伊是彼款看著青暝阿婆底賣彩券，會講出「若是行過無買，我tō會直直想這件代誌」的善良的查某囡á……我回想彼暝的情形，感覺伊的心有一種高貴；阿佮伊比，我規个人tō汰膏ka̍h家己看袂落去──
──我毋bat有過hiah呢見笑的感覺！
我沓沓á清醒：目下，承認一切可能較簡單規氣──因為這，上起碼是一个家己做的決定矣。
這tō是一切矣。
雄雄，妻所講的「罪」的想法，干那sih-nah sih過我的心。
雨的聲漸漸恬落來。
我考慮了，決定敲電話予Kelly。
「喂──」伊tī電話彼頭的聲小可驚tshuah。
「是我。我共妳講，若妳欲共囡á生落來，我會替妳想辦法。這項，我會先共阮某講。」
「敢真的？」
我聽見伊tī電話彼頭底哭。
「毋免啦，因為我已經決定矣，囡á是我的，這个囡á我會家己io大漢，你毋免管我……」
伊共電話掛斷。
我閣共敲幾若遍，伊無閣接。
這个憨查某！
我轉去到厝，猶袂踏入門，tō聽見客廳嘻嘻哈哈的聲，干那底慶祝啥物。
敢會是啥人生日我袂記tsit？我tī心內暗想。
才行到門口欲gîm鎖匙，妻tō共門phah開迎接我。「轉來矣--啦！」伊斡頭共厝裡的人客講：「這个新科的爸爸轉來矣--啦！」續落是一陣笑聲。
我驚一tiô。敢講in發現矣？夯頭看，我的丈人爸佮丈姆攏坐tī客廳。
妻看我僥疑的表情，tō指伊的腹肚講：「你這个gōng大呆！我今á下晡用試紙驗過，你欲做爸爸矣--啦！有歡喜否？」伊歡頭喜面共我攬咧，聲嘛tueh-leh tiô，繼續大聲講：「你看，上帝聽我的祈禱，而且，祂定著無閣紀念咱的罪矣--啦！感謝主！」
「喔……你拄才欲共我講的代誌tō是這？」
「是矣！你干那無外歡喜neh？」
「哈哈，無啦，哪有可能無歡喜？」
「若無，位你轉來到旦，目頭結結是底想啥？」
「妳莫烏白想lah…哪有目頭結結…我只是te̍h想講，哪會到旦無聽著彼隻白耳á的叫聲？」
「哼，你閣講？是毋是你共放走的？」
「無矣！」
「閣講無！我早起欲共飼，tō無看著伊的影跡矣--呢！閣講毋是你共放走的？伊彼loh神經鳥，飛出去定著袂活的。」
我緊闖到陽台看，果然是空空的鳥籠á。彼隻白耳á成實家己飛走矣，籠á內乾焦tshun幾枝á伊留落來的鳥á毛……
哼！確實是有kioh數的鳥矣！
我笑出聲。
妻綴tī我的後壁，講：「你是閣底笑啥？」
我看伊因為有身，表情攏無仝矣，回復到阮拄熟悉的時的輕鬆佮溫柔。我共伊的手牽咧，講：「無啦！咱先入來。我嘛有一項欲共妳講。」
「佗一項？」
「妳要先答應我，袂使受氣，按呢我才講。」
「好！我答應你！」
我雄雄聽著鳥á飛過的聲，夯頭，真奇怪，啥物攏無看著。風吹--來，有幾片樹葉á飄tī空中。我想起Dante寫的：「我哪會行入樹林內面，我家己嘛無清楚，乾焦知影tī愛睏盹龜的時，我tō離開正路。」我發覺一路綴我轉來的彼二蕾目睭，毋知當時已經匿無去矣！
「飛出去定著袂活的！」
我感覺妻的聲音kah-ná蝒蟲，ngiauh-ngiauh-sô，sô入我的腹肚。
（Suah)
2008/7/2 初稿 2008/12/26 修正版2009/3/24 v4
--------------------------------------------------------------------------------
[1] 合房Kap-pang5
[2] 沓沓仔tauh8-tauh8-ah
[3] 鸛 kuan3
[4] 綿精 mi5-tsinn
[5] 卡面 kha2-min7, 外面也。
[6]範勢pan7-se3
[7]嚅nauh
[8]範pan7
[9]囂hiau
[10]交落ka-lau7
[11] kioh數 kioh-siau3, 膽識也。
[12] 腳數 ka-siau3
[13] 刮刮樂 斜體字表北京語發音，以下同。
[14] 嬈玲瓏hiau5-ling5-long
[15] 放散 pang3-suann3
[16] 起酵khi2-kann3
[17] Phan3仔, 男朋友
[18] 淋 lam5
[19] 博 puah
1
我毋知影妻是按怎會去買彼隻鳥á轉來，伊講：「Tī夜市á看著，感覺伊可憐，tō共買轉來矣。」我共斟酌看，是白耳畫眉。鳥á予妻囥tī房間頭前的陽台，一透早，唉tō干那有心理病仝款，啾啾叫，叫袂煞，tī籠á內khok-khok跳懸跳低，害我倒tī眠床頂嘛聽ka̍h無張持緊張神經質--起來。我共妻講：「妳敢會使叫彼隻有病的白耳á莫閣khok-khok跳矣？若無，規氣共放放--出去。」妻應講：「A tō是按呢毋才看伊可憐的--嘛！閣再講，按呢的鳥á共放--出去，嘛乾焦是揣無吃、飫死一條路爾敢毋是？」妻真堅持，我只好繼續接受伊佮鳥á精神上的苦毒。
閣較害的是我自來無bat想過，我一日透早會因為醫學的特殊理由佮妻鬥陣。伊量體溫，判斷彼日是「排卵期」，tō要我請假佮伊去婦產科做檢查，尚重要的是，tī檢查晉前，夭壽骨阮閣必須要先合房[1]。彼个檢查有一个奇怪的名叫做「性交後試驗」。Tī按呢的早起無閒彼項予我感覺真無神，見若毋是位感情的角度出發的，哼我認為它tō屬tī獸類的層次。好笑的是規个過程平波波無起無落，袂輸一个唐突恬靜的儀式，一直到結束，我遂完全無臭無汗（毋tō干那一隻狗？）事後妻恬tsuh-tsuh倒值床頂袂振袂動，伊講，是醫生交待的。「這是tiâu胎的姿勢，要維持半點鐘。」伊的聲調內面有一款莊嚴的母性的氣氛，予我笑出來。伊看我嘻嘻哈哈，tō受氣矣，頭斡過來講：「敢講這件代誌你無責任？閣有，尚急欲抱孫的人敢毋是恁老爸？」
這站，親像按呢的情形已經無特別。拄結婚的時，因為猶未生子，我佮妻確實享受過一段清閒自在的日子，上山落海，嘛做伙去過幾咯个國家蹉跎；毋拘，當阮想起要有囡á的時，這个清閒遂tō成做壓力矣。阮一直無法度有囡á。沓沓á[2]，阮鬥陣的時所想的全是這个任務，這予人真厭sian無神。妻認為一定是tī伊或者是我成長的過程中，有啥物無發現的罪，所以伊的腹肚才會到旦無動靜。所以，伊堅持要揣出彼个罪。這馬，「罪」的想法kâⁿ tī阮中央，已經成做一粒我心肝頭的臭膿。我毋知影按呢的看法位佗來的，毋過，我按算拒絕它。哼哼，自古來，宰人放火的惡人定定是子孫á滿堂敢毋是？
病院診間的壁頂頭掛一幅白鸛[3]展翅的圖。晉前tī我佮妻的房間壁的頂頭，嘛bat掛過仝款的一幅，是妻特別揣真久才買著的。北歐的人講囡á攏是白鸛用喙咬咧送來的，所以，共白鸛叫做送子鳥。妻認為掛彼幅圖會予伊好運（若論罪，這个迷信的想法咁會使脫罪？）彼幅圖內面的鸛翅鼓展開，白色羽毛的外圍是一緣烏色的毛，tī日頭下，確實干那有一个白布巾包起來的紅嬰á予牠抱tī胸坎，我愈看愈綿精[4]。「你敢會留tī遮？」妻欲做內診的時，護士小姐問我。我搖頭。目睭金金看另外一个查甫人共傢俬囥入妻的身體，閣按怎講我嘛無法度慣習。「按呢，請先卡面[5]等。等一下會閣請你入來。」護士小姐kah-ná知影我的ngài-ngio̍h，用一个同情的聲調講。我tō tī候診室等。安徒生bat寫過一篇白鸛的故事，內面講有一群狗怪囡á唱歪歌恥笑當底學飛的白鸛的鳥á子，路尾手，彼群白鸛學會曉飛了後，真袂爽，tō共一群死去的囡á送予遐狗怪囝á做小弟小妹──我共妻講這个故事，奇怪，伊聽了真無歡喜，認為我故意講歹聽話予聽。尾手過無二日，伊tō共彼幅圖位壁頂提落來--矣。這馬想來，妻所講的罪，嘛毋是完全無道理。我敢是彼群恥笑白鸛的囡á的其中一个？
這个想法沓沓á tī我的心內pù-íⁿ：我知影，tī表面的「我」下面，恐驚有另外一个「我」，阿彼个「我」的想法閣是hiah呢汰膏垃圾，完全是表面的「我」無法度承認的！
「先生，請入來。」護士小姐叫我。
妻已經peh起來坐tī椅á頂，掛金框目鏡的醫生一直看電腦螢幕：「tī拄才的檢查，太太的子宮頸發現有12隻精蟲，這表示精蟲的數量、活動力閣有對子宮頸黏液的穿透力正常無問題。一般來講，子宮頸黏液是精蟲向前泅最大的阻礙，有通過12隻已經是袂bái。」這表示啥物，我想無，醫生嘛講袂清楚，總講一句，伊共阮恭喜，因為阮猶閣真有機會有囡á，毋過要繼續phah拚。毋知是安怎，我真討厭看彼个醫生的面。行出診間我挑故意假笑魁：「我甘願共神求嘛無相信這个醫生的話。」妻tō共我凝：「哼！你的信心敢袂傷大？」伊焦笑二聲。我雄雄發現這已經毋是我所熟悉的彼个妻（老實講，位阮想欲生子，我tō毋bat聽過伊笑），聲調內面，有我無法度瞭解的不滿。
2
暗暝，阮社頭á迎鬧熱，阮pâ自幾日前一直堅持我要去吃辦桌，因為是地方難得的神農大帝刈香，幾年一擺。印象中這款代誌是阮阿公的sit頭，阮pâ一向是kik外外毋bat底睬的，毋過，阮阿公二年前過身去矣，這遍阮pâ遂變做阮林家的大家長，雄雄熱心ka̍h。阮pâ的意思干那講這是伊的面子，所以，我一表示我尚好莫吃拜拜的時，伊tō kik面腔予我看，真有欲斷絕爸子關係的範勢[6]，這予我真不安。我認為我的老爸並無顧慮我的想法，因為我的丈人規家信耶穌，閣再講我為著娶妻，表面上嘛勉強洗禮矣，這馬閣是tī阮丈人的建設公司吃頭路，我相信阮pâ的堅持乾焦會造成我的不幸爾爾。
「好啦，恁尪á某tshūa來孝孤tō著啦。恁契爸火樹叔公嘛八十外á外矣啦，這回的香刈了，敢猶閣有後一回tō毋知矣--啦！」阮母á按呢嚅[7]：「無，嘛看tī恁契爸á的面子，伊外疼你咧！」
我的契爸火樹叔公，是六七十冬前神農大帝揀選的老乩童，我細漢歹io飼，阮母á共我契予伊做子，逐冬過年初二的查某子日攏要轉去in兜吃飯吃到16歲，he是阮hia的例。Hín時我的頭殼熠過一个畫面，是幾年前火樹叔公去到阮兜園á做客的情景，阮欲種一欉桂花，伊提圓鍬鬥相工翻土，是幾十年專業的老農夫的正範[8]的khut勢。日頭照tī伊規面的汗頂頭，予人一款特別深的年歲的印象。
拄才阮母á講話的口氣有淡薄á稀微。我問阮母á：「誰知影神農大帝是誰？恁拜的是誰恁敢知？」我tō聽見伊「唉！」吐一个大氣。
伊講：「唉，Hàm-hàm矣啦！」
哼哼，這款鬼神的代誌，這馬我是真無想欲信斗的。
In一隊人馬天未光tō出門，去到屏東的海墘á刈香，閣倒轉來到社頭已經是下晡三四點，lòng鼓lòng鑼，鬧熱彩彩，干那欲共規个社頭囂[9]過來的款。我無偎過，是到暗頭á怹共桌擺出來，我才佮妻勉強到位坐桌吃飯。
妻siān-siān講：「若是阮爸知影，定著無歡喜的。」
「毋是逐項攏要予知嘛。」我按呢應。
彼桌菜是袂歹吃，嘸過阮坐傷頭前，卡拉OK康樂隊的歌聲予阮真歹消化。我略á算，全部擺三四十塊桌坐滿滿，規个社頭的人攏來到位。姓吳的、姓林的、姓簡的、姓李的，我自從退伍回鄉到旦，毋bat看著這呢濟鄉親坐做伙，阿恐怖的是，干那每一个面我攏熟悉熟悉，毋過遂喝袂出名。其中我感覺有幾个少年家á特別面熟，問阮母á，伊講：「遮少年輩的，我嘛bat無二个矣！」按呢二三擺，我tō無閣問矣。桌擺tī阮社頭的下路，是我做囡á走闖的所在，桌邊拄好是彼欉阮時常tī樹下蹉跎的sūaiⁿá樹，阿tī彼條下路，阮嘛時常踢銅管á，銅管á飛出去的乒乒乓乓的聲那像閣真明，毋過，我共頭斡來斡去，按怎tō認無一个囡á伴。我雄雄發覺家己是故鄉的外地客。
「你看he康樂隊，敢講恁地方的人攏是遮呢無聊的？」妻講。
我無應伊。
阮pâ佮我的阿叔一直叫我上台唱歌，真心適，怹攏講愛聽我唱歌，我一直應好，毋過一直無唱。台頂的彼个查某主持人自稱阿美，妝畫真厚，穿紗á衫，低俗裸露，對每一个上台唱歌的人攏會sai奶二句，閣共伊的胸á貼tīin的身軀khok-khok-kô；無三二下手，我的雞母皮已經交落[10]規土腳。我閣詳細看，he是最近真時行的貨車所改裝的流動舞台，是共貨車後斗的車廂四面展開所成做的金光熠熠、鬧熱tshah-tshah的舞台。舞台頂較偎後面的部位徛一塊看板寫「音美歌舞團」，看板的頂頭貼一張紅紙，寫：「恭賀神農大帝刈香繞境大典闔家平安」，看板的後面坐一个彈電子琴的琴師。阿美á差不多三十外歲欲偎四十，穿一軀粉色有真濟水晶珠的比基尼式的服裝，懸踏鞋真懸，見若人唱歌，伊tō伴舞，二个奶á tī懸懸的台頂tōng-tōng-hàiⁿ；特別若是歐里桑，伊tō將胸á貼tī怹的身驅lù懸lù低，閣手牽手跳舞。「夭壽喔，去佗揣來這个妖精？」台á腳的歐巴桑嘛笑加咬咬叫，tō算台頂佮妖精跳舞的是怹的老伴，嘛干那無要無緊的款。哼哼，誠實是嬈記記無正經的歌舞暗暝矣……我想欲將目睭徙開，毋過真無法度，我的目神不時貼tī彼个主持人阿美á的胸坎……
Tō tī這个時陣，我的手機á giang--起來，偃頭一看，是我無熟悉的電話號碼，我共切斷，結果它過一下á閣giang，我切斷，閣giang，按呢二三擺，我tō共接起來。想袂到，電話的彼頭是一个查某囡á的聲，我感覺毋著，緊離開座位，行去較無人的所在。
是一个查某聲：「請問敢是少董的？」
「按怎？」
「有一件代誌…我想欲當面共你…唉呀…咱敢會使見一个面？」伊的聲音聽著真秘四，干那底哭，小可稀微悲傷。
「小姐，等一下。妳是誰，我敢bat妳？」
「敢講，你袂記矣？我是Kelly矣。」
「Kelly……Kelly……啊，我想起來矣，是妳！」是較早tī tshit-thô場所熟悉的一个查某囡á。
伊講：「我這馬tī會場呢！我拄才有看著你。」
「哦？」我驚一tiô，四界相一下，看無伊的影跡。
伊繼續講：「我是來鬥相工辦桌的啦。」
我沓沓á想起伊的面，佮伊這馬秘四的聲合[kap]做伙，雄雄抱心起來……He是一个無真醒目，某一方面來講，是小可膨皮大箍的面……閣再講，伊的哭聲真歹吉兆，若會使選擇，我無要啥物代誌佮伊有致代！
伊本底隨欲佮我見面，毋過我講無方便，所以共拒絕。事實上，我無想欲閣睬伊，只是伊tī電話中苦苦哀求，我驚伊亂，所以勉強佮伊約一个時間地點，了後，隨tō共電話掛掉。
行轉去位，妻問我電話誰敲的，我烏白講一个同事的名，毋過，位妻僥疑的眼神裡，我隨tō真後悔我所講的白賊。
暗暝tī眠床頂，我夢見彼个叫做阿美的主持人。我實在毋知影伊按怎看上我的，tī夢中，主持人行落舞台，來到我的身邊，完全毋管我的妻抗議，共我揪上台。我只好唱一條洪一鋒的〈放浪人生〉交差，he是阮社頭的人攏甲意的歌。我聽見台下的phok-á聲，毋過看袂著阮厝裡的人，包括妻。Tī我唱歌的時，主持人阿美á為我伴舞，然後，伊牽我的手跳舞，閣將身軀貼tī我的身軀。最後伊的二粒親像雞規的大奶á ân-ân貼tī我的胸坎，柔閣軟、燒loh燒loh，我一下手感覺強欲袂喘氣，唱袂出聲。我的頭殼雄雄親像入魔公，一偃頭，發現阿美á的面遂變做Kelly的膨皮面，續落，閣變做妻的面。
四箍輪轉一下手攏暗落來，親像烏暗的一片樹林。我緊闖落台，遂看見一隻灼火的虎位樹林內面行出來，恬恬徛tī我的面頭前，牠的目神是燒燙燙的火箭tshiōh過來……
我喝一聲tō醒來，半暝矣，彼隻白耳á竟然閣tī陽台跳懸跳低……
3
Dante tī《神曲》的第一句話寫：「當人生半途，我迷失tī一座烏暗樹林。欲講出彼个樹林有外呢拋荒、肅靜佮曠闊，是外呢á困難矣！」
這tō是我的心情。
講著Kelly，實在講，攏要怪彼暝tī KTV酒店，飲傷濟酒矣啦。因為建案的圖一直無法度通過，公司建築課的老李的有建議，所以阮才會按捺都發局的承辦王科員去飲酒唱歌。彼暝阮是三个人，一个人揀一个小姐來坐檯。王科員是三十出頭歲的緣投ásàng，穿白seh-tsuh，一開始秘四秘四，菜鳥á款，毋過坐檯的小姐一坐定，佮伊乾二杯燒酒落肚，伊膽頭在矣，手tō攬tī伊的腰，腫頭á ngiauh咧ngiauh咧底烏白so。哼哼，有影這款phāⁿ查某的豬哥步數免人教，通世間哪會有菜鳥á？自然á自然tō成做老鳥一隻。媽媽桑Dora干那無檯通轉，留tī阮的包廂直直添酒勸酒，續落，閣參阮喝酒拳，阮tō是按呢才飲一下傷濟去的。
哼，我知影老李的平常時á tō看我無目地，我看，彼日伊是酒後吐真話，事實上為著佮我爭副總的位，我早tō已經聽著袂少風聲。
In三个小姐tī舞池共王科員攬咧唱歌跳舞的時，老李的提酒甌敬我，彼時陣伊已經飲ka̍h一个面紅貢貢。
「唉，來啦處長，我老李的敬你啦！屎in娘你要知neh，我敬酒，並毋因為我愛飲酒neh！」
「哦？」
「你愛知呢，吃人的頭路，我李某人，按呢飲酒嘛是姑不而將呢！望你小牽成啦！」
「老李的，講這敢是話？我先焦啦！三八兄弟，咱攏是吃人頭路啦，我敬你啦！」我飲焦，伊嘛飲ka̍h焦。伊閣開喙講：「無nooh處長，董的是恁丈人呢，你外清靠sáng勢咧，阿阮這，吃頭路人，佮你哪會比的？」
老李的大我的歲，子已經讀國中矣，伊本身閣是國立大學建築系畢業的，當年是建築師牌考無過，才暫時來滯阮丈人的公司的，想袂到一滯二十幾冬，牌猶是一直考袂過。伊畫出來的圖是袂bái，毋過到旦猶閣要寄別人的名。我的丈人對這點真無諒解，認為老李的企圖心無夠，「莫怪一張圖到旦審袂過！」為著這个案，老李的已經予阮丈人爸罵kah臭頭去。當然老李的有話講，伊認為tō是伊自少年為公司拚命，才會錯過讀冊考牌的好時機。
「哼！董的講這哪會著？無扈斗啦！」伊時常按呢nauh。
相對，建築毋是我的本途，我是讀藝術的，圖加減會曉畫，毋過起厝是外行；我佮妻tī大學tō熟悉，是因為妻，我才通有這个處長的頭銜的，所以tī公司，一寡生理的mê角，應酬外務的場面，確實嘛攏要老李的tshūa路。當然老李的話裡有khau洗，我聽會出來。伊飲酒了的目睭圓車車，我位伊的目神裡發見對我的恥笑，底笑我是吃軟飯的，精差無講出喙爾。所以我真袂爽。
「講話敢tō遮鹹？飲酒tō飲酒，幹！講阮丈人是何必？」
「這間公司是伊講準算，無講伊欲講誰？」
「你敢定著要按呢糟蹋我？」
「處長，我無這个意思喔！閣再講，我講的佗位毋著？若有好某，我嘛想欲娶一个著否。毋過，我有我的原則啦，比如講，若是因為按呢欲叫我背祖入教，哼哼這，我是做袂到的。」
「駛in娘，老李的，你講啥siô？恁爸入教佮in啥池代？阿若照你的意思，我毋tō是吃飯khaⁿ中央的，攏袂做主tsit？我共你講哦，尊嚴是一个查甫人的內褲哦，你攏免穿內褲行路呢？你家己袂泅，怪位我遮來是啥物意思？」
老李的聽我按呢講，嘛袂爽起pháiⁿ，酒甌á囥咧徛起來。
「你講啥siâu話？是誰袂泅？」
「我講你啦！」我嘛徛起來。
邊á本底底唱歌跳舞的王科員佮三个小姐，聽阮底大細聲嚷，驚一tiô，一下手恬落來，tshun電視的音樂聲家己底tân。
老李的二蕾目睭gîn-òoⁿ-òoⁿ看我，用輕視的口氣講：「著啦，我是袂泅啦！毋過處長，你拄才講尊嚴是一个查甫人的內褲，借我共你改一句，若我看，內褲才是一个查甫人的尊嚴啦！In爸李某人，尚起碼閣敢佮人嗆tù，in爸毋是某奴，in爸的內褲是家己管的，阿若欲揣啥人thǹg tō揣啥人thǹg，猶毋免共某報備的啦！哼這點查甫人的氣魄，你做會到？我看，你連開查某的kioh數[11]都無啦！」
「哼！」我共我的酒杯大力宕tī桌頂，內面的whisky溢溢出來，潑規桌。In hia小姐驚阮二个成實冤家起來，tō位舞池行轉來膨椅這頭欲做公親。王科員緊tu薰予阮，媽媽桑Dora聽著聲，嘛闖入來。
媽媽桑Dora佮hia小姐嘛揪我的手，按捺我坐落。王科員隨共lái-tah拄過來，先為我點薰，喙一面講：「唉呀，少董，攏家己人，家己人嘛！」
媽媽桑Dora偎tī我的身軀，用手貼我的胸坎。Dora是三十外歲人，我才發見伊的芳水有一種野芳味，佮伊鈕掠的氣勢真四配。伊嘛講：「無啦，規氣算我毋著，共恁thîn傷濟酒矣啦！我賠罪我賠罪，失禮hooⁿh！攏家己人，家己人嘛！」
Hia小姐的其中一个，本底是老李揀來陪坐的，可能乾焦二十出頭歲，穿一條短短的牛á裙，身軀lông一領粉紅á色圓領的薄紗T-shirt，伊小可膨皮的面á因為現場的氣氛緊張ka̍h。老李的講「你連開查某的kioh數都無」的大嚨喉聲，干那閣tī我的頭殼底轉踅，底激我。
（哼！啥物腳數[12]？）
「喂！妳來！」
彼个小姐驚一tiô看我，閣斡過看Dora。
Dora講：「董的底問，妳是無聽著喔？」
伊才細聲á講：「是。」坐倚來。
「妳幾點下班，我請妳吃消夜按怎？」
伊頭偃落。
「董ê，我是無出場ê。」伊sè-gī-á講。
「喔，按呢好，我嘛無按算欲付錢thsūa妳出場！」我挑故意按呢講。伊的目神真無自信。我叫伊lim酒。
我講：「妳免煩惱啦！我趕時間，等一下愛走矣，消夜嘛吃袂落去。我叫你坐落來，只是beh問妳kám有看著拄才路裡的車禍。」
伊搖頭。
我講：「He是我的一个朋友，妳無看著tō傷無睬矣，伊彼台車全台灣才五台，紅色的進口跑車，閣敞篷的。伊佮一台載phun的貨車相lòng，一桶phun車車倒，車tī伊的車的引擎蓋頂懸。阮朋友ló車欲理論，結果，車門一phah開，tō鼻著phun的味臭ka̍h伊 tsàn袂tiâu，吐出來，吐kah規个車內底攏是，車外臭，車內閣愈臭，無人敢倚過……」
彼个小姐笑--起來。伊的面因為酒氣漲紅--起來，發面紅。我閣叫伊lim。若講tī彼款所在上班的查某是外呢高尚，這我毋信，哼tō算表面講無欲出場的嘛仝款啦。哼哼這是一向我對這款查某囡á的判斷。我的心肝頭有一个想欲冒險的感覺ngiau起來，濁濁的喟that tī胸á。我無法度阻止家己鑽入彼个深坑。
我看伊的鞋á，是色水退時行的sông款，lî-lî-lap-lap閣傷大雙。我挑工講：「這鞋á看起來足好穿的hooⁿh？」伊tàm一个頭，面規个紅貢貢--起來，紅到頷頸去。
伊講：「董的，你足心適neh！我愛按怎稱呼你才好？」
我用目尾看老李的，伊揀的小姐予我tsáⁿ--來，我看伊的面一陣青綠。
我無應，我對彼个小姐講：「妳kám想欲共我tsim？」
伊應：「無愛！」
我隨講：「哼！我嘛無講妳會使。」
按呢，我tō共伊放leh，當做伊無在場，佮媽媽桑閣有另外幾个小姐lim酒喝拳，一直到伊kah-ná不安坐袂tiâu的時，才斡頭轉去看伊的目睭。
「失禮，我kah-ná冷落著這个súi姑娘á矣！實在講，若毋是我tshūa某矣，好定今á日著會共伊求婚leh。」眾人hi-hi-ha-ha笑起來。我規个身軀斡過，tī伊的耳孔邊細聲á講：「來，súi姑娘á，妳心內想一个1到10的數字。我臆看māi──Kám想好矣？」
4
彼日因為酒飲濟，我的頭殼直直tiuh。計程車載阮入去這个城市上光嘛上暗的角落，落車了後，我按算散步一段。Kelly干那一隻狗á子仝款綴tī我後面行。
阮經過旅社區的巷á口，有一个青瞑的阿婆á底賣刮刮樂[13]彩券，伊孤單一个，直直招呼人買，生理真bái的款。Kelly要我停跤，伊位伊的皮包á gîm二百箍出來買，因為動作笨閣青狂，零角á lak規土腳。伊踞落去khioh，直直共我講歹勢。阿婆á共彩券提予伊的時共說多謝：「小姐，妳好心會有好報喔！」
「哦，想袂到妳hiah有愛心呢……妳毋是講欲儉錢，煞閣按呢開錢買彩券？敢講妳成實相信he錢是in得的？」
「錢是誰得的我毋知矣，毋過，若是行過無買，我tō會直直想這件代誌……按呢足討厭的，所以規氣tō買矣！」
五彩燈tshiōtī伊的面，伊的目尾有青春的色水，予原底膨皮的面無hiah歹看。我嘛注意著，伊乾焦是面較膨皮爾，論其實，伊的身軀sán中帶柔，有嬈玲瓏[14]的身材骨格；阿伊勻勻á牽絲、小可夯懸閣sai-nai的酒醉的聲調，嘛共五彩的燈影加添一款放散[15]的野味佮風情。
我問伊：「妳敢bat陪人出來？」
伊搖頭。
「除了這妳閣做過啥？」
「足濟矣，啥物攏做呢。」
伊相東相西、na講話na揪頭毛。毋知為啥物，妻的形影雄雄嘛店我的頭殼內浮花，予我真siān。我雄雄感覺老李的話裡有真實的一面：位我娶妻的彼日開始，「某奴」二字恐驚tō注定要綴我一世人矣。阿若按呢相比評，親像Kelly為著錢甘願行入嘻嘩的蹉跎間á做空缺，看來嘛毋是啥物特別稀奇的代誌。
我想起晉前我共阮老爸講我欲洗禮的時，伊應我的話：「若按呢，恁爸死，你這个不孝子欲捧斗否？」
「阿爸，毋是按呢啦。」
阮老爸的面khiû做一丸講：「毋是按呢無是按怎？猶袂娶tō急欲做某奴矣敢毋是？」
我問Kelly:「妳講妳啥物攏做？比如講咧？」
「比如講，洗大樓啦、tī菜市á口賣囡á衫啦、加油站加油的啦、總機小姐啦……」
「總機小姐？」
「嗯，tō是半暝專門接無聊查甫電話的彼種……」
「喔？」
「妳是講彼種0204的電話？」
「是矣是矣，tō是彼種電話矣。敢講你攏無敲過？嗯，我毋信！」
我毋知影家己哪會搖頭。
我共伊的腰攬leh講：「哪會欲做he？接彼款電話，足無聊的敢毋是？」He是假仙假tak的聲調，我予家己講的話驚一tiô。實際的狀況是，酒精定著已經tī我的頭殼內起酵[16]，Sò-piak-piak的豬哥蟲tī我的規身軀ngia̍uh-tshī-tshāsô。我想起我嘛bat敲過彼款電話，伊喙裡所講的彼種無聊的查甫人……
He是洗禮了後我所敢做的尚大的冒險，尚奇怪的是，竟然tō發生tī洗禮了彼工的暗暝……
「只是一个空缺嘛！」Kelly共喙翹起來講。
……「林柏年，我奉聖父、聖子佮聖神的名問你，你敢接受耶穌成做你生命的救主，一世人行十字架的道路，跟綴祂無離？」
「是，我接受。」
我想起我受洗的時，牧師滴水tī我偃低的頭殼頂，我的目墘澹澹，干那有目屎流落來；毋過我的目屎絕對無妻的濟。妻講he是伊所看過尚感動人的洗禮，伊講：「因為，這是你的洗禮矣！你敢知影我等這日等外久矣？」
這是我娶伊晉前的代誌，hín我感覺伊時常有一種溫純的表情，有一種值得一世人追求的嫷──he，恐驚是我接受彼个儀式尚大的原因。毋過in講這毋是洗禮的本質，逐擺想到遮，我攏感覺真不安，有一款欺騙上帝十字架的感覺……事實上，我是為著佮妻結婚，才決定洗禮的，這个事實永遠無法度改變。阿洗禮彼日暗暝，會刁故意敲0204的電話，敢毋是為著欲共家己提醒這項？或者，是表示一種無聊的反抗？
因為sih過十字架的畫面，我感覺一陣抱心刺tsha̍k。我雄雄感覺這齣荒hām的戲愛suah場矣。我講：「暗矣，你是毋是應該敲電話叫恁phàn-á[17]來載妳矣？」
「你滾笑。我無男朋友啦。」
「哦？」我看伊。伊毋敢看我。我講：「妳有！」
「我無啦！」伊受氣矣。
「若無phàn-á，hiah呢拍拚趁錢beh創啥矣？」
「Gún m̄愛共你講！」伊按呢應的時，二tsūa目屎tō gô落來，掛tī伊膨膨無真嫷的喙phúe。我小可予伊雄狂的目屎驚著，恬恬無講話。
「你kám忝矣？欲歇睏矣袂？」伊共我的手骨揪咧，夯頭看我。
5
出門晉前，我專工去陽台看彼隻白耳á，因為伊已經一暝無叫嘛無跳。雄雄恬落來，對這款病鳥來講，並毋是好代。論其實伊會使算是一隻袂bái看的鳥á，毋過耳á邊白色的毛一直生到目睭四箍圍，看著袂輸是白色的目睭遮，予人無真坦白的印象（敢講鳥á嘛有親像咱人的人格？）伊一身軀的毛，已經予伊家己lè ka̍h大孔細lih，掠我金金相的目神干那有真深的怨恨。Tō因為這个予人袂爽的目神，我想欲共放出去；毋過，嘛因為這个予人袂爽的目神，我無想欲予伊遮呢好吃睏。我乾焦共綁鳥籠á門的幼鉛線解開，哼阿伊若有頭殼有才調，tō應當家己共籠á門thuh開飛出去毋才著。
我佮Kelly約tī中晝。
約tī中晝，當然是無向望妻問，更加無向望任何人知影這件代誌。彼擺的大建案順利進行了後，我升做副總經理，tī三面偎窗的辦公室，我看著透早的日頭共街á路tshiōka̍h金siak-siak。
我拄坐好勢，秘書tō入門來講，我的丈人爸董的欲約我吃中晝。我只好請伊回覆，講我已經佮一个營造商先約好矣，所以要改一个時間。續落過無外久，秘書閣入來，問我講是欲佮佗一个營造商吃飯，因為建築課老李的已經tshūa大東營造的人到位，嘛是想欲確定中晝吃飯的代誌。我共伊講：「毋是大東營造，我中晝是欲佮三石營建的人吃飯。妳去共in講。」
秘書行出去了後，我恬恬看大樓下面的街á路，車輛來來去去，我對in的人生好hiân起來。確實人佮人之間，生活tō是差hiah濟袂比評tsit的。阿in hiah無才調的人常在講我是吃飯khaⁿ中央的，he又閣是按怎？敢毋是怨妒niâ？相對來看，哼哼我真清楚，妻所予我的一切，無別人會使予我，這tō是一切原則的原則，雖然，我無通選擇……
講著Kelly，若毋是驚長暝厚夢，我實在真毋甘願睬伊，哼閣再講，彼款戲棚頂的戲，戲棚腳何必閣搬……
我感覺真荒hàm，彼一暝我tshūa伊入去飯店的情形kah-ná是糊去的一幅圖，我先是去洗身軀，伊tueh我入去浴間，續落，遂連我家己嘛無啥印象矣……閣較hàm的是，經過一段時間，伊的面到底是生做按怎，規个遂嘛愈生份矣。
（若閣一擺，我嘛無想欲佮伊鬥陣！）
中晝烏雲位海彼爿來，一目睨tō開始落西北雨。我佮伊約tī阮K市捷運R12站的一號出口路邊，我駛車過載--伊；毋過我到位的時，伊猶未出現。雨ná落ná大。我共車停tī路邊等，伊過10分猶未來。我敲電話予伊，伊電話中的聲真雄狂款，直直會失禮：「唉呀，你到位矣喔，歹勢，因為發生一寡代誌，請你小等一下，我連鞭到hooⁿh！」
我繼續等，一直到伊叩我的車窗──若無是伊叩，我根本tō認袂出來，伊已經有身差不多五六個月矣，一圈肚，歸身軀是強欲走樁去的形，原本tō小可膨皮的面這聲變ka̍h膨閣兼腫。（誠實的，我毋bat看過遮bái的查某！）伊夯一枝雨傘，毋過傷細枝，肩胛頭一下手tō予雨潑澹去。
我開車門喝：「緊入來！」
喔這个查某，哪會變這个款？
我的心肝窟á tiuh一下，感覺真歹吉兆。
伊拄坐好tō那喘那講：「遲到失禮啦。拄才我欲坐捷運的時，有一个囡á的雨傘tī亭á腳予風吹歹去，伊哮ka̍h，講伊會予in老母槓死……所以，我只好共我的雨傘先予伊，我閣斡轉去厝提。想袂到，一差差hiah久。失禮hooⁿh！」
「阿妳的腹肚……妳結婚矣呢？」
「歹勢，雨傘共你滴ka̍h規車。著啦，我tō是為著這來揣你的。其實我無確定啦這个囡á，我猶毋知伊…是阮男朋友的，抑是…你的…」
「啥！妳莫烏白講！」
「其實我本底無想欲共你講的，我按算家己欲共囡á生落來飼的…我誰嘛無想欲講…閣再講，我若揣你，我知影你會誤會……」
「等一下等一下，妳先共我講，妳彼時陣毋是共我講，妳無男朋友？哪會這馬閣講無仝話？到底是按怎？」
伊講伊的男朋友彼時陣博輸儌，欠人錢底走路，無要人知。閣再講，tī蹉跎間á，無人會承認he的。
「所以妳彼時陣hiah呢拚性命趁錢，嘛是為著予恁男朋友還數？」我對這一切半信半疑。
「嗯！其實毋是全攏予阮男朋友啦，閣有一寡予阮朋友，in講欲做生理……」
「阿伊這馬人咧？我是講妳的男朋友。」
「走矣！」
「走去佗？」
「我毋知矣！我足呆的著否？」
「阿伊是按怎欲走？」
「攏是我毋好啦，因為伊叫我共囡á提掉，我毋。我共講，我一定欲共腹肚內的這个囡á生落來。我閣共伊承認講，囡á無確定是伊的。伊一受氣，罵我菜店貨，共我sai一下喙phúe，tō走矣！」
（世間哪有遮憨的查某囡á？）
「阿恁厝裡的人咧，in 滯佗？」
「In滯庄腳，厝裡無錢，囡á閣濟，我國中讀無了，tō綴阮男朋友走出來矣，阮老爸講我尚好永遠莫轉去！」
雨雄雄痟落，落ka̍h我共雨su-tá開上大磅猶看無路。我只好共車先偎店路邊停，句在雨淋[18]。
「失禮啦！董的，我是想講這件代誌，你可能會想欲知影，嘛拄好看著你，所以毋才會……是按呢啦，彼日我做產檢，醫生講我有啥物妊娠毒血症，伊勧我要共囡á提起來……毋過我毋敢作主……」
「妊娠毒血症！會按怎？」
「醫生講，我的血壓傷懸，囡á可能會危險……」伊哭起來。
「阿妳咧？」我看伊面色真bái，bái ka̍h毋成人。
「只要囡á好勢，我……我是無要緊啦！」
我想想leh感覺毋著，緊共車發起磅，位病院的方向駛去。
6
我直直感覺勼脊骿有二蕾目睭底gió我，予我的勼脊骿那來那燒loh。
應當有人暗暗底跟蹤，好定是我尚提防的老李的。
──我後壁的彼台轎車親像tō是伊的。
一路聽Kelly講我才知，伊落跑的男朋友根本tō是sut á，伊共伊位故鄉tshūa出來了後，tō一直開伊的錢，閣瘋儌愛博[19]。伊是太子爺公的乩身，落跑晉前的sit頭，tō是逐日tī in滯的hia的王武宮練八家將。毋過in跳八家將的攏是愛博無藥醫。伊bat想過欲離開伊，毋過伊逐擺攏提太子爺公的名出來做háⁿ頭，伊會驚，suah-tō毋敢走，才會綴伊四界滾絞bok-bok泅。伊走了後，伊認定腹肚內的囡á原來是來解救伊脫離苦海的，所以伊按怎嘛欲共生落來。
伊講這馬無法度做「he」矣，大部份的時間攏揣散工á烏白做，最近，伊綴辦桌的too-tsí四界走，tō是按呢，才會一个面烏綠綠。
阮去到郊區的彼間教學病院，醫生檢查了，講確實是真嚴重的妊娠毒血症，伊的血壓佮尿蛋白攏傷懸，腎功能的指數嘛bái。醫生講：「恁要好好á做一个決定。囡á活命的機會乾焦三十pha，而且tō算活落來，嘛袂健康；我建議共提掉，若無，太太的部份嚴重的時可能會有腦出血、腎衰竭佮肝衰竭等等現象，性命危險。你敢是囡á的老爸？」
「呃……」我真勉強tàm頭。
「恁要做一个決定，我認為無必要冒險，要囡á，tō等較健康的時，隨時會使閣有嘛。這擺囡á先提掉，對孕婦是較好。」
實際上，假使囡á成實是我的，我想著我的地位佮前途，敢有可能會想欲留這个囡á？（無可能嘛！）
醫生閣一擺講：「若是阮某，我想我會按呢做。閣再講，太太……猶hiah呢少年！」我想，醫生定著有看出啥物。
我斡頭看Kelly，伊的面因為嚴重的水腫，目ham歪tshuah去，實在bái ka̍h袂認tsit。我順醫生的話nauh講：「嗯，若醫生按呢講……我看……也是共提掉好啦！」
伊聽我按呢講，乾焦bih喙，頭偃偃，過一下á才細聲á應：「這，我想是免考慮矣，我會家己共囡á生落來，按怎攏無要緊。你毋免睬我。」
Tī病院的大廳，我感覺彼二蕾目睭閣出現矣，我斡頭，是老李的無毋著，伊徛遠遠看我，真無好心款；毋過真龜怪，目一睨，伊的影跡tō隨閣無去。我四界相攏相無，乾焦勼脊骿彼二葩燒lo的目神感覺猶tī咧……
舞規晡落來，我送Kelly到厝已經是盈暗矣。妻直直敲電話予我，毋過我無心情接。我感覺真忝頭，先倒轉去辦公室休睏。
窗á下的街路，粒積的雨水反tshiō搖顯的燈á火，tī玻璃窗的水霧中tòo開，成做一幅水彩的夜景……我感覺家己是徛tī一隻風雨的船頂，頭殼起gông。
Tō當做無你的持代啦！
我的心按呢共家己講：攏莫睬伊。莫承認。莫閣接伊的電話、莫見伊、莫想伊，tō當做完全無這項。閣再講，囡á無一定是你的。伊只是一个軟稚的查某，伊無法度影響你所有的這一切。予消失去！
按呢想，我的心暫時較定著落來，妻敲來的電話聲閣giang矣，我共接起來。
「你是走佗位去矣？電話攏毋接！吃飯矣袂？」妻責備我。
「佮廠商講生理矣，這馬才轉來到辦公室。吃過矣。」
「按呢你緊轉來，我有代誌欲講。爸爸嘛來tī厝裡喔！」
「啥物代誌？」
「唉呀你哪會hiah囉唆矣，緊轉來tō著啦！」
「喔！」
我偎tī窗á，雄雄感覺家己tō袂輸是厝裡彼隻白耳á，阿辦公室tō袂輸是一个吊tī半空中的大籠á，我tī hin lè過來lòng過去，佮彼隻鳥á無啥物精差……這款的想法予我家己驚一tiô。
「柏年，加油！」
我猶會記洗禮彼工，妻的老爸是按呢貼我的肩胛頭的。（加油？）彼時我完全無法度理解這二字內面的意思。特別是，這个信仰一開始，tō不過是我想欲得著啥物的手段爾。妻。空缺。錢。閣有目下的一切……毋過這馬我嘛知影，因為濫著無真實的部份，我失去一寡物件。我已經小可了解矣，gió tī我勼脊骿的彼二蕾目睭，有可能是老李的的，有可能是我的丈人爸的，有可能是妻的，有可能是Kelly的，嘛有可能是我無熟悉的任何一个人的。
──敢講這是我的丈人爸共我講的「加油」的意思？
無睬，傷慢矣，我閣想起Kelly的面，規个人tō畏寒。而且老李的嘛可能知影矣，我的一切真緊會烏有去。（明á載伊會tī公司按怎講？哼！敢講tō為著彼一个可憐的憨查某？）目睭瞌瞌，我無張持去想起Caravaggio的彼福「聖母之死」的圖。Hin有一个歹看膨皮的聖母瑪利亞，雖罔平凡毋過透露尊嚴高貴的表情，我想，乾焦Caravaggio這種死刑犯才畫會出彼款畫面──敢講是罪中的人特別表現出對神的向望？
（我欲按怎？）
「你敢毋知影，要對上帝坦白！對你的某坦白！雖罔你可能會失去一切，毋過尚起碼，你會得著上帝！」Tō干那是Caravaggio彼幅圖內面的人底開喙講話。（敢真的？）事實上，tī這个信仰的內面，我干那毋bat家己決定過啥物……毋乾焦是信仰，應當講，自從我為著佮家財萬貫的妻結婚，我的心tō拍賣去矣，tō失去我家己的主意矣敢毋是……
Kelly水腫的面直直tī我的頭殼kô-kô纏。到旦我才知影，外表生ka̍h普通的Kelly，遂是傷過古意的查某囡á，甚至伊彼暝會答應綴我去飯店，可能嘛是為著欲顧一个無路用的查甫人niâ-niâ……我想著伊的腹肚，內面的囡á可能是我的，心肝穎á tō閣tiuh一下……閣再講，伊是彼款看著青暝阿婆底賣彩券，會講出「若是行過無買，我tō會直直想這件代誌」的善良的查某囡á……我回想彼暝的情形，感覺伊的心有一種高貴；阿佮伊比，我規个人tō汰膏ka̍h家己看袂落去──
──我毋bat有過hiah呢見笑的感覺！
我沓沓á清醒：目下，承認一切可能較簡單規氣──因為這，上起碼是一个家己做的決定矣。
這tō是一切矣。
雄雄，妻所講的「罪」的想法，干那sih-nah sih過我的心。
雨的聲漸漸恬落來。
我考慮了，決定敲電話予Kelly。
「喂──」伊tī電話彼頭的聲小可驚tshuah。
「是我。我共妳講，若妳欲共囡á生落來，我會替妳想辦法。這項，我會先共阮某講。」
「敢真的？」
我聽見伊tī電話彼頭底哭。
「毋免啦，因為我已經決定矣，囡á是我的，這个囡á我會家己io大漢，你毋免管我……」
伊共電話掛斷。
我閣共敲幾若遍，伊無閣接。
這个憨查某！
我轉去到厝，猶袂踏入門，tō聽見客廳嘻嘻哈哈的聲，干那底慶祝啥物。
敢會是啥人生日我袂記tsit？我tī心內暗想。
才行到門口欲gîm鎖匙，妻tō共門phah開迎接我。「轉來矣--啦！」伊斡頭共厝裡的人客講：「這个新科的爸爸轉來矣--啦！」續落是一陣笑聲。
我驚一tiô。敢講in發現矣？夯頭看，我的丈人爸佮丈姆攏坐tī客廳。
妻看我僥疑的表情，tō指伊的腹肚講：「你這个gōng大呆！我今á下晡用試紙驗過，你欲做爸爸矣--啦！有歡喜否？」伊歡頭喜面共我攬咧，聲嘛tueh-leh tiô，繼續大聲講：「你看，上帝聽我的祈禱，而且，祂定著無閣紀念咱的罪矣--啦！感謝主！」
「喔……你拄才欲共我講的代誌tō是這？」
「是矣！你干那無外歡喜neh？」
「哈哈，無啦，哪有可能無歡喜？」
「若無，位你轉來到旦，目頭結結是底想啥？」
「妳莫烏白想lah…哪有目頭結結…我只是te̍h想講，哪會到旦無聽著彼隻白耳á的叫聲？」
「哼，你閣講？是毋是你共放走的？」
「無矣！」
「閣講無！我早起欲共飼，tō無看著伊的影跡矣--呢！閣講毋是你共放走的？伊彼loh神經鳥，飛出去定著袂活的。」
我緊闖到陽台看，果然是空空的鳥籠á。彼隻白耳á成實家己飛走矣，籠á內乾焦tshun幾枝á伊留落來的鳥á毛……
哼！確實是有kioh數的鳥矣！
我笑出聲。
妻綴tī我的後壁，講：「你是閣底笑啥？」
我看伊因為有身，表情攏無仝矣，回復到阮拄熟悉的時的輕鬆佮溫柔。我共伊的手牽咧，講：「無啦！咱先入來。我嘛有一項欲共妳講。」
「佗一項？」
「妳要先答應我，袂使受氣，按呢我才講。」
「好！我答應你！」
我雄雄聽著鳥á飛過的聲，夯頭，真奇怪，啥物攏無看著。風吹--來，有幾片樹葉á飄tī空中。我想起Dante寫的：「我哪會行入樹林內面，我家己嘛無清楚，乾焦知影tī愛睏盹龜的時，我tō離開正路。」我發覺一路綴我轉來的彼二蕾目睭，毋知當時已經匿無去矣！
「飛出去定著袂活的！」
我感覺妻的聲音kah-ná蝒蟲，ngiauh-ngiauh-sô，sô入我的腹肚。
（Suah)
2008/7/2 初稿 2008/12/26 修正版2009/3/24 v4
--------------------------------------------------------------------------------
[1] 合房Kap-pang5
[2] 沓沓仔tauh8-tauh8-ah
[3] 鸛 kuan3
[4] 綿精 mi5-tsinn
[5] 卡面 kha2-min7, 外面也。
[6]範勢pan7-se3
[7]嚅nauh
[8]範pan7
[9]囂hiau
[10]交落ka-lau7
[11] kioh數 kioh-siau3, 膽識也。
[12] 腳數 ka-siau3
[13] 刮刮樂 斜體字表北京語發音，以下同。
[14] 嬈玲瓏hiau5-ling5-long
[15] 放散 pang3-suann3
[16] 起酵khi2-kann3
[17] Phan3仔, 男朋友
[18] 淋 lam5
[19] 博 puah
-
施俊州在12:26am對2009 八月 31的評論
-
Tsit 篇有看過紙本，私底下 mā 發表過意見。我 beh 講--ê 是，長松 iah 其他成員 nā 有新寫 ê 小說、另日 á 有按算刊 tuà《台文戰線》，ē-sái 先 the̍h 來 tsia tah、hōo ta̍k-ke 講 tsi̍t-ē-á「讀後感」（ mài 對外開放、限定成員看 ē tio̍h）。成員 ê「評」nā iá 有淡薄 á 參考價值，作者 koh 有同意，tō ē-sái tsham 小說做伙發表。建議 niâ。
.
-
胡長松在10:38am對2009 八月 31的評論
-
幾年前我佇TWNEL嘛提過這个想法, 可惜hiang3時有技術問題, tsuann5放咧無管--去. 俊州意見真好, 予我共彼个phah-lau7去的構想koh khioh轉來.
Tsiang時佇Ning, 發表部落格文章有三種權限通揀:〔誰可以看這篇文章：每個人/只有我朋友/只有我 〕，我想會使透過二種方式進行: 第一、作者發表的時著按算欲投稿予台文戰線, 主動注明一下, 設［只有我朋友（讀／評論）］的權限發表, 予逐家來罔講家己的看法. 第二: 透過我a3是其他推薦者, 共文章貼出來徵求網路〔我/推薦者的朋友〕的意見. 二種攏會使試. 現此時就會使進行--tsit.
-
-
Tō 照長松 ê 辦法來 kiâⁿ。Án-ne，成員發言 mā ē khah 頂真。
.
-
李秀在12:05pm對2009 九月 9的評論
-
hiang3, tsuann5, phah-lau7, koh khioh,矣, 讀一下好嗎?
"逐家"是大家?
-
-
"逐家"是大家
phah-lau7, 音意：拍漏
koh 音閣
khioh 音「去葉」切, 揀之意
矣, 音阿, ah, 語助詞, 教育部公布用字
hiang3, 音[喜降]切,hiang3時, 那時候
tsuann5, 音泉, 在本文作連接詞[就這樣]意
意見
您必須是成員才能發表評論！
加入 台文戰線聯盟